Еркин Қарақалпақстан Вести Каракалпакстана 10:22:56, 18.11.2017
Хош келипсиз! | RSS
Сайт мазмуны

Кириў усылы

КӘСИПЛИК  ШЕБЕРЛИКТИ АРТТЫРЫЎҒА  БАҒЫШЛАНДЫ

Бүгинги күнде елимиздиң социал-экономикалық ҳәм сиясий турмысындағы өзгерислерди ғалаба хабар қуралларысыз көз алдымыз­ға келтириў қыйын. Әсиресе, 2017-2021-жылларда Өзбекистан Республикасын раўажландырыўдың тийкар­ғы бес бағдары бойынша Ҳәрекетлер стратегиясында белгиленген бағдарларды кең халық қатламына жеткерип бериўде ғалаба хабар қуралларының тутқан орны айрықша болып табылады.

2017-жыл 10-августта Өзбекистан Республикасы Президенти Ш.Мирзиёев тәрепинен қабыл етилген «Өзбекистан Журналистлери дөретиўшилик аўқамының жумысын буннан былай да жетилистириў илажлары ҳаққында»ғы ҳәм 17-августтағы «Өзбекистан баспасөз ҳәм хабар агентлигиниң жумысын буннан былай да жетилистириў ҳаққында»ғы қарарлары тараўды еле де раўажландырыўда жаңа басқышты баслап берди.

Өзбекистан бийғәрез баспа ғалаба хабар қураллары ҳәм мәлимлеме агентликлерин қоллап-қуўатлаў ҳәм раўажландырыў жәмийетлик фонды тәрепинен усы жыл 20-22-сентябрь күнлери Ташкент қаласында «Миллий ғалаба хабар қуралларының сапа ҳәм тәсиршеңлигин арттырыўға байланыслы тийкарғы ўазыйпалар» атамасында семинар болып өтти. 

Оған Өзбекистан Баспасөз ҳәм хабар агентлиги, Өзбекистан Журналистлери дөретиўшилик аўқамы, мәмлекетлик уйымлардың ўәкиллери, Өзбекистан Миллий ҳәм Жәҳән тиллери университетлериниң профессор-оқытыўшылары, сондай-ақ, Қарақалпақстан Республикасы, ўәлаятлар ҳәм Ташкент қаласында жумыс алып барып атырған баспасөз ҳәм электрон ғалаба ғабар қуралларының хызметкерлери қатнасты.

Илажды Өзбекистан бийғәрез баспа ғалаба хабар қураллары ҳәм мәлимлеме агентликлерин қоллап-қуўатлаў ҳәм раўажландырыў жәмийетлик фонды директоры ўазыйпасын атқарыўшы Лутфулла Сувонов басқарып барды.

Атап өтилгениндей, Өзбекистан Республикасын буннан былай да раўажландырыў бойынша Ҳәрекетлер стратегиясында белгиленген бағдарларды жарытыўда мәлимлеме-сиясий технологияларды қолланыў, еркин ҳәм бийғәрез ғалаба хабар қуралларын раўажландырыў барысында әмелге асырылып атырған кең көлемли реформалар, мәмлекет имиджин сәўлелендириўде ғалаба хабар қуралларының тутқан орны, сондай-ақ, социал тармақларда жәрияланған мәлимлемелердиң кең жәмийетшиликке тәсири  ҳаққында қәнигелер пикир-усынысларын билдирди.

Үш күн даўам еткен семинарда Өзбекистан Миллий ҳәм Жәҳән тиллери университетлериниң профессор-оқытыўшылары интер­актив усылда журналистлердиң кәсиплик билим ҳәм тәжирийбелерин байытып барды.

Әлбетте, бундай илажлардың шөлкемлестирилиўи биз журналистлердиң кәсиплик шеберлигимизди арттырыўда әҳмийетли болып табылады.

 А.ОРАЗОВ,  арнаўлы хабаршымыз.

Нөкис-Ташкент-Нөкис.

СҮЎРЕТЛЕРДЕ: семинардан көринислер.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF