Еркин Қарақалпақстан Вести Каракалпакстана 18:32:42, 07.03.2021
Хош келипсиз! | RSS
Сайт мазмуны

Кириў усылы

МҮРӘЖАТЛАР РЕСПУБЛИКА БАСШЫСЫ ТАЛҚЫСЫНДА

«Халық мәмлекетлик ведомстволарға емес, мәмлекетлик ведомстволар хал­қымызға хызмет етиўи керек  ҳәм бул ҳақыйқатты бәринен бурын барлық буўындағы басшылар жақсы түсинип алыўы зәрүр». Өзбекистан Республикасы Конститу­циясының 24 жыллығына бағышланып өткерилген салтанатлы мәресимде Президентимиз Ш.Мирзиёев тәрепинен  билдирилген бул пикир бүгинги күнге келип жәмийетимиз турмыс тәризиниң тийкарғы өлшемине айланған. Тиккелей елимиз басшысының басламасы менен орынларда шөлкемлестирилген Халық қабыллаўханалары пуқараларымыздың мүрәжатларын тыңлап, тилек-өтинишлерин орынлаўда мәмлекет ҳәм халық арасында әҳмийетли көпир ўазыйпасын атқарып атыр.

Шемби күни Қарақалпақстан Республикасы Жоқарғы Кеңесиниң Баслығы М.Ерниязов Хожели районында болып, бул жердеги Халық қабыллаўханасы жумыслары, район пуқаралары тәрепинен оған келип түскен мүрәжатлар менен танысты. Усы мүнәсибет пенен район ҳәкимиятының мәжилислер залында болып өткен ушырасыўда минис­трликлер ҳәм ведомстволардың басшылары, ҳәр қыйлы тараў ўәкиллери, пуқаралар жыйынларының хызметкерлери ҳәм район белсендилериниң қатнасында 20 дан аслам пуқараның мүрәжатлары жақыннан үйренип шығылды. Республикамыз басшысы тийкарынан ис ҳақы, медицина, турақ жай, ишимлик суўы, тәбийғый газ бенен тәмийинлеў, абаданластырыў, жолларды асфальтлаў, канализацияларды оңлаў, бәнтлик, транспорт машқалалары орын алған бул мүрәжатларды нызамлы жол менен шешип бериў бойынша тийисли тараў ўәкиллерине ай­қын тапсырмалар берди. «Халық пенен пикирлесиў ҳәм инсан мәплери жылы»ның тий­кар­ғы мақсет ҳәм ўазыйпаларынан келип шыға отырып, мәмлекетлик уйымлардың пуқаралар менен өз-ара мүнәсибетлери бойынша көзқарасын түп-тийкарынан қайта көрип шығыў зәрүрлигин, бул бо­йынша халық пенен турақлы пикирлесиў, оларды қыйнап киятырған машқалаларды шешиўдиң жаңа механизмлери менен нәтийжели усылларын енгизиў кереклигин айрықша атап өтти.

— Көп жыллардан берли бизди ишимлик суў мәселеси қыйнап киятырған еди, — «Қарақалпақстан» хожалығындағы «Қолап» аўыл пуқаралар жыйыны турғыны Оспан Жуманазаров. — Усы машқала бойынша районымызда шөлкемлестирилген Халық қабыллаўханасына мүрәжат еттик. Бул мүрәжатымыз тез күнлерде өзиниң унамлы шешимин табады деген үмиттемиз...

Президентимиз Ш.Мирзиёевтың атап өткениндей, адамлардың дәртин тыңлаў, олар менен ашық-айдын пикирлесиў, аўырын жеңил етиў — халықтың мәмлекетке ҳәм жәмийетке исенимин беккемлеўге хызмет етеди. Ҳақыйқатында да, халықтың арасына еле де тереңирек кирип барып, пуқараларымызды қыйнап жүрген мәселе ҳәм машқалаларды орынлардың өзинде шешиў олардың ҳүкиметимизге, ақырғы жуўмақта болса айдын келешегимизге болған исенимин және де арттырары сөзсиз.

С.ЖАНИЕВ, арнаўлы хабаршымыз.

Хожели районы.

СҮЎРЕТТЕ: ушырасыўдан көринис.

Автордың түсирген сүўрети.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF