Еркин Қарақалпақстан Вести Каракалпакстана 17:50:00, 21.11.2018
Хош келипсиз! | RSS
Сайт мазмуны

Кириў усылы

«ҚУРЫЛЫС БАСҚАРМАСЫ»НДАҒЫ

ТАЛАН-ТАРАЖЛЫҚ...

Кейинги жылларда республикамыз көлеминдеги бир қатар билимлендириў, денсаўлықты сақлаў, халыққа турмыслық хызмет көрсетиў ҳәм басқа да социаллық объектлерде бүгинги дәўир талапларына сай алып барылып атырған ири қурылыс, реконструкция яки капитал оңлаў жумыслары нәтийжесинде қала ҳәм районларымыздың келбети жоқары дәрежеде заманагөй көриниске ийе болмақта. Әлбетте, булардың бәршеси халқымыздың ийгилиги жолында әмелге асырылмақта.

...Пайтахтымыздағы «Қарақалпақ көтере саўда» жуўапкершилиги шекленген жәмийетине қараслы «Қурылыс басқармасы» кәрханасы директоры лаўазымында ислеп келген Хушанов Нуритдин Нуржановичтиң басшылығында да республикамыз аймағындағы бир қатар объектлерге капитал реконструкция жумыслары алып барылып, пайдаланыўға тапсырылғанлығын тилге алсақ арзыйды.

Бирақ, усындай қа­йырлы ислер ушын ҳүкиметимиз тәрепинен ажыратылған қаржыларды сметада көрсетилген талапларға толық сарпламай, рәсмий ҳүжжетлерди қәлбекилестириў, есабатларға жалған мағлыўматлар киритиў есабынан Н.Хушановтың мәмлекетимиздиң бир неше миллион сумлық қарежетлериниң талан-тараж етилиўине жол қойғанлығы кеширилмес қәтелик саналады.

Сөзимизди мысаллар менен толықтыратуғын болсақ, 2010-жылы пайтахтымыз Нөкис қаласындағы Олимпия резервлери колледжиниң жабық жүзиў бассейниниң қурылыс ислери ушын ажыратылған қаржыны шәртнама талапларында көрсетилген мақсетлерге толық сарпламастан, 670 мың 982 сум, 2011-жылы Нөкис қалалық Халық билимлендириў мәкемелери хызметин методикалық тәмийинлеў ҳәм шөлкемлестириў бөлимине қараслы 12-санлы улыўма билим бериў мектебиниң капитал оңлаў жумысларына ажыратылған uww миллион 800 мың сум қаржының 7 миллион 877 мың 676 сумын, Тақыятас қаласындағы Қаржы ҳәм Ғазнашылық бөлими, бюджеттен тысқары Пенсия қоры имаратларының капитал реконструкция жумысларын әмелге асырыў ушын ажыратылған қаржының 33 миллион 942 мың сумнан зыятырағын талан-тараж етиў жолы менен өзлестирген.

Буннан тысқары, ҳуқық қорғаў уйым­лары тәрепинен алып барылған тексериўлерде салық төлемлерин қысқартыў мақсетинде кәрхананың орынлаған жумыслар ҳәм хызметлеринен түскен сап пайданы кемейтип көрсетип, бюджеттен тысқары пенсия қорына, жол қоры ушын белгиленген мәжбүрий төлем, абаданластырыў ҳәм инфрадүзилмени раўажландырыў менен басқа да бир қатар салық төлемлерин төлеўде де қәте-кемшиликлерге жол қойылғанлығы анықланған. Сондай-ақ, көтере саўда жумысы менен шуғылланыў ушын арнаўлы рухсатнамаға ийе болмастан, хожалық жүритиўши субъектлерге қурылыс матер­иалларын сатыў ислерин алып барыўы нәтийжесинде Өзбекстан Республикасы Министрлер Кеңесиниң «Хызметлердиң айырым түрлерин лицензиялаў ҳаққында»ғы қарары талапларын да бузып, мәмлекет ҳәм жәмийет мәплерине жүдә көп муғдарда зыят келтирген.

Усы орында кәрхана директоры Н.Хушановтың усындай нызамсыз ис-ҳәрекетлерин әмелге асырыўда кәрханада бас есапшы болып ислеп келген Аллаяр Ҳамирниязовтың да теңдей жуўапкер екенлигин айтып өтиўимиз керек.

Бирақ, олардың бундай нызамсыз ислери узаққа созылмады. «Қарақалпақ көтере саўда» ЖШЖне қараслы «Қурылыс басқармасы» кәрханасында жол қойылған кемшиликлер бойынша алып барылған тексериўлер нәтийжесинде Н.Хушанов пенен А.Ҳамирниязовлардың нызамға қайшы ис-ҳәрекетлери Жынаят ислери бойынша Шымбай районлық судында көрип шығылып, Өзбекстан Республикасы Жынаят Кодекси тийкарында тийисли жаза тайынланды.

Қ.КЕЎНИМЖАЕВ.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF