Еркин Қарақалпақстан Вести Каракалпакстана 22:17:58, 22.09.2019
Хош келипсиз! | RSS
Сайт мазмуны

Кириў усылы

ТАРАЎДЫҢ РАЎАЖЛАНЫЎЫНА ҮЛЕС ҚОСАДЫ

Мәлимлеме технологиялары жедел раўажланып атырған бүгинги дәўирде электр энергиясына болған талап жоқарыламақта. Экономика тараўының халықтың социаллық турмысының жақсыланып барыўында да тутатуғын орны әҳми­йетли. Лекин, электр энергиясы экономикамыздың тиреги, оның бийбаҳа байлық екенлигин, соның ушын үнемлеп жумсаў ҳәм де пайдаланған электр энергиясына төлемлерди кешиктирмей төлеўди ҳәр бир кәрхана басшылары, ҳәр бир пуқара ядынан шығармаса мақсетке муўапық болар еди. Керисинше, базыбир заманласларымыз электр энергиясы ҳәм тәбийғый газден биймиллет мүтәжине пайдаланып, ал, төлемин ўақтынан кешиктирип, қарыздар болып атырғаны, электр ҳәм газ тармақларына нызамсыз жалғанып талан-тараж етиўи тараўдың раўажланыўына тосқынлық етиўине тәсирин тийгизип атырғаны өкинишли.

«Электр энергиясын ҳәм тәбийғый газди жеткерип бериў және тутыныў саласында төлем тәртибин буннан былай да беккемлеў, сондай-ақ, атқарыў жумысын жүргизиў системасын түп-тийкарынан жетилистириў илажлары ҳаққында»ғы Өзбекистан Республикасы Президентиниң Пәрманы, усындай унамсыз жағдайлардың алдын алыў мақсетинде қабылланғанын дәлиллеп қалмастан, тараўды раўажландырыўда әҳми­йетли бағдарлама болмақта.

Пәрман буннан былай тараўда жүз берген қәте-кемшиликлерди өндириў және атқарыў жумысын жүргизиў системасын түп-тийкарынан жетилистириў бойынша кешиктирип болмайтуғын илажлар механизми ислеп шығылғаны менен қунлы ҳүжжет есапланады. Пәрманда Өзбекистан Республикасы Бас прокуратурасы жанында энергия ресурслары ушын төлемлердиң өз ўақтында ҳәм толық өндирилиўине электр ҳәм газ бөлис­тириў тармақларына нызамсыз жалғаныў және талан-тараж етиў жағдайларын анықлаўға, сапластырыўға ҳәм оның алдын алыўға, сондай-ақ, суд ҳүжжетлериниң орынланыўын тәмийинлеўге жуўапкер болған мәжбүрий орынлаў бюросы шөлкемлестирилиўи тараўда энергия ресурсларының жеткерип берилиўин ҳәм тутыныўын есапқа алыўдың толықлығы ҳәм исенимлилиги олар ушын есап-санақлардың өз ўақтында әмелге асырылыўын тәмийинлеўге хызмет етеди.

Тағы бир әҳмийетли тәрепи, қарыздарлықты өндириў мәселелери бойынша ведомстволар аралық электрон бирге ислесиўдиң бирден-бир системасы да жаратылады. Ең баслысы, физикалық ҳәм юридикалық шахслардың мүлклик жағдайы ҳаққындағы мағлыўматлар базасынан пайдаланған ҳалда қарыздарлықты өндириў нәтийжелилигин арттырыўға жәрдем береди.

«Ўздавэнергоназорат» инспекциясы, Қарақалпақстан Республикасы аймақлық бөлиминиң хызметкерлери Пәрманда белгилеп берилген ўазыйпаларды орынлаў ушын республикамыз аймағында жайласқан кәрхана, мәкеме, мәкан ҳәм аўыл пуқаралар жыйынларында үгит-нәсият ҳәм түсиндириў жумысларын алып бармақта.

Жуўмақластырып айт­қанда, қабылланған Пәрман энергия ресурслары тараўында алып барылып атырған реформалардың нәтийжелилигин арттырыўға хызмет етиўине тийкар жаратары анық.

Р.МАМУТОВ,

«Ўздавэнергоназорат» инспекциясы

Қарақалпақстан Республикасы аймақлық бөлими инс­пекторы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF