Еркин Қарақалпақстан Вести Каракалпакстана 10:20:20, 18.11.2017
Хош келипсиз! | RSS
Сайт мазмуны

Кириў усылы

ҲАДАЛ  ИСЛЕГЕННИҢ  ЖҮЗИ  ЖАРҚЫН

Елимиз аўыл хожалығында быйылғы жыл ҳәр жылдағыдан да көре басқаша көзқарас ҳәм ҳәрекетшеңлик сезилмекте. Ҳәзирги күнлери пахта жыйын-терим мәўсимине айрықша пәт ендирип, дийқанларымыз тәрепинен жетистирилген зүрәәттиң бир де ханасын зая етпестен қысқа мүддетлерде терип, ел қырманына тапсырыўға ат салысып атыр­ған пидайы азаматлардың ислеп атырған хызметлерине қанша рахмет айтсаң да арзыйды.

Бүгинги күнге келип республикамыздың бир қатар алдынғы фермерлери өзлериниң мәмлекетлик шәртнамалы режелерин артығы менен орынлап шығып, миннетлеме есабынан пахта тапсырып келмекте. Солардың бири Шымбай районындағы «Сейтназар ата» фермер хожалығы баслығы Зәрипбай Сейтназаров.

Ҳәр жылы мәмлекетке ғәлле ҳәм пахта тапсырыў бойынша белгиленген шәртнама режелерин артығы менен орынлап кия­тырған хожалық ағзалары бы­йылғы жылы да гүзги жыйын-терим мәўсимине пуқта таярлықлар көрди. Атап айтқанда, атыз басында аўыл-аймақтан өзлерине жәрдемге келетуғын теримшилер ушын қолайлы мийнет шараятын жаратып, оларға ҳәр күни кеште ҳәр бир терилген пахтаның бир килограммы ушын 400-450 сумнан, буннан тысқары, 50, 70 ҳәм 100 килограммнан асырып пахта терген шәпик қоллы теримшилерди ақшалай сыйлықлап барды. Бул, әлбетте, терим жумысларында өзиниң унамлы нәтийжесин берип, хожалықтың белгиленген режени қысқа мүддетлер ишинде орынлаўына себеп болды.

— Ҳәрдайым «ҳақыйқаттың жалаўы бийик» деп бир шайырымыздың жазғанындай, жерди де, адамды да алдамай, ҳақыйқат ҳәм ҳадал ислесең, ел алдында бәрҳа жүзиң жарқын болады. Атызларымызда еле зүрәәт мол. Алдағы ўақытлары миннетлемени де артығы менен орынлап шығыў мүмкиншилигимиз бар. Ең тийкарғысы, аўыл адамларында пахта теримине деген қызығыўшылық жоқары,-дейди Зәрипбай ҳармасынға барғанымызда.

Шынында да, инсанның ар-намысы, ҳуқық ҳәм еркинликлери — жоқары қәдирият деп есапланатуғын бизиң елимизде Президентимиз Ш.Мирзиёев тәрепинен алып барылып атырған реформалар бүгинги күни өзиниң унамлы нәтийжесин көрсетпекте. Буның айқын мысалын биз сөз етип атыр­ған фермер хожалықтың жумысларында көргендей болдық.

Ә.ОРАЗОВ, арнаўлы  хабаршымыз.

Шымбай районы.  

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF