Еркин Қарақалпақстан Вести Каракалпакстана 05:43:59, 26.06.2019
Хош келипсиз! | RSS
Сайт мазмуны

Кириў усылы

ӨЗБЕКИСТАН РЕСПУБЛИКАСЫ ПРЕЗИДЕНТИ ЖАНЫНДАҒЫ ИСБИЛЕРМЕНЛИК СУБъЕКТЛЕРИНИҢ ҲУҚЫҚЛАРЫН ҲӘМ НЫЗАМЛЫ МӘПЛЕРИН ҚОРҒАЎ БОЙЫНША ЎӘКИЛИ ИНСТИТУТЫН ШӨЛКЕМЛЕСТИРИЎ ҲАҚҚЫНДА Өзбекистан Республикасы ПрезидентиниҢ пӘрманы

Исбилерменлик субъектлериниң ҳуқықларын ҳәм нызамлы мәплерин қорғаў кепилликлерин күшейтиў, олардың жумысына мәмлекетлик уйымлардың тийкарсыз араласыўының алдын алыў, жеке меншикке қол қатылмаслықтың ҳуқықый механизмлерин буннан былай да беккемлеў, сондай-ақ, исбилерменлик субъектлери ҳуқықларының үстинлиги принципин тәмийинлеў мақсетинде:

1. Өзбекистан Республикасы Президенти жанындағы Исбилерменлик субъектлериниң ҳуқықларын ҳәм нызамлы мәплерин қорғаў бойынша ўәкили институты (кейинги орынларда Исбилерменлердиң ҳуқықларын қорғаў бойынша ўәкил деп аталады) шөлкем­лестирилсин.

2. Исбилерменлердиң ҳуқықларын қорғаў бойынша ўәкилдиң тийкарғы ўазыйпалары ҳәм жумыс бағдарлары етип төмендегилер белгиленсин:

исбилерменлик жумысын раўажландырыў, исбилерменлик субъектлериниң ҳуқықларын ҳәм нызамлы мәплерин қорғаў саласында мәмлекетлик сиясатты қәлиплестириўде ҳәм әмелге асырыўда қатнасыў;

мәмлекетлик уйымлар, соның ишинде, ҳуқық қорғаў ҳәм қадағалаў ведомстволары тәрепинен исбилерменлик субъектлериниң ҳуқықларына ҳәм нызамлы мәплерине әмел етилиўи бойынша қадағалаўды әмелге асырыў;

исбилерменлик субъектлериниң жумысы тексерилип атырғанда оларды ҳуқықый қоллап-қуўатлаў;

исбилерменлик жумысы еркинлигиниң кепилликлери ҳаққындағы нызам ҳүжжетлери нормаларының ҳәм талапларының әмелде жүзеге шығарылып атырғанлығын үйрениў;

қабыл етилген нормативлик-ҳуқықый ҳүжжетлердиң исбилерменлик жумысының әмелге асырылыўына тәсир көрсетиў нәтийжелилигин баҳалаў;

исбилерменлик субъектлериниң ҳуқықый кепиликлерин беккемлеўге, олардың раўажланыўын хошаметлеўге қаратылған нызамшылықты жетилистириў бойынша усыныслар таярлаў.

3. Төмендегилер:

Исбилерменлердиң ҳуқықларын қорғаў бойынша ўәкил өз ўәкилликлерин бий­ғәрез ҳәм мәмлекетлик уйымларға, олардың лаўазымлы шахс­ларына бойсынбаған түрде әмелге асыратуғыны, өз жумысында Өзбекистан Республикасы Президентине есап беретуғыны;

Исбилерменлердиң ҳуқықларын қорғаў бойынша ўәкил Өзбекистан Республикасы Президентине системалы түрде мәмлекетлик уйымлар, соның ишинде, ҳуқық қорғаў ҳәм қадағалаў ведомстволары тәрепинен исбилерменлик субъектлериниң ҳуқықларын ҳәм нызамлы мәплерин қорғаў ҳаққындағы нызам ҳүжжетлерине әмел етиў жағдайы ҳаққындағы мәлимлемени усынатуғыны;

Исбилерменлердиң ҳуқықларын қорғаў бойынша ўәкил ҳәм оның орынбасары Өзбекистан Республикасы Президенти тәрепинен лаўазымға тайынланатуғыны ҳәм лаўазымнан азат етилетуғыны;

Исбилерменлердиң ҳуқықларын қорғаў бойынша ўәкил статусы, мийнет ҳақы, медициналық ҳәм транспорт тәмийнаты шараятларына бола Өзбекистан Республикасы Президенти Мәмлекетлик мәслә­ҳәтшисиниң орынбасарына, Исбилерменлердиң ҳуқықларын қорғаў бойынша ўәкилдиң орынбасары болса — Өзбекистан Республикасы Президентиниң аппаратының сыңар баслығына теңлестирилетуғыны;

Исбилерменлердиң ҳуқықларын қорғаў бойынша ўәкилдиң жумысы юридикалық шахс есапланған Исбилерменлердиң ҳуқықларын қорғаў бойынша ўәкил аппараты тәрепинен тәмийинленетуғыны;

Исбилерменлердиң ҳуқықларын қорғаў бойынша ўәкил аппаратының хызметкерлери Исбилерменлердиң ҳуқықларын қорғаў бойынша ўәкил тәрепинен лаўазымға тайынланатуғыны ҳәм лаўазымынан азат етилетуғыны, олар­ға Өзбекистан Республикасы Президенти аппараты хызметкерлери ушын белгиленген медициналық хызмет көрсетиў, материаллық хошаметлеў ҳәм мийнетке ҳақы төлеў шараятлары енгизилетуғыны белгилеп қойылсын.

4. Өзбекистан Республикасы Президенти жанындағы Исбилерменлик субъектлериниң ҳуқықларын ҳәм нызамлы мәплерин қорғаў бойынша ўәкил аппараты хызметкерлериниң шекленген саны 8 ден ибарат болған структурасы 1-қосымшаға муўапық тастыйықлансын.

5. Исбилерменлердиң ҳуқықларын қорғаў бойынша ўәкилге:

исбилерменлик субъектлериниң ҳуқықларына ҳәм нызамлы мәплерине әмел етиўге байланыслы нызам ҳүжжетлери мәмлекетлик уйымлар, соның ишинде, ҳуқық қорғаў ҳәм қадағалаў ведомстволары тәрепинен сөзсиз орынланыўын үйрениў;

исбилерменлик субъектлери жумысында тексериўлер әмелге асырылыўы нызамлылығының мониторингин алып барыў, исбилерменлик субъект­лериниң жумысына нызамсыз араласыў жағдайларының алдын алыў мақсетинде комплексли илажлар көриў бойынша усыныслар киргизиў;

исбилерменлик субъектлериниң ҳуқықларына ҳәм нызамлы мәплерине әмел етиў бойынша нызам ҳүжжетлериниң бузылыўы мүмкин емеслиги ҳаққында мәмлекетлик уйымлардың ҳәм басқа да шөлкемлердиң лаўазымлы шахсларын жазба түрде ескертиў;

мәмлекетлик уйымлардың ҳәм басқа да шөлкемлердиң басшыларына белгиленген мүддетлерде көрип шығылыўы мәжбүрий болған анықланған нызам бузылыў жағдайларын, оларға имканият беретуғын себеплерди ҳәм шараятларды сапластырыў ҳаққында усыныс киргизиў;

исбилерменлик субъектлериниң мәплерин гөзлеп судлар­ға мәмлекетлик бажы төлеместен арзалар ҳәм даўалар менен мүрәжат етиў;

мәмлекетлик уйымлардан ҳәм шөлкемлерден өз ўәкиллигине киретуғын мәселелер бо­йынша статистикалық, талқыланған материалларды, шешимлерди ҳәм басқа да мәлимлемелерди сораў ҳәм алыў;

мәмлекетлик уйымлардың исбилерменлик субъектлериниң ҳуқықларын ҳәм нызамлы мәплерин қорғаў мәселелерин көрип шығыўға байланыслы мәжилислеринде қатнасыў;

зәрүрлик туўылған жағдайларда өзине жүкленген ўазыйпаларды әмелге асырыў ушын мәмлекетлик уйымлар, илимий мәкемелердиң ҳәм басқа да шөлкемлердиң басшыларын және қәнигелерин тартыў, жумысшы топарларды шөлкем­лестириў ҳуқықы берилсин.

6. Өзбекистан Республикасы Президенти аппараты Сия­сий-ҳуқықый мәселелер хызмети мәпдар министрликлер ҳәм ведомстволар менен биргеликте Өзбекистан Республикасы Олий Мажлиси Нызамшылық палатасына киргизиў ушын еки ай мүддетте «Өзбекистан Республикасы Президенти жанындағы Исбилерменлик субъектлериниң ҳуқықларын ҳәм нызамлы мәплерин қорғаў бойынша ўәкил ҳаққында»ғы Өзбекистан Республикасы Нызам жойбарын ислеп шықсын.

7. Өзбекистан Республикасы Министрлер Кабинети бир ай мүддетте:

Исбилерменлердиң ҳуқықларын қорғаў бойынша ўәкил аппаратының жумысын нәтийжели шөлкемлестириў ушын зәрүр шөлкемлестириўшилик, қаржылық ҳәм материаллық-техникалық мәселелердиң шешилиўин;

Исбилерменлердиң ҳуқықларын қорғаў бойынша ўәкил ҳәм оның аппаратын орналастырыў ушын қолайлы имарат (бөлмелер)тың ажыратылыўын тәмийинлесин.

8. Өзбекистан Республикасы Мәлимлеме технологияларын ҳәм коммуникацияларын раўажландырыў министрлиги Исбилерменлердиң ҳуқықларын қорғаў бойынша ўәкилдиң аппаратын зәрүрли байланыс қураллары ҳәм түрлери, соның ишинде, ҳүкиметлик байланыс қураллары менен тәмийинлениўин, сондай-ақ, кең полосалы интернет тармағына жалғаныўын тәмийинлесин.

9. Өзбекистан Республикасы Президентиниң айрым ҳүжжетлерине 2-қосымшаға муўапық қосымшалар киргизилсин.

10. Усы Пәрманның орынланыўын қадағалаў Өзбекистан Республикасының Бас минис­три А.Н.Ариповқа ҳәм Өзбекистан Республикасы Президентиниң Мәмлекетлик мәс­ләҳәтшиси О.Б.Муродовқа жүкленсин.

Өзбекистан Республикасы Президенти  Ш.МИРЗИЁЕВ.

Ташкент қаласы, 2017-жыл 5-май.

ӨЗБЕКИСТАН РЕСПУБЛИКАСЫ ПРЕЗИДЕНТИ ЖАНЫНДАҒЫ ИСБИЛЕРМЕНЛИК СУБъЕКТЛЕРИНИҢ ҲУҚЫҚЛАРЫН ҲӘМ НЫЗАМЛЫ МӘПЛЕРИН ҚОРҒАЎ БОЙЫНША ЎӘКИЛИ ИНСТИТУТЫН ШӨЛКЕМЛЕСТИРИЎ ҲАҚҚЫНДА

Өзбекистан Республикасы ПрезидентиниҢ пӘрманы

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF