Еркин Қарақалпақстан Вести Каракалпакстана 19:17:08, 18.11.2017
Хош келипсиз! | RSS
Сайт мазмуны

Кириў усылы

ҒАМҚОР  ЕЛДИҢ  БАХЫТЛЫ  БАЛАЛАРЫ

Келешегимиз болған перзентлеримиздиң саў-саламат ҳәм бәркамал өсиўи ҳәр бир ата-анаға шадлық, қуўаныш сезимлерин саўға етеди. Өмиримиздиң гүли, келешегимиздиң даўамшысы болған перзентлеримиздиң күлкисин, ығбал-бахтын дүньяда ҳеш нәрсеге алмастырып болмайды.

Биз, перзентлери социаллық жақтан қорғалған мәмлекетте жасап атырғанымыздан миннетдармыз. Әсиресе, халық билимлендириў тараўында ғәрезсизлик жылларында мисли көрилмеген жаңалықлар жүз бергенлигин дүнья кең жәми­йетшиликтиң тән алғаны ҳақыйқат. Атап айтқанда, Өзбекистан Республикасы Президентиниң 2017-жыл 12-сентябрь күнги «Мектепке шекемги билимлендириў системасын түп-тийкарынан жетилистириў илажлары ҳаққында»ғы қарары тараўда билимлендириўди бас­қарыўдың заманагөй механизмлерин енгизиў, тәрбия ҳәм оқыў процесин жетилис­тириў, мектепке шекемги билимлендириў мәкемелериниң инфраструктурасын ҳәм материаллық-техникалық жақтан тәмийинлениўин жақсылаў бойынша комплексли илажларды әмелге асырыўды көзде тутады. Сондай-ақ, миллий мәдений, тарийхый қәдириятларды сәўлелендиретуғын ҳәм балалықтан китап оқыўға қызығыўшылық оятатуғын оқыў-методикалық, дидактикалық мате­риалларды таярлаў ҳәм енгизиў жумыслары да заман талапларына муўапықластырылыўы келешегимиз ийе­лерине көрсетилген ғамқорлықтың көриниси.

Бизиң 1-санлы республикалық арнаўлы мектепке шекемги билимлендириў мәкемеси Төрткүл районы орайында жайласқан. Бақшамызда бүгинги күнде 13 топарда 320 балаға тәжирийбели 19 тәрбияшы тәлим-тәрбия берип келмекте. Негизинен бақшамыз сөйлеў ҳәм еситиў, көриў, ақылый раўажланыўында кемиси бар балаларды тәрбиялаўға қәнигелескен. Сонлықтан да, кеўиллери нәзик тәрбияланыўшыларымыздың қәлбине жол табыўда Қарақалпақстан Республикасы халық билимлендириў ағлалары И.Шапошникова, М.Серикбаева, А.Сейтимбетова ҳәм З.Аминовалар пидайылық көрсетпекте. Бизде инглис тилин үйретиўде Ф.Ақназарова, рус тилинен Т.Черновалар тәрбияланыўшыларымызға сабақларын қызықлы етип өтиўге тырысады.

Бақшамызда спорттың каратэ, көркем гимнастика дөгерегинде қызығыўшылар шуғылланыў имканиятына ийе. Ал, Б.Махамадалиев компьютерден пайдаланыў сырларын жалықпастан үйретип киятыр. Ҳәр жылы дәстүрий байрамланып киятырған 1-октябрь — Муғаллимлер ҳәм устазлар күни мәмлекетимизде салтанатлы түрде белгилениўи билимлендириў тараўының пида­йыларына көрсетилген ҳүрметтиң белгиси. Солай екен, биз келешек әўладларымыздың балалықтың бахытлы күнлерин ядтан шықпастай етип өткериўине ҳәм мектеп партасына ҳәриплерди танып, жазыў ҳәм санларды үйрениў арқалы таяр етип тәрбиялаўға ҳәрекет етемиз.

О.ХОДЖАНИЯЗОВА,

Төрткүл районындағы 1-санлы Республикалық арнаўлы мектепке шекемги билимлендириў мәкемеси баслығы, Қарақалпақстан Республикасына мийнети сиңген халық билимлендириў хызметкери. 

 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF