Еркин Қарақалпақстан Вести Каракалпакстана 16:48:08, 18.10.2017
Хош келипсиз! | RSS
Сайт мазмуны

Кириў усылы

ҲӘММЕНИҢ  ОРНЫ ПАХТА  АТЫЗЛАРЫНДА

Тақыятас районындағы «Кенегес» АПЖ аймағындағы пахташылыққа қәнигелестирилген 22 фермер хожалығы ағзалары быйылғы бәҳәрде 738 гектар егислик майданға ғаўашаның «С-9085» сортын еккен еди. Олар ҳәр жылдағыдай быйылғы жылда да ғаўаша тәрбиясы жумысларын агротехникалық қәделерге сай жүргизиўи нәтийжесинде мол зүрәәт жетистириўге еристи.

Ҳәзирги ўақытта аймақтағы хожалықларда жыйын-терими жумыслары жоқары шөлкемлескенлик пенен алып барылмақта. Теримшилер қурамы тийкарынан аўыл халқы менен хожалық ағзаларынан ибарат.

Атап айтқанда, усы аймақтағы «Шержанов Мурат» фермер хожалығы ағзалары быйыл 26 гектар майданға шигит сеўип, бүгинги күни бириншилерден болып  пахта тапсырыў бойынша мәмлекетлик шәртнаманы орынлап шығыўға миясар болды.

— Хожалығымызда пахта терим мапазында күнлик өсимниң жоқары дәрежеге көтерилиўиниң тийкарғы себеби — теримшилерге терген пахталары ушын ти­йисли пуллары ҳәр күни кеште тәрези басында берип барылыўы ҳәм олар ушын атыз басында барлық қолайлы шараятлардың жаратылып берилгенлигиниң нәтийжеси, деп ойлайман. Атызларымызда еле зүрәәт мол. Режеден тысқары тағы 10 тонна пахта тапсырамыз деген нийеттемиз, - дейди хожалық баслығы Мурат Шержанов.

Сондай-ақ, биз хызмет сапарымыз даўамында усы аймақтағы «Исмайыл Бестон» фермер хожалығының атызларында да болып, жыйын-терим мапазына белсене қатнасып атырған теримшилерге ҳармасын айттық.

Аймақтағы ири хожалықлардың бири болған олар быйылғы мапазда «ақ алтын»нан бәлент қырман шашлаў ушын беккем аўызбиршилик пенен мийнет етпекте. Алдынғы теримшилерден Айша Алланова, Кабажан Араздурдыева, Ҳақылжан Мәтназарова менен Қақабай Турдыевлардың ҳәр бири күнине 100-120 килограммнан асырып пахта терип, хошаметлеў сыйлықлары менен сыйлықланып атырғанлығын бизге толып-тасып айтып берди.

— Бүгинги күнге шекем мәмлекетимиз қырманына 80 тоннадан асырып пахта тапсырып, белгиленген режени орынлаўға шамаласып турмыз. Ҳәр күн сайын терим ислерине 100-110 адам қатнаспақта ҳәм олар тәрепинен ҳәр бир күнде 7-8 тоннадан пахта терип алынбақта. Усы жетистирген өнимимиздиң бир де ханасын сепситпей, толық жыйнап алыў ушын ат салысамыз,-дейди усы фермер хожалығының баслығы Алламурат Мәтназаров биз бенен сәўбети барысында.

Ҳақыйқатында да, ҳәзир ҳәммениң орны пахта атызларында, өйткени, зүрәәттиң бир ханасын да сепситпей терип алыў ўазыйпамыз.

С.ОРАЗЫМБЕТОВ, өз хабаршымыз.

Тақыятас районы.

СҮЎРЕТЛЕРДЕ: 1. Фермер М.Шержанов (солда) «Ҳамза» МТП баслығы Ф.Еркебаев пенен пахта атызында. 2. Фермер Алламурат Мәтназаров (ортада) алдын­ғы теримшилер Айша Алланова ҳәм Ҳақылжан Мәтназаровалар менен.

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF