Еркин Қарақалпақстан Вести Каракалпакстана 13:25:26, 21.04.2021
Хош келипсиз! | RSS
Сайт мазмуны

Кириў усылы

ӨЗБЕКИСТАН РЕСПУБЛИКАСЫ ТОҒАЙ ХОЖАЛЫҒЫ БОЙЫНША МӘМЛЕКЕТЛИК КОМИТЕТИНИҢ ЖУМЫСЫН ШӨЛКЕМЛЕСТИРИЎ ҲАҚҚЫНДА

Өзбекистан Республикасы Президентиниң

қарары

Өзбекистан Республикасы Президентиниң 2017-жыл 11-майдағы «Өзбекистан Республикасы Тоғай хожалығы бойынша мәмлекетлик комитетин шөлкемлестириў ҳаққында»ғы ПП-5041-санлы Пәрманының орынланыўын тәмийинлеў ҳәм Өзбекистан Республикасы Тоғай хожалығы бойынша мәмлекетлик комитетиниң жумысын нәтийжели шөлкемлестириў мақсетинде:

1. Ташкент ўәлаяты ҳәкимлиги қарамағындағы Угам-Чатқал мәмлекетлик миллий тәбият бағы ҳәм оның қурамына киретуғын Чатқал мәмлекетлик биосфера қорықханасы, Ахангаран ҳәм Бурчмулла тоғай хожалықлары, сондай-ақ, Өзбекистан Республикасы Аўыл ҳәм суў хожалығы министрлиги  системасының суў хожалығы шөлкемлери структурасындағы ирригациялық тоғай хожалықлары Өзбекистан Республикасы Тоғай хожалығы бойынша мәмлекетлик комитетиниң системасына берилсин.

2. Төмендегилер:

Өзбекистан Республикасы Тоғай хожалығы бойынша мәмлекетлик комитетиниң шөлкемлестириўшилик структурасы 1-қосымшаға муўапық;

Өзбекистан Республикасы Тоғай хожалығы бойынша мәмлекетлик комитетиниң ситемасына киретуғын шөлкемлер ҳәм басқармалардың дизими 1а-қосымшаға муўапық;

Өзбекистан Республикасы Тоғай хожалығы бойынша мәмлекетлик комитетиниң басқарма хызметкерлериниң шекленген саны 48 ден ибарат орайлық аппаратының структурасы 2-қосымшаға муўапық;

#арақалпақстан Республикасы Тоғай хожалығы бойынша комитетиниң структурасы ҳәм ўәлаятлық тоғай хожалығы басқармаларының үлги структурасы 3- ҳәм 3а-қосымшаларға муўапық;

Мәмлекетлик қорықханалар, миллий тәбият бағларының ҳәм аңшылық хожалықлары басқармасының структурасы 4-қосымшаға муўапық;

мәмлекетлик тоғай хожалықларының үлги структурасы 5-қосымшаға муўапық тастыйықлансын.

Өзбекистан Республикасы Тоғай хожалығы бойынша мәмлекетлик комитети баслығына хызметкерлердиң белгиленген штат саны шеңберинде орайлық аппарат структурасына, Қарақалпақстан Республикасы Тоғай хожалығы бойынша комитетине, ўәлаятлық тоғай хожалығы басқармаларына ҳәм комитет системасына киретуғын басқа да шөлкемлердиң структураларына өзгерислер киргизиў ҳуқықы берилсин.

3. Өзбекистан Республикасы Тоғай хожалығы бойынша мәмлекетлик комитетин ҳәм оның структуралық бөлимлерин шөлкемлестириўге байланыслы шөлкемлестириўшилик илажларды муўапықластырыўға ҳәм оны әмелге асырыўға көмеклесиў Комиссиясы 6-қосымшаға муўапық қурамда дүзилсин.

4. Өзбекистан Республикасы Аўыл ҳәм суў хожалығы министрлиги жанындағы Тоғай хожалығы бас басқармасы қасындағы Тоғай хожалығын раўажландырыў қоры Өзбекистан Республикасы Тоғай хожалығы бойынша мәмлекетлик комитетиниң Тоғай хожалығын раўажландырыў қоры етип (кейинги орынларда Қор деп аталады) қайта шөлкемлестирилсин.

5. Төмендегилер:

Өзбекистан Республикасы Тоғай хожалығы бойынша мәмлекетлик комитети орайлық аппаратын – Өзбекистан Республикасының республикалық бюджети ҳәм Қор қаржылары;

Қарақалпақстан Республикасы Тоғай хожалығы бойынша комитетин, ўәлаятлық тоғай хожалығы басқармаларын - Қор қаржылары;

Мәмлекетлик қорықханаларын, миллий тәбият бағларын ҳәм аңшылық хожалықлары басқармасын және мәмлекетлик тоғай хожалықларын - Өзбекистан Республикасының республикалық бюджетиниң қаржылары ҳәм бюджеттен тысқары қаржылар;

Тоғай хожалығы илимий-изертлеў институтын – Өзбекистан Республикасының республикалық бюджети қаржылары ҳәм грантлары;

«Ўрмонлойиҳа» мәмлекетлик унитар кәрханасын, «Шифобахш» дәрилик өсимликлерди жетистириў ҳәм қайта ислеў орайын – бюджеттен тысқары қаржылар;

Тоғай ҳәм дәрилик өсимликлер туқымгершилигин анализлеў орайын – Өзбекистан Республикасының республикалық бюджети қаржылары;

Угам-Чатқал мәмлектлик миллий тәбият бағын – Ташкент ўәлаяты жергиликли бюджети қаржылары ҳәм бюджеттен тысқары қаржылар қаржыландырыў дәреклери етип белгиленсин.

6. Өзбекистан Республикасы Қаржы министрлиги 2018-жылдан баслап Өзбекистан Республикасы Тоғай хожалығы бойынша мәмлекетлик комитети орайлық аппараты тәмийнаты қәрежетлерин қаржыландырыў ушын Өзбекистан Республикасы Мәмлекетлик бюджети параметрлеринде қаржы ажыратылыўын нәзерде тутсын, 2017-жылда Өзбекистан Республикасы Тоғай хожалығы бойынша мәмлекетлик комитети орайлық апаратын қаржыландырыўдың әмелдеги тәртиби сақлап қалынсын.

7. Төмендегилер:

2017-2021-жылларда тоғай хожалықлары жумысын нәтийжели шөлкемлестириў, тармаққа алдынғы илим-техника жетискенликлерин енгизиў, материаллық-техникалық базасын жаңалаў, халықаралық грантларды тармаққа тартыў илажлары Бағдарламасы 7-қосымшаға муўапық;

2017-2019-жылларда Қарақалпақстан Республикасы ҳәм ўәлаятлар кесиминде  тоғай майданларын кеңейтиў (реконструкциялаў), нәллер жетистириў, дәрилик өсимликлерди жыйнаў, қара маллар ушын жайлаў майданларын ажыратыў ҳәм аўыл хожалығы өнимлерин жетистириў бойынша илажлар 8-қосымшаға муўапық;

2017-2019-жылларда Қарақалпақстан Республикасы ҳәм ўәлаятлардың мәмлекетлик тоғай хожалықлары кесиминде тоғай майданларын кеңейтиў (реконструкциялаў), нәллер жетистириў, дәрилик өсимликлерди жыйнаў, қара маллар ушын жайлаў майданларын ажыратыў ҳәм аўыл хожалығы өнимлерин жетистириў бойынша илажлар 9-19-қосымшаларға муўапық;

2017-2019-жылларда Қарақалпақстан Республикасы ҳәм ўәлаятлардың мәмлекетлик тоғай хожалықлары кесиминде тоғайларды жаратыў ҳәм егин материалларын жетистириў бойынша илажлар 9а-19а-қосымшаларға муўапық;

2017-2019-жылларда Қарақалпақстан Республикасы ҳәм ўәлаятлардың мәмлекетлик тоғай хожалықлары кесиминде аўыл хожалығы өнимлерин жетистириўдиң болжаў көрсеткишлери 9б-19б-қосымшаларға муўапық;

2017-2019-жылларда Қарақалпақстан Республикасы ҳәм ўәлаятлардың мәмлекетлик тоғай хожалықлары кесиминде пал ҳәррешилик, балықшылық, шарўашылық ҳәм санаат өнимлерин жетистириў, сондай-ақ, халыққа төлемли хызмет көрсетиў болжаў көрсеткишлери 9в-19в-қосымшаларға муўапық;

2017-2019-жылларда Қарақалпақстан Республикасы ҳәм ўәлаятлардың мәмлекетлик тоғай хожалықлары кесиминде дәрилик өсимликлерди жетистириў ҳәм таярлаў болжаў көрсеткишлери 9г-19г-қосымшаларға муўпық тастыйықлансын.

Өзбекистан Республикасы Тоғай хожалығы бойынша мәмлекетлик комитети, Аўыл ҳәм суў хожалығы министрлиги, Қарақалпақстан Республикасы Министрлер Кеңеси ҳәм ўәлаятлар ҳәкимликлери басшыларына – 7-19-қосымшаларда көрсетилген илажлардың өз ўақтында орынланыўын шөлкемлестириў бойынша жуўапкершилик жүкленсин.

8. 2017-2021-жылларда тоғай хожалықлары тәрепинен декоративли ҳәм мийўели тереклердиң нәл ҳәм нәлшелерин жетистириўдиң болжаў көрсеткишлери 20-қосымшаға муўапық тастыйықлансын.

Өзбекистан Республикасы Тоғай хожалығы бойынша мәмлекетлик комитети, Аўыл ҳәм суў хожалығы министрлиги, Қарақалпақстан Республикасы Министрлер Кеңеси ҳәм ўәлаятлар ҳәкимликлери еки ай мүддетте 20-қосымшаға муўапық 2017-2021-жылларда тоғай хожалықларында декоративли ҳәм мийўели тереклердиң нәл ҳәм нәлшелерин жетистириўдиң болжаў көрсеткишлерин орынлаў бойынша «жол картасы»н ислеп шықсын ҳәм Министрлер Кабинетиниң Аўыл ҳәм суў хожалығы, аўыл хожалығы өнимлерин қайта ислеў және тутыныў товарлары мәселелери комплекси басшысына тастыйықлаў ушын белгиленген тәртипте киргизсин.

9. «Агробанк» АКБға Өзбекистан Республикасы Тоғай хожалығы бойынша мәмлекетлик комитетине, Қарақалпақстан Республикасы Тоғай хожалығы бойынша комитетине, ўәлаятлардың тоғай хожалығы басқармаларына, структуралық кәрханаларға ҳәм шөлкемлерге усы қарарда тастыйықланған Бағдарламаны әмелге асырыў бойынша Өзбекистан Республикасы Орайлық банки тәрепинен қаржыландырыў ставкасынан жоқары болмаған ставка бойынша жеңиллетилген кредитлер ажыратыў усыныс етилсин.

10. Өзбекистан Республикасы Жоқары ҳәм орта арнаўлы билимлендириў министрлиги, орта арнаўлы, кәсип-өнер билимлендириў орайы Тоғай хожалығы бойынша мәмлекетлик комитети менен биргеликте:

еки ай мүддетте орта арнаўлы, кәсип-өнер ҳәм жоқары билимлендириўдиң мәмлекетлик билимлендириў стандартлары, кәсип-өнер колледжлеринде тоғай хожалығы техниги қәнигелиги бойынша кадрлар таярлаўды инабатқа ала отырып, тоғай хожалығы системасы ушын маман қәнигелерди таярлаў бойынша оқыў режелерин ҳәм бағдарламаларын сын көзқарастан көрип шықсын, билимлендириў стандартларын, оқыў режелерин ҳәм бағдарламаларын заманагөй талапларды инабатқа ала отырып, белгиленген тәртипте жаңа редакцияда ислеп шықсын ҳәм тастыйықласын және 2017-2018-оқыў жылынан баслап енгизсин;

бир ай мүддетте кесте ислеп шығылсын ҳәм заманагөй талапларды және халықаралық тәжирийбени инабатқа ала отырып, кәсип-өнер колледжлеринде «тоғай хожалығы техниги» қәнигелиги бойынша оқытылатуғын арнаўлы пәнлер бойынша жаңа сабақлық ҳәм оқыў қолланбалар таярлаўды ҳәм басып шығарыўды тәмийинлесин;

тоғай хожалығы ушын кадрлар таярлап атырған кәсип-өнер колледжлерин бағдар бойынша арнаўлы билимге ийе жоқары маманлықтағы оқытыўшылар менен беккемлеўге айрықша итибар қаратсын;

тоғай хожалығы ушын кадрлар таярлаўды әмелге асырып атырған кәсип-өнер колледжлери питкериўшилерин тиккелей таңлаған қәнигелиги бойынша жумысқа орналасыўына жәрдем берсин ҳәм қадағалаўды күшейтсин.

11. Өзбекистан Республикасы Тоғай хожалығы бойынша мәмлекетлик комитети, Жоқары ҳәм орта арнаўлы билимлендириў министрлиги, Орта арнаўлы, кәсип-өнер билимлендириў орайының оқыў процесин өндирис пенен тығыз байланыстырыў, зәрүрли оқыў өндирислик базасын қәлиплестириў мақсетинде кәсип-өнер колледжлерин 21-қосымшаға муўапық шәртнама тийкарында белгили бир мәмлекетлик тоғай хожалықларына бириктириў ҳаққындағы усыныслары қабыл етилсин.

Өзбекистан Республикасы Тоғай хожалығы бойынша мәмлекетлик комитети бириктирилген кәсип-өнер колледжлерин оларға зәрүр болған оқыў-методикалық материаллар, әсбап-үскенелер, бәринен бурын лаборатория үскенелери, компьютер техникасы менен тәмийинлеў, сондай-ақ, олардың материаллық техникалық базасын беккемлеў бойынша әмелий жәрдем көрсетсин.

12. Өзбекистан Республикасы Илим ҳәм технологиялар агентлиги фундаменталлық, әмелий ҳәм инновациялық мәмлекетлик илимий-техникалық бағдарламаларды қәлиплестириўде оларға төмендегилерди нәзерде тута отырып, илимий жойбарлардың киргизилиўин тәмийинлесин:

республикамыздың топырақ-ықлым шараятларына толық бейимлескен бийбаҳа декоративли, мийўели тереклер, путалар ҳәм дәрилик өсимликлердиң кеселлигине ҳәм зыянкеслерге шыдамлы жаңа, экспортқа жарамлы сортларын жаратыў;

тоғай қоры жерлеринде терек нәллерин егиў, өсириў, зүрәәтин жыйнап-терип алыў ҳәм басқа да агротехникалық илажларды әмелге асырыў бойынша жаңа түрдеги аўыл хожалығы техникасы, агрегат ҳәм әсбап-үскенелерди ислеп шығарыўды шөлкемлестириў.

13. «Ўзагротехсаноатхолдинг» акционерлик жәмийети Өзбекистан Республикасы Тоғай хожалығы бойынша мәмлекетлик комитетиниң буйыртпалары бойынша тоғай қоры жерлеринде тоғайларды көбейтиў мақсетинде терек нәллерин егиў ҳәм өсириў, тоғай-мийўе өнимлериниң зүрәәтин жыйнап алыў, сондай-ақ, басқа да агротехникалық илажларды әмелге асырыў ушын зәрүр болған техника, агрегат ҳәм әсбап-үскенелердиң белгиленген тәртипте ислеп шығарылыўын ҳәм хожалық жүргизиўши субъектлерге лизинг тийкарында жеткерип берилиўин тәмийинлесин.

14. Өзбекистан Республикасы Тоғай хожалығы бойынша мәмлекетлик комитети бир ай мүддетте:

Өзбекистан Республикасы Аўыл ҳәм суў хожалығы министрлиги, Қаржы мнистрлиги менен биргеликте аўыл хожалығы жерлеринде зүрәәтлиликти көбейтиўге бағдарланған самал ҳәм суў эрозияларынан қорғаў ушын қорғаўшы терекзарларды қурыў жойбарларын ислеп шығыў ҳәм әмелге асырыўды қаржыландырыў дәреклери бойынша Өзбекистан Республикасы Министрлер Кабинетине белгиленген тәртипте усыныс киргизсин;

тоғай хожалықларының басшыларын ҳәм қәнигелерин қайта таярлаў ҳәм маманлығын арттырыў, жоқары оқыў орынларын тоғай хожалығы қәнигеликлери бойынша тамамлаған жас қәнигелерди салаға тартыў механизмин ислеп шықсын ҳәм белгиленген тәртипте тастыйықласын.

15. Өзбекистан Республикасы Министрлер Кабинети бир ай мүддетте:

Өзбекистан Республикасы Тоғай хожалығы бойынша мәмлекетлик комитети ҳаққындағы Режени;

ўәлаятлардың тоғай хожалығы басқармалары ҳаққындағы үлги режени;

Мәмлекетлик қорықханалар, миллий тәбият бағлары ҳәм аңшылық хожалықлары басқармасы ҳаққындағы режени;

Тоғай хожалығы илимий-изертлеў институты ҳаққындағы режени тастыйықласын.

16. Өзбекистан Республикасы Тоғай хожалығы бойынша мәмлекетлик комитети Ташкент ўәлаяты, Қыбрай районы, Университет көшеси, 2-жайда жайластырылсын.

17. Өзбекистан Республикасы Мәлимлеме технологияларын ҳәм коммуникацияларын раўажландырыў министрлиги Тоғай хожалығы бойынша мәмлекетлик комитетин зәрүрли телекоммуникациялар, интернет мәлимлеме тармағына кириў ҳәм телефон байланысы, соның ишинде, ҳүкимет телефон байланысы менен белгиленген тәртипте тәмийинлесин.

18. Өзбекистан Республикасы Тоғай хожалығы бойынша мәмлекетлик комитети Әдиллик министрлиги ҳәм басқа да мәпдар министрликлер ҳәм ведомстволар менен биргеликте еки ай мүддетте нызам ҳүжжетлерине усы қарардан келип шығатуғын өзгерислер менен қосымшалар ҳаққында Өзбекистан Республикасы Министрлер Кабинетине усыныслар киргизсин.

19. Усы қарардың орынланыўын қадағалаў Өзбекистан Республикасы Бас министриниң орынбасары – аўыл ҳәм суў хожалығы министри З.Т.Мирзаевқа жүкленсин.

Өзбекистан Республикасы Президенти   Ш.МИРЗИЁЕВ

Ташкент қаласы, 2017-жыл 11-май

Өзбекистан Республикасы Президентиниң «Өзбекистан Республикасы Тоғай хожалығы бойынша мәмлекетлик комитетин шөлкемлестириў ҳаққында»ғы Пәрманына ҳәм «Өзбекистан Республикасы Тоғай хожалығы мәмлекетлик комитетиниң жумысын шөлкемлестириў ҳаққында»ғы қарарына

Т Ү С И Н И К

Елимиздиң тоғай хожалығы өсимлик ҳәм ҳайўанат дүньясының, соның ишинде, бийбаҳа сән беретуғын мийўели тереклер және дәрилик өсимликлердиң көплиги ҳәм ҳәр қыйлылығы менен ажыралып турады. Бүгинги күнде тоғай қорының 300 ден зыят өсимлик ҳәм 180 нен аслам ҳайўан түрлери «Қызыл китап»қа киргизилген.

Ғәрезсизлик жылларында Өзбекистанда тоғай хожалығы саласында кең көлемли реформалардың әмелге асырылыўының нәтийжесинде республикамызда тоғай қоры жер майданының көлеми сезилерли дәрежеде көбейди. Бүгинги күнде мәмлекетлик тоғай қоры жерлериниң көлеми республикамыз улыўма жер майданының 25,2 процентин қурайды. Бул көрсеткиш ғәрезсизлигимиздиң дәслепки жылларында 5,3 проценттен аспайтуғын еди.

Ҳәзирги ўақытта, республикамыздың тоғай қоры бир неше мәмлекетлик шөлкемлер тәрепинен басқарылмақта. Бул болса тоғай қорынан нәтийжели пайдаланыўда бирден-бир мәмлекетлик сиясатты жүргизиў принципине сәйкес келмейди.

Буннан тысқары, тараўдың материаллық-техникалық базасы физикалық ҳәм моральлық жақтан гөнергени ҳәм жеткилили дәрежеде модернизация етилмегени, халықаралық қаржы институтлары менен донор шөлкемлериниң грантларын тараўға тартыў жумысларының төменлиги, бул тармақта жоқары маманлықтағы қәнигелердиң жетиспеўи, тоғай нызамшылығындағы айырым нормалардың әмелий әҳмийети ҳәм оларды әмелге асырыў механизми жоқлығы тараўдың жумысын раўажландырыў, тоғайларды көбейтиў, қорғаў ҳәм олардан нәтийжели пайдаланыўда қыйыншылықлар туўдырмақта.

Усы мүнәсибет пенен тоғай хожалығы саласында мәмлекетлик сиясатты нәтийжели әмелге асырыў ҳәм мәмлекетлик басқарыўды жетилистириў, тоғай ресурсларынан ақылға муўапық пайдаланыў, сондай-ақ, 2017-2021-жылларда Өзбекистан Республикасын раўажландырыў бес тийкарғы бағдары бойынша Ҳәрекетлер стратегиясы «Халық пенен пикирлесиў ҳәм инсан мәплери жылы» Мәмлекетлик бағдарламасында нәзерде тутылған басқа да ўазыйпаларды шешиў, тараўдағы жүзеге келген машқалаларды сапластырў ҳәм тоғай хожалығын буннан былай да раўажландырыў мақсетинде Өзбекистан Республикасы Президентиниң «Өзбекистан Республикасы Тоғай хожалығы бойынша мәмлекетлик комитетин шөлкемлестириў ҳаққында»ғы Пәрманы ҳәм «Өзбекистан Республикасы Тоғай хожалығы бойынша мәмлекетлик комитетиниң жумысын шөлкемлестириў ҳаққында»ғы қарары қабыл етилди.

Қабыл етилген ҳүжжетлерге бола, Өзбекистан Республикасы Аўыл ҳәм суў хожалығы министрлиги жанындағы Тоғай хожалығы бас басқармасы тийкарында Тоғай хожалығы бойынша мәмлекетлик комитетин шөлкемлестириў нәзерде тутылмақта.

Аймақларда тоғай қоры жумысларын шөлкемлестириўдиң ҳәм басқарыўдың нәтийжелилигин арттырыў, соның ишинде, тоғайларды көбейтиў, қорғаў ҳәм олардан нәтийжели пайдаланыўды жетилистириў мақсетинде Қарақалпақстан Республикасы Тоғай хожалығы бойынша комитети және Бухара, Жиззақ, Қашқадәрья, Наўайы, Наманган, Самарқанд, Сурхандәрья, Ташкент ҳәм Ферғана ўәлаятлары тоғай хожалығы басқармаларын шөлкемлестириў нәзерде тутылған.

Буннан тысқары, Ташкент ўәлаяты ҳәкимлиги қараўындағы Угом-Чатқал  мәмлекетлик миллий тәбият бағы ҳәм оның қурамына киретуғын Чатқал мәмлекетлик биосфера қорықханасы, Оҳангарон ҳәм Бурчмулла тоғай хожалықлары Өзбекистан Республикасы Тоғай хожалығы бойынша мәмлекетлик комитетиниң қараўына өткерилди.

Сондай-ақ, тоғай хожалығы саласына илимий қолланбаларды және усыныс ҳәм инновациялық технологияларды кеңнен енгизиў мақсетинде Өзбекистан Республикасы Тоғай хожалығы бойынша мәмлекетлик комитети системасында Сән беретуғын бағшылық ҳәм тоғай хожалығы илимий-өндирислик орайы тийкарында Тоғай хожалығы илимий-изертлеў институтын шөлкемлестириў нәзерде тутылған.

Атап өтилген ҳүжжетлерде Өзбекистан Республикасы тоғай хожалығы бойынша мәмлекетлик комитетиниң тийкарғы ўазыйпалары ҳәм жумыс бағдарлары анық белгилеп берилген.

Өзбекистан Республикасы тоғай хожалығы бойынша мәмлекетлик комитетине бурын жүкленген ўазыйпалар менен бир қатарда жаңадан жаратылған сән беретуғын өсимликлердиң сортларының нәллери ҳәм егиў материалларын сертификатластырыў ҳәм стандартластырыў, оларды жетистириўди шөлкемлестириў, аўыл хожалығы ҳәм шарўашылық өнимлерин қайта ислеў, соның ишинде, жоқары қосымша қунға ийе халық тутыныў товарларын ислеп шығарыўды жолға қойыў, бул салаға халықаралық қаржы институтларының грантларын тартыў, тоғай хожалығы тараўы шөлкемлерин қәнигели жоқары, орта ҳәм киши буўын кадрлары менен тәмийинлеўди жетилистириў бойынша бирден-бир системаны енгизиўге бағдарланған қосымша ўазыйпалар жүкленбекте.

Тоғай хожалығын жақын перспективада буннан былай да раўажландырыў мақсетинде тастыйықланған:

тоғай хожалықлары жумысын нәтийжели шөлкемлестириў, тармаққа алдынғы илимий-техникалық жетискенликлерди енгизиў, материаллық-техникалық базасын жаңалаў, салаға халықаралық грантларды тартыўды жеделлестириў бойынша 2017-2021-жылларға мөлшерленген илажлар Бағдарламасы;

Қарақалпақстан Республикасы ҳәм ўәлаятлар кесиминде  2017-2019-жылларда тоғай майданларын кеңейтиў (реконструкциялаў), нәл жетистириў, дәрилик өсимликлерди жыйнаў, шарўа малларын бағыў ушын жайлаўлар ажыратыў ҳәм аўыл хожалығы өнимлерин жетистириў бойынша илажлар;

2017-2021-жылларда тоғай хожалықлары тәрепинен сән беретуғын ҳәм мийўели тереклердиң нәллерин, соның ишинде, унаби, лимон ҳәм грек ғозасын жетилистириўдиң болжаў көрсеткишлери үлкен әҳмийетке ийе.

Илажларды ислеп шығыўда жақын үш жылда аўыл хожалығы өнимлерин, пал ҳәррешилик, балықшылық, шарўашылық және халық тутыныў товарларын көбейтиў мәселелерине айрықша итибар қаратылды.

Бунда әмелге асырылып атырған жумыслардың мақсети сыпатында мәмлекетлик тоғай қоры жерлеринде, соның ишинде, далаларда ҳәм саўра аймақларында жаңа тоғайларды жаратыў, аўыл хожалығы егислик жерлери әтирапында қорықлаўшы тоғайларды тиклеў, республикамызда экологиялық орталықты жақсылаў бойынша әмелий база жаратыў жумысларын әмелге асырыў нәзерде тутылды.

Республикада режели рәўиште писте плантациялары майданларын кеңейтиўдиң есабынан писте жетистириўди хошаметлеў, талап етилетуғын муғдарда сапалы писте нәллерин халыққа, дийхан ҳәм фермер хожалықларына жеткерип бериў мәселелерине айрықша итибар қаратылды.

Атап өтиў керек, писте жетистириўди көбейти арқалы тек ғана импортты қысқартып ғана қоймастан, ал валютаны үнемлеўге, сондай-ақ, халықтың писте өнимине болған талабын қанаатландырыўға ҳәм пистениң базардағы баҳасын арзанлатыўға ерисиледи.

Қабыл етилген ҳүжжетлер менен жоқары, орта арнаўлы ҳәм профессионал мәмлекетлик билимлендириў стандартларының, оқыў режелери менен бағдарламаларының тоғай хожалығы системасы ушын маман қәнигелерди таярлаўға қаратылған бөлегин қайта көрип шығыў, профессионал кәсип-өнер колледжлеринде кадрларды таярлаў, заманагөй талапларды есапқа ала отырып, жаңа оқыўлықлар жаратыў, тоғай хожалығы ушын кадрлар таярлайтуғын профессионал колледжлерди маман, арнаўлы билимге ийе оқытыўшылар менен күшейтиўге итибар қаратылған.

Қабыл етилген ҳүжжетлерде тоғай хожалығы системасы ушын кадр таярлайтуғын профессионал кәсип-өнер колледжлерин питкериўшилерге өзлери таңлаған кәсип бағдарлары бойынша жумысқа орналасыўға көмеклесиў ҳәм қадағалаўды күшейтиў бойынша тапсырма берилген.

Оқыў процесин әмелият пенен өз-ара байланыстырыў, зәрүр оқыў өндирислик базаны қәлиплестириў мақсетинде қәнигелескен профессионал кәсип-өнер колледжлерин анық мәмлекетлик тоғай хожалықларына бириктириў бойынша қарар қабыл етилген.

Пәрман ҳәм қарардың әмелге асырылыўы:

республикада мәмлекетлик тоғай қорының мәмлекет тәрепинен басқарылыў нәтийжелилигин арттырады ҳәм тараўдың жумысын сапа жағынан жаңа басқышқа көтереди;

тоғай ресурсларынан нәтийжели ҳәм ақылға муўапық пайдаланыў ҳәм оларды қайта тиклеў, кең көлемде көбейтиўди енгизиў, тоғайларды қорғаў және олардан нәтийжели пайдаланыў, санаат көлеминде сән беретуғын ҳәм мийўели тереклер менен путалардың плантацияларын жетистириўди кеңейтиўди тәмийинлейди;

республикамыздың топырақ-ықлым шараятларына сәйкеслестирилген сән беретуғын ҳәм мийўели тереклер менен путалар нәллериниң жаңа сортларын жаратыў, илимий тийкарланған перспективалы технологияларды ислеп шығыў, экспортқа қолайлы нәллердиң жаңа сортларын, селекция жумысларының нәтийжелилигин арттырады;

тоғай қоры потенциалынан буннан былай да нәтийжели пайдаланыў, аймақлардың экологиялық жағдайын жақсылаў, қосымша дәрамат  алыўға ҳәм жаңа жумыс орынларын жаратыўға ерисиледи;

дәрилик өсимликлерди мәдений тәризде жетистириўге және оларды терең қайта ислеўгеқәнигелескен шөлкемлер дүзилиўине ерисиледи;

тутыныў базарының аўыл хожалығы, соның ишинде, пал ҳәррешилик, балықшылық, шарўашылық өнимлери ҳәм халық тутыныў товарлары менен толықтырылыўын тәмийинлейди.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF