Еркин Қарақалпақстан Вести Каракалпакстана 10:22:49, 18.11.2017
Хош келипсиз! | RSS
Сайт мазмуны

Кириў усылы

ӨЗБЕКИСТАН РЕСПУБЛИКАСЫ МЕКТЕПКЕ  ШЕКЕМГИ БИЛИМЛЕНДИРИЎ МИНИСТРЛИГИНИҢ  ЖУМЫСЫН ШӨЛКЕМЛЕСТИРИЎ ҲАҚҚЫНДА

Өзбекистан Республикасы Президентиниң Қарары

Өзбекистан Республикасы Президентиниң 2017-жыл 30-сентябрьдеги  «Мектепке шекемги билимлендириў системасын басқарыўды түп-тийкарынан жетилистириў илажлары ҳаққында»ғы ПП-5198-санлы Пәрманының орынланыўын тәмийинлеў және мектепке шекемги билимлендириў мәкемелериниң мәмлекетлик ҳәм мәмлекетлик емес тармақларын буннан былай да кеңейтиў, мәмлекетлик ҳәм мәмлекетлик емес мектепке шекемги билимлендириў мәкемелери арасында саламат бәсеки орталығын қәлиплестириў шараятларын жаратыў, мәмлекетлик ҳәм жеке сектор шериклиги шәртлеринде мектепке шекемги билимлендириў мәкемелериниң жаңа усылларын енгизиў, сондай-ақ, Өзбекистан Республикасы Мектепке шекемги билимлендириў министрлигиниң жумысын нәтийжели шөлкемлес­тириўди тәмийинлеў мақсетинде:

  1. Төмендегилер:

Өзбекистан Республикасы Мектепке шекемги билимлендириў министрлигиниң шөлкемлестириўшилик структурасы 1-қосымшаға муўапық;

Өзбекистан Республикасы Мектепке шекемги билимлендириў министрлигиниң басқарма хызметкерлериниң шекленген саны 47 адамнан ибарат болған орайлық аппарат структурасы 2-қосымшаға муўапық;

Қарақалпақстан Республикасы Мектепке шекемги билимлендириў министрлигиниң структурасы 3-қосымшаға муўапық;

Ташкент қаласы мектепке шекемги билимлендириў бас басқармасы ҳәм ўәлаятлардың мектепке шекемги билимлендириў басқармаларының үлги структуралары 4-қосымшаға муўапық;

районлар (қалалар)дың мектепке шекемги билимлендириў бөлимлериниң үлги структурасы 5-қосымшаға муўапық;

Мектепке шекемги билимлендириў мәкемелериниң басшы ҳәм қәнигелерин қайта таярлаў ҳәм маманлығын арттырыў институтының структурасы 6-қосымшаға муўапық тастыйықлансын.

Өзбекистан Республикасы мектепке шекемги билимлендириў министрине, зәрүр жағдайларда, Өзбекистан Республикасы Мектепке шекемги билимлендириў министрлигиниң орайлық аппараты структурасына, Қарақалпақстан Республикасы Мектепке шекемги билимлендириў министрлиги, ўәлаятлардың мектепке шекемги билимлендириў басқармалары және Ташкент қалалық мектепке шекемги билимлендириў бас басқармасы структураларына хызметкерлердиң белгилеп қойылған шекленген улыўма саны шеңберинде өзгерислер киргизиў ҳуқықы берилсин.

  1. Өзбекистан Республикасы мәмлекетлик бюджет қаржылары ҳәм нызам ҳүжжетлеринде қадаған етилмеген басқа да дәреклер Өзбекистан Республикасы Мектепке шекемги билимлендириў минис­трлиги, Қарақалпақстан Республикасы Мектепке шекемги билимлендириў министрлиги, Ташкент қаласы мектепке шекемги билимлендириў бас басқармасы, ўәлаятлардың мектепке шекемги билимлендириў басқармалары, районлар (қалалар)дың мектепке шекемги билимлендириў бөлимлериниң жумысын қаржыландырыў дәреклери етип белгиленсин.
  2. Өзбекистан Республикасы Қаржы министрлиги:

усы қарарды әмелге асырыў қәрежетлери ушын 2017-жылда Өзбекистан Республикасы Мәмлекетлик бюджетиниң «Социаллық сала» ушын нәзерде тутылған параметрлери шеңберинде қаржылар ажыратсын, 2018-жылдан баслап болса, ҳәр жылы зәрүр бюджет қаржыларын ажыратыўды нәзерде тутсын;

усы қарардан келип шығып, Өзбекистан Республикасы Мәмлекетлик бюджетиниң 2017-жылы ушын тастыйықланған қәрежетлер сметасына ти­йисли өзгерислер киргизсин;

Өзбекистан Республикасының ҳәр жылғы тийкарғы макроэкономикалық көрсеткишлери болжаўы ҳәм мәмлекетлик бюджет параметрлерин ислеп шығыўда мектепке шекемги билимлендириў мәкемелеринде балалар тәмийнаты ушын ата-аналар төлеми муғдарларына тийисли өзгерислер киргизиў бойынша усыныс киргизсин;

Өзбекистан Республикасы Мектепке шекемги билимлендириў министрлигиниң орайлық аппаратына 4, Өзбекистан Республикасы Мектепке шекемги билимлендириў министрлигиниң аймақлық бөлимлерине 14 жеңил хызмет автотранспорт қуралын сақлаўға лимит және олардың сатып алыныўы ушын зәрүр болған қаржыларды ажыратсын;

Өзбекистан Республикасы Мектепке шекемги билимлендириў министрлиги ҳәм оның аймақлық бөлимлериниң материаллық-техникалық базасын қәлиплестириў ушын зәрүр болған үскенелер ҳәм мәлимлеме-коммуникация технологияларын сатып алыў ҳәм олардың ҳәкимшилик имаратларын оңлаў ушын Мектепке шекемги билимлендириў минис­трлигине қаржылар ажыратылыўын тәмийинлесин.

  1. Өзбекистан Республикасы Мәлимлеме технологияларын ҳәм коммуникацияларын раўажландырыў министрлиги бир ай мүддетте Өзбекистан Республикасы Мектепке шекемги билимлендириў министрлигиниң жумысына зәрүр болған байланыс қуралларын, соның ишинде, ҳүкиметлик байланыс қуралларын орнатыўды тәмийинлесин.
  2. Өзбекистан Республикасы Мектепке шекемги билимлендириў министрлигиниң орайлық аппараты Ташкент қаласы, Мустақиллик майданы, 5-жайға орналастырылсын.
  3. Өзбекистан Республикасы Меншиклестирилген кәрханаларға көмеклесиў ҳәм бәсекиликти раўажландырыў мәмлекетлик комитети Қарақалпақ­стан Республикасы Министрлер Кеңеси, ўәлаятлар ҳәм Ташкент қаласы ҳәкимликлери менен биргеликте еки ҳәпте мүддетте Қарақалпақстан Республикасы Мектепке шекемги билимлендириў минис­трлиги, Ташкент қалалық мектепке шекемги билимлендириў бас басқармасы, ўәлаятлардың мектепке шекемги билимлендириў бас басқармалары және районлар (қалалар)дың мектепке шекемги билимлендириў бөлимлерин имаратлар ямаса зәрүр болған бөлмелер менен тәмийинлесин.
  4. Өзбекистан Республикасы Мектепке шекемги билимлендириў министрлиги «Мектепке шекемги билимлендириў методикасы» журналын (буннан кейин-Журнал деп аталады) шөлкемлестирсин.

Мектепке шекемги билимлендириў системасына енгизилип атырған алдынғы педагогикалық ҳәм инновациялық технологияларды, тараўда әмелге асырылып атырған мәмлекетлик сиясаттың тийкар­ғы бағдарлары ҳәр тәреплеме сәўлелендирип барыў, тараўға байланыслы қабыл етилген нормативлик-ҳуқықый ҳүжжетлер ҳәм мәмлекетлик бағдарламаларды шолыў ҳәм түсиндириў журналдың тийкар­ғы ўазыйпалары етип белгиленсин.

Журнал редакциясының жумысын қаржыландырыў журналды сатыўдан түсетуғын қаржылар, қәўендерлик қаржылар, нызам ҳүжжетлеринде қадаған етилмеген басқа да қаржы ҳәм дәреклердиң есабынан әмелге асырылатуғыны белгиленсин.

  1. Өзбекистан Республикасы Мектепке шекемги билимлендириў министрлиги еки ай мүддетте:

Денсаўлықты сақлаў министрлиги менен биргеликте мектепке шекемги билимлендириў мәкемелеринде қолланылып атырған аўқатланыў нормаларын раўажланған мәмлекетлердиң тәжирийбесин есапқа алған ҳалда қайта көрип шықсын және 2018-жылдың 1-январынан баслап жаңаланған аўқатланыў нормалары ҳәм республиканың барлық мектепке шекемги билимлендириў мәкемелеринде усы қарардың орынланыўының системалы мониторинги енгизилиўин тәмийинлесин;

Өзбекистан Баспасөз ҳәм хабар агентлиги және Қаржы министрлиги менен биргеликте мектепке шекемги билимлендириў мәкемелери ушын оқыў ҳәм көргизбели қураллар, олардың тәрбияланыўшылары ушын үйретиўши ҳәм раўажландырыўшы китаплар таярланыўы, сондай-ақ, олардың басып шығарылыўы, турақлы түрде қаржыландырылыўы ҳәм мәмлекетлик мектепке шекемги билимлендириў мәкемелерине жеткерип берилиўин нәзерде тутатуғын комплексли илажларды ислеп шықсын ҳәм тастыйықлаў ушын Министрлер Кабинетине киргизсин;

Өзбекистан Республикасы Халық билимлендириў министрлиги менен биргеликте тәлим миллий тиллерде алып барылатуғын мектепке шекемги билимлендириў мәкемелериниң оқыў-тәрбия процесинде инглис ҳәм рус тиллерин, тәлим рус тилинде алып барылатуғын мектепке шекемги билимлендириў мәкемелериниң оқыў-тәрбия процесинде инглис ҳәм өзбек тиллерин үйретиўди енгизиў бо­йынша усыныслар таярласын;

«Өзстандарт» агентлиги менен биргеликте мектепке шекемги билимлендириў мәкемелеринде пайдаланылып атырған, биринши гезекте балалардың интеллектуаллық ҳәм түсиниў қәбилетлерин раўажландырыўға қаратылған ойын ҳәм ойыншықлардың мәмлекетлик стандартларын ислеп шықсын;

«Өзстандарт» агентлиги, Денсаўлықты сақлаў министрлиги ҳәм Қаржы министрлиги менен биргеликте мектепке шекемги билимлендириў мәкемелеринде оқыў-тәрбия процесин шөлкемлестириў ҳәм зәрүр шараятларды жаратыў ушын билимлендириўге қойылатуғын мәмлекетлик талаплар тийкарында ойынлар, ойыншықлар, мебель, үскенелер ҳәм басқа да техникалық қураллар менен мектепке шекемги билимлендириў мәкемелерин үскенелеў нормаларын ислеп шықсын ҳәм тастыйықласын;

Саўда-санаат палатасы менен биргеликте балалар ойынлары ҳәм ойыншықлары бойынша мәмлекетлик буйыртпаны миллий ислеп шығарыўшылар арасында бөлистириў бойынша 2018-2023-жыллар­ға мөлшерленген комплексли илажларды ислеп шықсын.

  1. Өзбекистан Республикасы Мектепке шекемги билимлендириў министрлиги Өзбекистан Республикасы мәмлекетлик статистика комитетиниң статистикалық мәлимлемелер тарқатылыўы мәжбүрий болған шөлкемлериниң дизимине киргизилсин.
  2. Өзбекистан Республикасы Мектепке шекемги билимлендириў министрлиги Бәнтлик ҳәм мийнет қатнасықлары министрлиги менен биргеликте мектепке шекемги билимлендириў системасы хызметкерлериниң социаллық қорғалыўын жетилистириў мақсетинде еки ай мүддетте мектепке шекемги билимлендириў системасы хызметкерлериниң мийнетине ҳақы төлеў ҳәм оларды хошаметлеў тәртиби ҳаққында Өзбекистан Республикасы Министрлер Кабинетине усыныслар киргизсин.
  3. Өзбекистан Республикасы Министрлер Кабинети бир ай мүддетте:

Өзбекистан Республикасы Мектепке шекемги билимлендириў министрлиги ҳаққындағы режени;

Мектепке шекемги билимлендириў мәкемелериниң басшы ҳәм қәнигелерин қайта таярлаў ҳәм олардың маманлығын арттырыў институты ҳаққындағы режени тастыйықласын.

  1. Өзбекистан Республикасы Мектепке шекемги билимлендириў министрлиги бир ай мүддетте:

Ташкент қаласы мектепке шекемги билимлендириў бас басқармасы ҳәм ўәлаятлардың мектепке шекемги билимлендириў басқармалары ҳаққындағы режелерди;

район (қала)лық мектепке шекемги билимлендириў бөлимлери ҳаққындағы үлги режени тасты­йықласын.

  1. Қарақалпақстан Республикасы Министрлер Кеңеси бир ай мүддетте Қарақалпақстан Республикасы Мектепке шекемги билимлендириў минис­трлиги ҳаққындағы режени тастыйықласын.
  2. Өзбекистан Республикасы Мектепке шекемги билимлендириў министрлиги Әдиллик министрлиги және басқа да мәпдар министрликлер ҳәм ведомстволар менен биргеликте еки ай мүддетте нызам ҳүжжетлерине усы қарардан келип шығатуғын өзгерислер менен қосымшалар ҳаққында Министрлер Кабинетине усыныслар киргизсин.
  3. Усы қарардың орынланыўын қадағалаў Өзбекистан Республикасының Бас министри А.Н.Ариповқа, Өзбекистан Республикасы Президентиниң Мәмлекетлик кеңесгөйи А.Н.Юнусходжаевқа ҳәм Өзбекистан Республикасы халық билимлендириў министри У.И.Иноятовқа жүкленсин.

Өзбекистан Республикасы Президенти  Ш.МИРЗИЁЕВ.

Ташкент қаласы, 2017-жыл 30-сентябрь.

 

Өзбекистан Республикасы Президентиниң «Өзбекистан Республикасы  Мектепке шекемги билимлендириў министрлигиниң жумысын  шөлкемлестириў ҳаққында»ғы қарарына

түсиник

Үзликсиз билимлендириў системасының структуралық бөлеги есапланған мектепке шекемги билимлендириў, улыўма орта билимлендириў, мектептен тыс билимлендириў және педагог кадрларды қайта таярлаў ҳәм маманлығын арттырыўды жетилистириў бойынша мақсетли илажлар әмелге асырылды.

Бақлаўлар нәтийжесине бола, Халық билимлендириў министрлигиниң мәмлекетлик басқарыў ҳәм жергиликли ҳәкимият уйымлары менен биргеликтеги жумысы көпшилик жағдайларда мектеп билимлендириўин раўажландырыў менен шекленип қалмақта.

Усы көз-қарастан бүгинги күнде мектепке шекемги билимлендириў мәкемелериниң жумысын түп-тийкарынан жақсылаў, мектепке шекемги жастағы балалардың қамтылыўын арттырыў, алдынғы шет ел тәжирийбесин үйренген ҳалда, ҳәр тәреплеме заманагөй сис­тема жаратыў мәселеси әҳмийетли болып қалмақта.

Балалардың қызығыўшылығын ҳәм умтылысын есап­қа алған ҳалда, оларға мектепке шекемги болған дәўирде ҳәр тәреплеме тыянақлы тәлим-тәрбия бериў, дүнья қарасын кеңейтиў, еркин пикирлеў қәбилетин раўажландырыў, қәлбине ҳәм санасына миллий ҳәм улыўмаинсаныйлық қәдириятларды сиңдирип барыў арқалы оларды ана-Ўатанға сүйиспеншилик руўхында камалға келтириў мәселеси дәўир талабынан артта қалып атыр­ғаны себепли мектепке шекемги билимлендириўдиң басқарыў системасы қайта көрип шығыўды талап етпекте.

Перзентлеримиздиң мектепте қалай оқыўы, жоқары мақсетлер менен камал табыўы көп жағынан мектепке шекемги билимлендириў мәкемелериндеги тәрбияға байланыслы. Илимий бақлаўлар ҳәм изертлеўлер соны көрсетеди, яғный, инсан өмири даўамында алатуғын барлық мәлимлемениң 70 процентин 5 жасқа шекемги дәўирде алатуғыны әйне бала шахсының раўажланыўында мектепке шекемги билимлендириўдиң орны қаншелли әҳмийетли екенлигинен дәрек береди.

Өзбекистан Республикасы Президенти Шавкат Мирзиёев тәрепинен 2017-жыл 16-август күни өткерилген мәжилисте берилген тапсырмалардың орынланыўын сөзсиз тәмийинлеў, мектепке шекемги билимлендириў системасын қурамы жағынан түп-тийкарынан реформалаў, системаның басқарыў структурасын шөлкемлестириў, мектепке шекемги билимлендириў мәкемелерине 5-6 жаслы балаларды 100 процент қамтып алыў илажларын белгилеў мақсетинде Өзбекистан Республикасы Президентиниң «Өзбекистан Республикасы Мектепке шекемги билимлендириў министрлигиниң жумысын шөлкемлестириў ҳаққында»ғы қарары қабыл етилди.

Мектепке шекемги билимлендириў системасын реформалаўдағы жүзеге келген машқалаларды сапластырыў мақсетинде қарарда төмендеги кең көлемли илажларды әмелге асырыў нәзерде тутылған:

мектепке шекемги билимлендириў системасын раўажландырыўға қаратылған бирден-бир мәмлекетлик сиясатты әмелге асырыў, мектепке шекемги билимлендириўди ҳәр тәреплеме раўажландырыў, тәрбияланыўшылардың билимин ҳәм руўхый әдеп-икрамлылық дәрежесин буннан былай да арттырыў;

«Билимлендириў ҳаққында»ғы Өзбекистан Республикасының нызамын мектепке шекемги билимлендириў бөлими бойынша әмелге асырыўға байланыслы нызам ҳүжжетлерин жетилистириў бо­йынша усыныслар ислеп шығыў ҳәм оларға әмел етиўди қадағалаў;

мектепке шекемги билимлендириўге қойылатуғын мәмлекетлик талапларға муўапық мектепке шекемги билимлендириў мәкемелериниң жумысын муўапықластырыў және методикалық басшылық етиў;

оқыў-тәрбия процесине оқытыўдың заманагөй алдынғы түрлерин, жаңа педагогикалық ҳәм мәлимлеме технологияларды, тәлим-тәрбияның нәтийжели түрлери менен усылларын енгизиў;

мектепке шекемги билимлендириў мәкемелеринде жас балаларды миллий ҳәм улыўмаинсаныйлық қәдириятлар, адамгершилик ҳәм руўхыйлығы жоқары етип тәрбиялаў, олардың қәлбине ҳәм санасына ғәрезсизлик, миллий өзликти аңлаў идеяларын буннан былай да терең сиңдириў, «ғалабалық мәденият» көринисиндеги жат идеяларға қарсы иммунитетти беккемлеўге бағдарлан­ған илажларды әмелге асырыў;

мектепке шекемги билимлендириў мәкемелериниң материаллық-техникалық базасын беккемлеў ҳәм олардың жумысының нәтийжелилигин арттырыў;

педагог ҳәм басшы хызметкерлердиң маманлығын арттырыў процесин нәтийжели шөлкемлестириў, бунда заманагөй педагогикалық ҳәм мәлимлеме технология­ларынан, шет еллердиң алдынғы тәжирийбесинен пайдаланыў, билимлендириў мәкемелерин жоқары маманлықтағы, заманагөй билимге ийе кадрлар менен тәми­йинлеў;

мазмуны ҳәм сапасы жағынан заманагөй талап­ларға жуўап беретуғын, алдынғы педагогикалық технологияларды қолланған ҳалда оқыў ҳәм оқыў-методикалық әдебиятлардың жаңа әўладын жаратыў ҳәм басып шығарылыўын шөлкемлестириў;

мектепке шекемги билимлендириў мәкемелеринде мәмлекетлик талаплар орынланыўының системалы мониторингин алып барыў;

халықаралық байланысларды кеңейтиў және беккемлеў, елимиздиң билимлендириў саласында ерискен жетискенликлерин конференциялар, көргизбелер ҳәм басқа да илажлар арқалы халықаралық дәрежеде кеңнен үгит-нәсиятлаў, халық билимлендириўи системасына шет ел инвестицияларын ҳәм грантларын тартыў;

мәмлекетлик емес мектепке шекемги билимлендириў мәкемелериниң тармағын раўажландырыў, олардың арасында саламат бәсекини қәлиплестириў және билимлендириў хызметлериниң түрлерин көбейтиў.

Қарар менен белгиленген ўазыйпалардың әмелге асырылыўы нәтийжесинде:

мектепке шекемги билимлендириў системасы ҳәм оны раўажландырыў ушын айрықша итибар қаратылып, ең алдынғы шет ел тәжирийбелери тийкарында ҳәр тәреплеме заманагөй система жаратылады;

мектепке шекемги билимлендириў системасын раўажландырыўға қаратылған бирден-бир мәмлекетлик сиясатты әмелге асырыў арқалы мектепке шекемги билимлендириў ҳәр тәреплеме раўажландырылып, тәрбия­ланыўшылардың билими ҳәм руўхый әдеп-икрамлылық дәрежеси және де арттырылады;

оқыў-тәрбия процесине оқытыўдың заманагөй алдынғы түрлерин, жаңа педагогикалық ҳәм мәлимлеме технологиялары, тәлим-тәрбияның нәтийжели түрлери менен усыллары енгизиледи;

мектепке шекемги билимлендириў системасын раўажландырыўға қаратылған бирден-бир мәмлекетлик сия­сатты әмелге асырыў арқалы мектепке шекемги билимлендириў ҳәр тәреплеме раўажландырылып, тәрбия­ланыўшылардың билими ҳәм руўхый-әдеп-икрамлылық дәрежеси буннан былай да арттырылады;

оқыў-тәрбия процесине оқытыўдың заманагөй алдынғы түрлери, жаңа педагогикалық ҳәм мәлимлеме технологиялары, тәлим-тәрбияның нәтийжели форма ҳәм усыллары енгизиледи;

балаларды мектепке шекем таярлаўдың альтернатив түри болған қысқа мүддетли топарлар тармағы кеңейтиледи;

мектепке шекемги билимлендириў мәкемелериниң материаллық-техникалық базасы жақсыланады;

мәмлекетлик емес мектепке шекемги билимлендириў мәкемелериниң тармағы раўажландырылып, олардың арасында саламат бәсекини қәлиплестириў арқалы билимлендириў хызметлериниң түрлери көбейтиледи;

бос турған ҳәм пайдаланылмай атырған мәмлекетлик имаратлар менен объектлерден нәтийжели пайдаланыўға ерисиледи;

5-6 жас балаларды мектепке шекемги билимлендириўге 100 процент қамтып алыў имканияты жаратылады.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF