Еркин Қарақалпақстан Вести Каракалпакстана 10:25:56, 18.11.2017
Хош келипсиз! | RSS
Сайт мазмуны

Кириў усылы

ИСБИЛЕРМЕНЛИКТИ  ШӨЛКЕМЛЕСТИРИЎ УШЫН ДИЗИМНЕН ӨТКЕРИЎ ТӘРТИПЛЕРИ

Киши бизнес ҳәм жеке исбилерменликти жедел раўажландырыў ушын қолайлы шараят жаратыў, бизнес орталығын жақсылаўда мәмлекетимиз экономикасына жергиликли ҳәм де сырт ел инвестицияларын және де кең тартыў, жаңа жумыс орынларын жаратыў, нәтийжеде халқымыз пәраўанлығын асырыўды тәмийинлеў бағдарында исбилерменлик субъектлери менен байланыслы барлық салаларда нызам ҳүжжетлерине өзгерислер киргизилип барылмақта.

Өзбекистан Республикасы Президентиниң 2015-жыл 15-май күнги «Жеке меншик, киши бизнес ҳәм жеке исбилерменликтиң исенимли қорғалыўын тәмийинлеў, оларды жедел раўажландырыў жолындағы тосқынлықларды сапластырыў ис-илажлары ҳаққында»ғы Пәрманы ҳәм 2015-жыл 28-сентябрьдеги «Бир айна» принципи тийкарында исбилерменлик субъектлерине мәмлекетлик хызметлерин көрсетиў тәртибин және де жеделлестириў ис-илажлары ҳаққында»ғы қарарына тийкарланып, Нөкис қаласы ҳәкимлиги жанындағы Исбилерменлик субъектлерин дизимге алыў ҳәм есапқа қойыў инспекциясы негизинде, «Исбилерменлик субъектлерине «Бир айна» принципи тийкарында мәмлекетлик хызметлерин көрсетиўши орай шөлкемлестирилди ҳәм 21 түрдеги мәмлекетлик хызметлерин сапалы ҳәм өз ўактында көрсетип келмекте.

Буған қосымша, Өзбекистан Республикасы Президентиниң 2017-жыл 1-февраль күнги «Исбилерменлик субъектлерине мәмлекетлик хызметлерди көрсетиў механизмлерин жеделлестириўге байланыслы ис-илажлар ҳаққында»ғы қарары Исбилерменлик субъектлерине мәмлекетлик хызметлер көрсетиўдиң сапасы ҳәм жәриялылығын, олардан пайдаланыў имканиятларын және де асырыў, исбилерменлердиң ҳуқық ҳәм нызамлы мәплерин қорғаў кепиллигин күшейттириў ҳәм де орынларда халық пенен тиккелей пикирлесиў нәтийжелилигин тәмийинлеў мақсетинде қабыл етилди. Сондай-ақ, Өзбекистан Республикасы Министрлер Кабинетиниң «Исбилерменлик субъектлерин мәмлекетлик дизимнен өткериў тәртиби ҳаққында»ғы 2017-жыл 9-февральдағы қарарына тийкар исбилерменлик субъектлерин мәмлекетлик дизимнен өткериў ҳәм есапқа қойыў автоматластырылған электрон системасы арқалы мәмлекетлик дизимнен өткериў тәртиби жәрия етилди.

Усы қарар талапларына муўапық 2017-жыл 1-апрель күнинен баслап исбилерменлик субъектлерин (bo.birdarcha.uz) автоматластырылған электрон системасы арқалы «Бир айна» орайлары тәрепинен мәмлекетлик дизимнен өткерилмекте ҳәм бурын дизимнен өткериў ўақты еки жумыс күнин талап еткен болса, ал, ҳәзирги күнде отыз минут ишинде әмелге асырылады.

Жеке исбилермен яки юридикалық кәрхана шөлкемлестирмекши болған пуқаралар өзлери жасап турған аймақта жайлас­қан Әдиллик министрлигине қараслы Исбилерменлик субъектлерине «Бир айна» принципи тийкарында мәмлекетлик хызметлерди көрсетиў орайына арза менен мүрәжат еткен ҳалда мәмлекетлик дизимнен өткериледи ҳәм мәмлекетлик дизимнен өтиўде ең кем ис ҳақының бир есеси муғдарында мәмлекетлик бажы пулы төленеди.

Бул қарардың қолайлы тәреплеринен бири — мәмлекетлик дизимнен өтпекши болған пуқаралар «Бир айна» орайларына келместен өзлериниң үйлеринде Интернет тармағы арқалы, яғный, (fo.birdarcha.uz) автоматластырылған электрон системасы арқалы мәмлекетлик дизимнен өтиў тәртибинде жәрия етилди. Бул тәртипте мәмлекетлик дизимнен өтиўде өзлери жасап турған аймақта жайласқан мәмлекетлик салық уйымынан электрон санлы имза талап етиледи ҳәм мәмлекетлик дизимнен өтиўде ең кем ис ҳақының ярым есеси муғдарында мәмлекетлик бажы пулы төленеди.

Зайырбай

ДЖУМАБАЕВ,

Нөкис қаласы Исбилерменлик субъектлерине «Бир айна» принципи

тийкарында мәмлекетлик хызметлерди көрсетиў орайының жетекши қәнигеси.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF