Еркин Қарақалпақстан Вести Каракалпакстана 10:25:47, 18.11.2017
Хош келипсиз! | RSS
Сайт мазмуны

Кириў усылы

ВАЛЮТА СИЯСАТЫН ЛИБЕРАЛЛАСТЫРЫЎ МАҚСЕТИНДЕ

Бәршеге мәлим, 2017-жыл 2-сентябрьде Өзбекистан Республикасы Президентиниң «Валюта сиясатын либералластырыў бо­йынша биринши гезектеги илажлар ҳаққында»ғы Пәрманы қабыл етилген еди. Бул пәрман ең алды менен әмелдеги валютаны тәртипке салыў сис­темасын түпкиликли реформалаў, валюта сиясатын либералластырыў, барлық исбилерменлик субъектлерине сыртқы саўда хызметин әмелге асырыўда тең шараятлар жаратыўға қаратылған.

Оның қабыл етилиўине мәмлекетимиздиң экспорт потенциалын арттырыў, исбилерменлик ҳәм инвестиция орталығын жақсылаў, сырт ел инвестицияларын тартыўға тос­қынлық етип атырған бир қатар машқалалар ҳәм кемшиликлердиң бар екенлиги тийкарғы себеп болды.

Атап өтилген пәрман менен юридикалық ҳәм физикалық тәреплер тәрепинен сырт ел валютасы ҳәрекеттеги халықаралық валюта операцияларын әмелге асырыў ушын банклерде еркин сатып алыныўы ҳәм сатылыўы кепиллестириледи.

Соны атап өтиў керек, ҳәрекеттеги халықаралық опера­циялар бойынша төлемлерди банклердеги есап бетлер арқалы әмелге асырыўда хожалық жүргизиўши субъектлер тәрепинен базар курсында сырт ел валютасын сатып алыў имканиятының жаратылыўы «жасырын» экономиканың қысқарыўына ҳәм пул қаржыларын банк айланысына тартыўға хызмет етеди.

Сондай-ақ, халық ҳәм исбилерменлер арасында усы пәрманның мазмун-әҳмийетин түсиндириў бағдарында үгит-нәсият ислери күшейттириледи. Пуқаралар нызамлы тәртипте белгиленген мағлыўматнама тийкарында банктен зәрүр валюта қаржыларын сатып алыў ҳәм сатыўды даўам  етсе, «қара базар»ға талап жоғалады. Буннан тысқары, Өзбекистан Республикасы Бас прокуратурасы жанындағы Салық, валютаға байланыслы жынаятларға ҳәм жынайый дәраматларды легалластырыўға қарсы гүресиў департаментиниң Қарақалпақстан Республикасы басқармасы хызметкерлери тәрепинен нызамсыз сырт ел валютасын алыў ямаса өткериў менен шуғылланыўшыларды анықлаў бойынша оператив-қыдырыў жумыслары алып барылмақта.

Басқарма ҳәм оның аймақлық бөлимлери тәрепинен валюта қаржыларын нызамға қайшы рәўиште айланысқа киргизиў, валюта түсимин жасырыў ҳәм валюта тараўындағы басқа да нызам бузыўшылықларға қарсы гүресиўге қаратыл­ған кең көлемли оператив илажлар әмелге асырылмақта.

Быйылғы жылдың өткен дәўири ишинде өткерилген оператив илажлар нәтийжесинде валютаға байланыслы 84 ҳуқықбузарлық анықланып, 6 жынаят иси қозғатылды ҳәм 78 ҳәкимшилик ҳуқықбузарлыққа байланыслы ислер киргизилди. Ҳуқықбузарлардан 96 712 АҚШ доллары, 3 595 800 Қазақстан теңгеси, 161 070 Россия рубли, 300 евро ҳәм 290, 7 миллион Өзбекистан сумы алып қойылды.

Атап айтқанда, Департамент­тиң Төрткүл районы бөлиминде оператив мағлыўматлар тийкарында өткерилген илажлар нәтийжесинде пуқаралар Г.Полатова ҳәм А.Султановалар өз-ара тил бириктирип, нызамға қайшы рәўиште турақлы түрде сырт ел валюталарын нызамсыз сатыў менен шуғылланып келип, пуқара Ш.Хожамуратовадан 50 АҚШ долларын 400 000 сумға сатып алып атырған ўақтында усланып, олардан жәми 4240 АҚШ доллары, 3 500 Россия рубли, 5 000 Қазақстан теңгеси, 10 Қытай юаны ҳәм 21 750 000 Өзбекистан сумы айғақлы дәлил сыпатында алын­ған.

Бул ҳәдийсе бойынша Өзбекистан Республикасы Жынаят кодексиниң 177-статьясы 2-бөлими «в» бәнти менен жынаят иси қозғатылды ҳәм суд тәрепинен тийисли жаза тайынланды.

Бундай бағдардағы жумыслар басқарма хызметкерлери тәрепинен алдағы ўақытлары да алып барыла береди.

 

А.АКБАРОВ,

Өзбекистан Республикасы Бас прокуратурасы жанындағы Салық, валютаға байланыслы жынаятларға ҳәм жынайый дәраматларды легалластырыўға қарсы гүресиў департаментиниң Қарақалпақстан Республикасы басқармасының бөлим аға инспекторы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF