Еркин Қарақалпақстан Вести Каракалпакстана 22:20:01, 22.09.2019
Хош келипсиз! | RSS
Сайт мазмуны

Кириў усылы

СПОРТ МАЙДАНЫНДА ҮЙ БИЙКЕЛЕРИ

Соңғы жылларда елимизде ҳаял-қызлар арасында дене тәрбиясы ҳәм спортты ғалаба ен жайдырыў ҳәм раўажландырыў  мақсетинде ҳәр қыйлы дәрежедеги жарыслар, спорт фестивальлары шөлкемлестирилип келинбекте.

Жақында 2017-2021-жылларда  Өзбекистан  Республикасын  раўажландырыўдың бес  тийкарғы бағдары  бойынша  Ҳәрекетлер  стратегиясында  белгиленген  ўазыйпаларды орынлаў мақсетинде ҳаял-қызлардың жәмийетлик-сиясий тур­мыс­тағы статусын  күшейтиў мақсетинде Нөкис  қаласында  республикалық  ҳаял-қызлар  комитети  тәрепинен  «Саламат  ана - саламат бала» сүрени  астында  Ҳаял-қызлар  спорт  фестивалының  республикалық  басқышы  болып  өтти. Оған  республикамыздың барлық  қала ҳәм  районларынан 25-45-жас аралығындағы үй бийкелери қатнасты.

Командалар спорттың волейбол, жүзиў, стол тенниси, шахмат, гимнастика, дартс, жеңил атлетика түрлери бойынша өз-ара күш сынасты.

— Бүгинги күнде ҳаял-қызларымыз спорттың дерлик барлық түрлери менен шуғылланып, халықаралық ареналарда елимиз байрағын бәлент желбиретип келмекте, - дейди жарыс қатнасыўшысы, қараөзекли Гүлзийра Сыдықова. — Усындай жарысларға қатнасыў арқалы ҳаял-қызларымыз тек дене тәрбиясы ҳәм спорттың ғалабалығына ерисиўге ғана емес, соның менен бирге, саламат турмыс тәризин қәлиплестириўге де үлес қосады деп ойлайман. Себеби, турмыста тасты­йықланғанындай, саламат анадан саламат перзентлер туўылады...

Кескин гүреслерге бай тәризде өткен жарыс жуўмағында улыўма командалық есапта барлық қарсыласларынан  басым  келген  Нөкис  қаласы  биринши, Хожели районы екинши, Шымбай  районы болса  үшинши  орынларды алыўға миясар  болды. Жарыс жуўмағында жеңимпазлар ҳәм сыйлы орын ийелери шөлкемлестириўшилер тәрепинен диплом ҳәм қымбат баҳалы саўғалар  менен  сыйлықланды.

З.ЖАҚСЫМУРАТОВА.

СҮЎРЕТЛЕРДЕ: фестивальдан көринислер.

М.ҲАБИБУЛЛАЕВтың түсирген сүўретлери.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF