Еркин Қарақалпақстан Вести Каракалпакстана 19:15:26, 18.11.2017
Хош келипсиз! | RSS
Сайт мазмуны

Кириў усылы

ЫССЫХАНАДА ЖУМЫС ҚЫЗҒЫН

Бүгинги күнде мәмлекетимизде киши бизнес ҳәм жеке исбилерменликке еркинлик бериў, олардың жумысына араласыўды түп-тийкарынан қысқартыў, ҳуқықбузарлықлардың өз ўақтында алдын алыў, олардың профилактикасының нәтийжелилигин арттырыў бойынша ти­йисли нызам ҳүжжетлери қабыл етилген болып, бул бағдардағы нызамшылық базасының беккемлениўине тийкар жаратпақта.

Сондай-ақ, елимизде жеке меншикти исенимли қорғаў, киши бизнес ҳәм жеке исбилерменликти жедел раўажландырыўды тәмийинлеў бойынша қолайлы шараятлар жаратылды. Исбилерменлик структураларына мәмлекетлик хызметлер көрсетиў сапасын ҳәм олардан пайдаланыў имканиятларын түп-тийкарынан арттырыўға байланыслы комплексли шөл­кем­лестириўшилик-ҳуқықый илажлар көрилди.

 Усындай жаратылған жеңилликлер тийкарында өзиниң исбилерменлик жумысын баслаған берунийли Иса Юсупов 2005-жылы өзиниң «Кашфиётчи ёшлар» жеке меншик кәрханасын шөлкемлестирген еди. Ол өткен жылдың ақырында ыссыхана шараятында палыз өнимлерин жетистириў мақсетинде АКБ «Миллий банк»тиң Қарақалпақстан Республикасы бөлими тәрепинен жеңиллетилген кредитлер есабынан 990 мың АҚШ доллары муғдарында кредит алып, Беруний районы аймағында 2 гектар жер майданына ыссыхана қурыўды баслап жиберди ҳәм буның ушын керекли болған үскенелерди Қубла Корея мәмлекетинен алып келип, өз жумысын жолға қойды.

— Быйылғы жылдың август айынан баслап ыссыханамызға Қубла Корея мәмлекетинен алып келинген помидор туқымларын еге басладық. Ҳәзирги ўақытта помидордың ҳәр бир түп өнимин тийисли тәртипте орналастырып, оларға керекли азықлық затларын берип атырмыз, - дейди кәрхана агрономы Фархад Рейимбаев. — Ҳәр бир түптен кеминде 7-9 килограммға шекем өним алыўды нийетлеп отырмыз. Келешекте мәўсимде 400 тонна помидор жетистирип, жергиликли базарымызды байытыўды, қала берсе, Россия, Қазақстан Республикаларына экспорт етиўди алдымызға мақсет етип қой­ғанбыз...

Ыссыханада жумыс қызғын. Оның шөлкемлестирилиўи нәтийжесинде аймақтағы 20 адамның жумыс пенен тәмийинлениўи — елимиз экономикасының артыўына өзиниң тәсирин тийгизетуғынлығы анық.

 

 

Р.АРЗИЕВ, арнаўлы хабаршымыз.

 Беруний районы.

СҮЎРЕТТЕ: Кәрхана агрономлары Ф.Рейимбаев,

Ш.Базарбаев ҳәм кәрхана исшиси С.Рустамовалар жумыс пайытында.

Автордың түсирген сүўрети.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF