Еркин Қарақалпақстан Вести Каракалпакстана 18:29:37, 07.03.2021
Хош келипсиз! | RSS
Сайт мазмуны

Кириў усылы

БЕЛСЕНДИЛИГИМИЗДИ ЖӘНЕ  ДЕ  АРТТЫРАМЫЗ

Инсаният өмири даўамында ийгиликли мақсетлерге жетиў ушын мудамы изленеди ҳәм ҳәрекетте болады. Жақсы нийетли инсан арзыў-үмитин әмелге асырыў ушын ең үлкен таяныш, бул тынышлық ҳәм пәраўанлық болып есапланады. Елимизде тынышлық даўам етсе, мәмлекет раўажланады, халқымыздың турмысы абат ҳәм пәраўан болады. Халқымыз тыныш ҳәм пәраўан болыўы ушын күнделикли турмыста бир қатар диний ҳәм миллий пазыйлетлерди әмелге асырады.

Мине, усындай пазыйлетли әмеллердиң бири усы жылдың 15-июнь сәнесинде — мүбәрек Рамазан айының берекетли күнлеринде ҳүрметли Президентимиздиң тиккелей басламасы менен ел-журтымыз арасында үлкен абырай-итибарға ийе болған муқаддес динимиз уламалары, имам-хатиблер, илим-пән, мәденият хызметкерлери менен зәрүр болған мәселелерди шешиў ушын «Социаллық турақлылықты тәмийинлеў, муқаддес динимиздиң пәклигин сақлаў — дәўир талабы» темасында үлкен әнжүман болып өтти. Соны айрықша атап өтиў керек, бундай мәжилис ғәрезсиз елимиз тарийхында биринши мәрте болып өткени менен айрықша итибарға ылайық.

Буннан гөзленген тийкарғы мақсет — социаллық турақлылықты тәмийинлеў, муқаддес динимиздиң пәклигин сақлаўда дин тараўы ўәкиллериниң, әсиресе, имам-хатиблердиң орны гиреўли. Өйткени, тынышлықты қәстерлеп-сақлаў, оны қәдирлеп, шүкиршилигин етиў ҳеш бир дәўирде өзиниң мазмун-әҳмийетин жоғалтпайды. Бирақ, соның менен бирге, мине, усындай бизиң елимизде тынышлық ҳүким сүрип турған демлерде, базы бир журтларда тынышсызлықлар болып атыр. Ол жерлерде де қариялар бар, кекселер бар, жас нәрестелер бар. Соған қарамастан қаншадан-қанша буз­ғыншылықлар жүз берип атыр­ғанына бүгинги күнде ғалаба хабар қураллары арқалы гүўа болып турмыз. Жәннет мәкан журтымыздың тынышлығына көз тиймесин. Оны ҳәр қыйлы журтымыздың тынышлығына көз тигип турған ғәрезли нийеттеги жат ағымлардың тәсиринен сақлаў ҳәм келешегимиз болған жас әўладты, әсиресе, перзентлеримизди инсаплы, ҳүжданы пәк ҳәм де Ўатанға садықлық руўхында тәрбиялаўымыз шәрт.

Бүгинги күнде халқымыздың 60 проценттен артығын жаслар қурайды. Жасларымыз келешекте ким болыўы шаңарақтан басланып, мине, усы шаңарақ бәркамал әўладтың негизи есапланады. Солай екен, шаңарақта перзентлеримизге жақсы тәрбия бериў, әсиресе, оларда әдилликти қәлиплестириў, ана-Ўатанды сүйиў сезимин оятыў жүдә зәрүр есапланады.

Ҳүрметли Президентимиз өз баянатында: «...тийкарғы мақсет сол, тарийхымызға, мәдениятымызға, динимизге байланыслы бир бет қол жазба болса да, оларды жыйнап, халқымызды, жасларымызды таныстырыў, бизиң қандай уллы ҳәм бийтәкирар мийрасымыз бар екенин аңлатыў, перзентлеримизди усы уллы мийрасқа мүнәсип етип тәрбиялаўдан ибарат», деп айтып өткен еди. Ҳақыйқатында да жәмийетимиздиң раўажланыўы ушын зәрүр болған илимлерди үйрениў ҳәр бир жас жигит-қыздың мойнындағы ўазыйпаларынан бири есапланады.

Президентимиз тәрепинен диний мәкемелер, сондай-ақ, «Ҳидаят» журналы ҳәм «Ислам нуры» газеталары редакцияларының салықлары кемейтилиўи ҳаққындағы гәплери, имам-уламалардың телевидение арқалы көбирек шығып, диний көрсетиўлерге көбирек ўақыт ажыратылыўы кереклиги ҳаққындағы гәплери ҳәр қандай мусылманды толқынландырып жиберетуғыны сөзсиз. Демек, наданлыққа қарсы ағартыўшылық пенен гүресиўде диний мәкеме хызметкерлери, сүйикли журналымыз ҳәм газетамыз хызметкерлери, ҳүрметли имам-хатиблеримиз еле де белсене хызмет етиўи шәрт.

Ўатанласымыз, уллы муҳаддис Имам ал-Бухарий: «Мақсетке ерисиў тек илим менен болады», деп бийкарға айтпаған. Себеби, илимсизлик — наданлықтан, ал, наданлық тәкаббырлық ҳәм бузғыншылықтан келип шығады. Миллий ҳәм диний қәдириятларымыздан тәрбия көрген жасларымыз жәмийетимиздеги бәрше инсанларға пайдасын тийгизиўге, олардан зыянды кетириўге ҳәрекет етеди. Себеби, бундай әўлад ҳақыйқат, жақсылық сыяқлы әдеп-икрамлылық негизинде тәрбия алған, инсанларға жақсылық етиў еки дүнья бахыт-ығбалына жеткизетуғынын жақсы аңлап, ең тийкарғысы, тынышлықтың үлкен байлық екенин терең сезине биледи.

Дурысында да, тынышлық — бийбаҳа байлық. Бирақ, әне сол байлықтың тамырына балта урып атырған жарамас кимселер, инсан деп айтыўға да ылайық емес. Бундай террорист­лик ҳәм экстремистлик ағымлардың қылмысларынан бүгин пүткил дүнья тынышсыз болмақта, азап көрмекте.

Ҳүрметли Президентимиз:  «... диний ағартыўшылық ҳәм руўхый әдеп-икрамлылық тәрбия мәселелери бойынша мәҳәлле мәсләҳәтшилери, профилактика инспекторлары, имам-хатиблер ҳәм ҳуқық қорғаў уйымларының тийисли хызметкерлери ушын маманлығын арттырыў оқыўларын шөлкемлес­тириў керек. Бул оқыўларда оларды диний экстремистлик ҳәм террористлик топарлардың жумыс усылы, жаўызлық идеялары менен мақсетли таныстырып барыў зәрүр», деп атап өтти.

Соның ушын бүгинги күнде социаллық-мәнаўий орталықты ҳәм халықтың турмыс шараятын жақсылаў, жасларды түрли диний экстремистлик ағымлар тәсиринен сақлаў мәселеси бәршемиз ушын ең тийкарғы мәселе болып тур.

Муқаддес ислам динин нықап етип басқа жолларға кирип кетип атырған илимсиз кимселер бир нәрсени түсинбейди яки түсиниўди қәлемейди. Яғный, ҳүрметли Президентимиздиң сөзи менен айтқанда, «Ислам тек нурлы өмирге, илим-ағартыўшылыққа, жақсылыққа шақырады. Ҳеш қашан бузғыншылық, жанға қастыянлық етиў, зорлыққа шақырмайды. Әне, усы ҳақыйқатты тән алмай, жат идеяларға алданып, зыянлы ағымларға кириў, терроршы болыў — Өзбекистан хал­қына улыўма туўры келмейди. Әлҳамдулиллаҳ, ҳәммемиз мусылманбыз, буның шүкиршилигин етип, перзентлеримизди де бундай жемистиң қәдирине жететуғын инсанлар етип тәрбиялаўымыз керек емес пе!»

Буннан тысқары, Президентимиздиң Қураны Кәриймнен келтирип айтқан «өз қолларыңыз бенен өзиңизди  апатқа тасламаң», деген сөзлери де бузғыншы кимселердиң үгитлеп атырған надурыс, бузғыншылық даўаларынан ашық қайтарыў болады.

Соның менен бирге, имам-хатиблерге тиккелей мүрәжат етип: «... елимизде тынышлықты, татыўлықты сақлаўда бизге жәрдем бериң.

Егер мәҳәллеңизде бир бала зыянлы диний ағымға кирип қалған болса, оны надурыс жолдан қайтарыўға ҳәрекет етиң.

Бәринен бурын, олар менен сөйлесип, бул — ата-бабаларыңның жолы емес, бул жолдан қайт, ҳақыйқат, мине, бул жақта, тынышлық ҳәм жақсылық жолынан барып, ҳеш ким кем болмаған, деп оларды саламат исенимге исендириў керек. Билим менен, ақыл ҳәм ағартыўшылық, үлгили жумыслар менен исендириў керек. Тарийхтан, бүгинги турмысымыздан алынған турмыслық, тәсиршең мысаллар менен исендириў керек.

Бундай үгит-нәсият сизлердиң қолыңыздан келеди, әлбетте.

Жолдан адасқан баланы дәрҳал душпанға шығармай, оны өзимиздиң перзентимиз деп билиўимиз керек. Оған пүткил жүрегимиз бенен ашынып атырғанымызды сол бала билсин. Нәтийжеде, олардың да жүрек көзи ашылып, дурыс жолға қәдем қойса...», ­ деп айрықша тоқтап өтти.

Мәжилисте Президентимиз тәрепинен айтылған ҳәр бир пикир жәмийетте жүз берип атыр­ған процесске орны-орны менен айтылған болып, ҳәммемизге әсиресе, биз имам-хатиблерге өз үстимизде еле де тереңирек ислеўге, сергек болыўға, жәмийетте жүз берип атырған ҳәр түрли ўақыя-ҳәдийселерден туўры ҳәм әдиллик пенен жуўмақ шығарыўымыз керек екенлигине ишара болды.

Буның ушын жәмийетимиз, жасларымыз мәнаўияты, идеологиялық тәрбиясы ушын өзин жуўапкер деп билген инсанлар — бул мәҳәлле яки диний шөлкемлер бола ма, ҳуқықты қорғаў уйым­лары қәнигелери бола ма яки үлкен тәсир күшине ийе дөретиўши зиялылар бола ма — олардың бәршеси әсиресе, белсенди болыўы керек.

Биз сөзимизди Президентимиздиң сөзи менен жуўмақлағанды мақул көрдик:

«Биз өз жолымызда қандай қәўип-қәтерге дус келмейик, оны тек ғана беккем күш-жигеримиз, динимиз-диянатымыз бенен жеңе аламыз.

Биз қандай шекке ериспекши болсақ, оған тек ғана ана журтымызға мийрим-шәпәәт, садықлық ҳәм пидайылық пенен ерисемиз.

Биз еркин ҳәм абадан келешегимизди қурмақшы болсақ, тек ғана мәрт ҳәм уллы халқымыз бенен бирге қурамыз.

Бул ҳақыйқатты бүгин бәршемиз шын жүректен сезип турғанымызға беккем исенемен. Бул уллы сезим әмелий ислеримизде, жумысымызда тийкарғы өлшем болыўын қәлер едим.

Бул жолда Аллаҳ таала бәршемизге ҳәмийше мәдеткар болсын, күш-жигер бағышласын!».

Шамсутдин БАЎАТДИНОВ,

Қарақалпақстан Республикасы Мусылманлары қазыяты қазысы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF