Еркин Қарақалпақстан Вести Каракалпакстана 10:26:13, 18.11.2017
Хош келипсиз! | RSS
Сайт мазмуны

Кириў усылы

ТУҢҒЫШ БИЛИМ  ДӘРГАЙЫМ — АНА-МЕКТЕБИМ

Ҳәр биримиз жолымыз түсип билим алған мектебимиздиң жанынан өтер екенбиз, жүреклеримиз шәўкилдеп, жүзимизди қандайдур қуўаныш сезимлери бийлейди. Көшелерди толтырып оқыўға асығып бара­тырған балаларды көрип, мектептен узақласқанымыз­ға неше жыллар болса да қәлбимизде сағыныш, балалық туйғылары жылт етеди. 

Ойлап қарасақ, сен неше жасты жасасаң да, бахтың өрлеп, шыңларға шықсаң да өмириңниң ойлы-бәлентликлерине тийкар жарат­қан баўырман мектебиңди умытыўың, оның бүгини менен қызықпаўың, абырайына шерик болып, табысларына қуўанбаўың мүмкин емес. Себеби, ҳәр биримиз ушын мектеп — бул билим ошағы болыў менен бирге, балалығымыздағы небир шоқлықларымызды көтерген мәр­гиясы басым дәргай. Солай екен, мектеп ата-анаңдай теберик, устазларыңдай әзиз.

Кегейли районының «Жүзимбағ» аўыл пуқаралар жыйыны аймағындағы 23-санлы мектептиң ирге тасы қаланғанына сексен жылдың майданы болыпты. Бүгинлиги бул мектеп питкериўшилериниң басым көпшилиги халық хожалығының түрли тараўларында белсене хызмет етип, кең жәмийетшилик арасында өз орны ҳәм абырайына ийе, белгили азаматлар болып жетилисти. Қуўанарлысы, «жүзден жүйрик, мыңнан тулпар» дегениндей, усы қутлы дәргайда билим алған Қосберген Муўсаев, Айназар Қунназаров, Узақберген Тилеўмуратов ҳәм Қәдирбай Бектурдиевлерди мектеп жәмәәти оқыўшыларға өрнек етип, ҳәмийше мақтаныш пенен тилге алады. Булардан басқа да түрли салада билими, саўаты менен абырай-мәртебеге ерискен Р.Бердиев, Ж.Бердимуратов, О.Ахметов, Е.Бердимуратов, Ж.Мәмбетниязова, Н.Бекимбетов, К.Реймов, шайыр Б.Сейтаев ҳәм басқаларды аймақ турғынлары, бирге оқыған қәдирданлары ҳәрдайым мақтаныш етеди.

Жақында бул дәргайда қутлы сәне, яғный, мектепти буннан жетпис жыл бурын питкергенлердиң дослары, ана мектеби, кейинги әўлад пенен ушырасыў кешеси болып өтти. Кешеде шөлкемлестириўшилер атынан мийнет нураныйы Узақберген Тилеўмуратов сөзге шығып, жыйналғанларға өзиниң басып өткен өмир жолы, билим берген устазлары, ой-өрис ҳәм сана сезимди кеңейтип тәрбиялайтуғын, үлкен өмирге жоллама беретуғын ана- мектеби ҳаққында толып-тасып айтты.

Сондай-ақ, кешеде узақ жыллар даўамында елимиздиң гүллеп-жаснаўы ушын пидайы хызмет еткен, ал, бүгинлиги болса ғаррылық гәштин сүрип атырған нураный Ө.Мәмбеткәримов, шайыр Х.Дәўлетназаров ҳәм тарийхшы-журналист Ж.Мояновлар сөзге шығып, келешек әўладлар ушын бийбаҳа пикирлерин билдирди.

Солай етип, шөлкем­лестириўшилер тәрепинен мектеп директоры Бағдагүл Шынбергеноваға педагогикалық жәмәәт ҳәм ертеңги келешегимиз болған жаслар ушын мақтаныш ҳәм үлги болатуғын, усы ошақтан пәрўаз алған төрт минис­трдиң фото сүўрети тапсырылды.

— Мектеп — бул билим ошағы. Ҳәр бир инсан дәслепки тәлим-тәрбияны усы жерден алады. Онда оқымаған, устаздан тәлим алмаған инсанның өзи жоқ. Ҳәр биримиз туңғыш қәдем таслаған мектебимизди, устазларымызды ҳеш қашан умытпаймыз. Қайтама барлық ўақытта толып-тасып айтып жүремиз. Мине, қәдирдан мектебиме 70 жылдан соң қайта оралып турман. Ушырасыў кешеси болады деген хабарды еситкенимде қуўанышым ишиме сыймады. Мектепке келгенимде балалыққа қайтқандай болдым. Усы қәсийетли дәргайда досларымыз бенен өткерген қызықлы балалық демлер, класстағы түрли жағымлы, жағымсыз ўақыялар бәри-бәри  қыялымнан дизбеклесип өтти. Кешени шөлкемлестирген азаматларға рахметим шексиз дейди, — мийнет ветераны Исмайыл Бектемиров.

 

С.ТУРДЫБЕКОВА. 

 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF