Еркин Қарақалпақстан Вести Каракалпакстана 10:23:40, 18.11.2017
Хош келипсиз! | RSS
Сайт мазмуны

Кириў усылы

ИТИБАР, МЕҲИР БИРИНШИ  ДӘРЕЖЕЛИ ТЕЗ ЖӘРДЕМ

Соңғы жыллары мәмлекетимизде медицина тараўын еле де жетилистириў, халықты дәри-дәрмақ пенен тәмийинлеў, сапалы тез жәрдем көрсетиўге күшли итибар қаратылмақта. Бул бағдарда қабыл етилген қарар, пәрманлар биринши нәўбетте халқымызға шексиз қуўаныш бағышлап, теңсиз байлық саналған саламатлықты сақлаўда айрықша әҳмийетке ийе болмақта.

Инсан өмири даўамында шыпакер жәрдемине бир мәрте болса да мүтәжлик сезеди, бул кәсип ийелери күнди-күн, түнди-түн демей, халық хызметине тақ турады, ўақыт пенен санаспайды, қәтеге жол қойыўға да ҳақысы жоқ. Тийкарғысы, олардың берген антына садық болыўында.

Қыс күнлери еди. Көзим аўырып емлеўханаға бардым. Сол гезлери көзлерим тек жасланатуғын еди. Барлық көриктен өткенимнен соң, көзиңниң көриў қәбилети жақсы, тек азғантай тамшы дәри қуйып жүр деп, мәсләҳәт берди, анық диагноз қоя алмады. Деген менен күннен-күнге көзим қызарып, исиги үлкейип бара берди. 20 күн қатнап, укол алсам да тәсири болған жоқ. Көз алдым қараңғыласып, ҳеш нәрсени көрмей қалдым. Бул өмирде көзиң көрмесликтен аўыр дәрт жоқ екенлигин аңладым. Бирден-бир үмитим ақ халатлы шыпакерлерден еди. Сонлықтан үмит етип, қайтадан емлеўханаға жол алдым. Айырым медицина хызметкерлериниң қопал мүнәсибети, бийпәрўалығынан ренжигеним де рас. Итибар, меҳир наўқасқа биринши дәрежели тез жәрдем саналады. «Келиң, не хызмет, қай жериңиз аўырды, ҳәзир көрмегендей болып кетесиз» киби жубаныш сөзлерди күтеди екенсең... Шыпакерлердиң адамларға қарым-қатнас мәденияты мәселесин еле де жетилистириў кереклиги ҳақыйқат.

Бирақ, жақсы адамлар, өз кәсибиниң маманлары да бар арамызда. Мыңға ибрат боларлықтай шыпакерлер себепли, денсаўлығым қайта тикленди. «Жақсының жақсысын айт, кеўли тассын» дегениндей бүгин өз миннетдаршылығымды билдирмекшимен. Республикалық көз кеселликлери емлеўханасының әжайып шыпакерлеринен бири Света Айымбетова өзи жас болса да мыңға бас болып, көплеп наўқаслардың өмирге деген сүйиспеншилигин арттырып, аяққа турыўына жәрдем етпекте. Сондай-ақ, Дильфуза, Алмагүл, Эльза, Гүлпаршын, Айбануларға да өз миннетдаршылығымды билдирип, машақатлы ҳәм жуўапкершиликли кәсибинде тасқын табыслар тилеймен.

Жупаргүл ҚУЎАТБАЕВА.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF