Еркин Қарақалпақстан Вести Каракалпакстана 10:16:15, 04.07.2020
Хош келипсиз! | RSS
Сайт мазмуны

Кириў усылы

МЫНАЎ ­ БАЛАЛАР БАҚШАСЫ, АНАЎ ­ МЕКТЕП, ПОЛИКЛИНИКА…

Қырыққыз ­ Үстирттеги географиялық картаға түспеген, бурынғы ўақытта тек газге пәт бериўши станция менен темиржолшылар разъези бар, шарўалары қасқырға ма яки ийтине «Ақшолақ» деп ат қойыўына байланыстырған кишигирим елатлы пункт еди. Ғәрезсизлик жылларында жер асты ҳәм үсти байлықларын ел ийгилигине инам еткен тегисликте Қоңырат сода заводы менен Үстирт газ-химия комплекслери қурылғаны тарийхый ўақыя болды. Бүгинги күнге келип, турғынлары менен комплексте ислеўшилер санын қосса 4 мыңнан асатуғын жаслар қалашасына айланды. Демек, турақ жайлар қатары жаңадан мектеп, балалар бақшасы ҳәм емлеў орынларын салыў изли-изинен қолға алынбақта.

Жыл басында жуўапкершилиги шекленген  «УзКоргаз» жәмийети бас буйыртпашы сыпатында бул социаллық турмыс объектлерин халықаралық тендерге қойғанда жеңимпаз болған «Eler» компаниясы менен шәртнама тийкарында жумысты бөлип алып ислеўши Қашқадәрьяның жуўапкершилиги шекленген «ALRUT-BUILD» жәмийети 384 оқыўшыға мөлшерленген улыўма билим беретуғын мектеп, 140 орынлық балалар бақшасы ҳәм бир жумыс күнинде 140 наўқасты қабыллаў мүмкиншилигине ийе поликлиника қурылысын февраль айында баслап, ғәрезсизлигимиздиң 26 жыллық байрамы ҳүрметине тапсырыўды жобаластырып отыр.

Қурылыс штабы баслығы Әбдисамад Қыдыров пенен тырнақлары қаланып, дәслепки қабатларына гербиш өриў жумыслары басланып кеткен объектлерди аралап, ҳармасын айттық.

­ Үстирт ҳаққында бираз нәрселерди оқып еситсек те, көз бенен көргенге жетпес екен. Қыстағы суўығына шыдасып, жазы ыссы боларын еситип атырмыз. Мынаў ­ балалар бақшасы, анаў – мектеп, поликлиника қурылысын ашық аспан, кең жазық далаңлықта ҳақ нийетли адамлар менен ислескен қандай жақсы. Кеўлимиздиң толған жери, Қарақалпақстанда, Үстиртте үлкен-үлкен қурылысларды қурған жергиликли кәсиплеслеримиз мол тәжирийбелер топлапты. Жәмийетимиздеги 200 ден аслам қурылысшы-монтажлаўшылардың тең жартысынан көбирегин олар тутады. Жумыстың көлеми ҳәм ўақтына қарай және 50 қурылысшыны иске шақырдық…

Өнимли ҳәм сапалы мийнет етиў ушын адамларға ғамқорлық пенен қурылыс материалларының өз ўақтында иркинишсиз жеткизилиўи тийкар болады. Қаратаў карьеринен қыйыршық таслар менен еленген қум, Нөкис ҳәм Хожели заводларынан тас гербиш, «Қызылқум»нан цемент, басқа да керекли қурылыс материалларын өз ўақтында алып турмыз.  10 нан аслам арнаўлы механизмлер тынымсыз ислетилмекте. Қурылыстың биринши күнинен баслап-ақ ылғаллы мийнетлери менен көзге түскенлерден А.Шукуров, прораблардан А.Халиқов, А.Хожаназаров, Ф.Ҳамраев, тәмийинлеўши Ф.Досмуратов, бригадирлерден М.Кенжаев, Т.Қыдырниязов, С.Абдуллаев, И.Төрехановлардың атларын ҳүрмет пенен тилге алғым келеди.Ислеўшилеримиз барлық қолайлылықларға ийе жатақханаларға жайласқан. Күнине үш мезгил ыссы аўқат, шай-суўын таярлап бериўде аспазларымыздан Н.Ибрагимова, Э.Өтежанова, А.Жаңабаевалардың кеше-күндизги мийнетлерине ҳәмме рийза.

Ҳәр ким өз жумысларын билип, бақырыс-шақырыссыз исленгенине сүйсинистик. Қолы қолына тиймей, шырпа-шырп гербиш өрген қоңыратлы Теңел Қыдырниязовтың атына бираз мақтаў сөзлер айтылған еди.

­ Дәслеп сода заводы, соңынан Үстирт газ-химия комплексин салыўға белсене қатнастым. Көрип турсыз, жумыстың бели үзилмеди…

Үстирттен бахтын тапқан геодезист Оразалы Сарыбаев жер бойынша қәниге. Келиншеги Зухра жәмийетте мийирбийке болып ислейди. Жақында үлги ретинде салынған турақ жайға көшип өткен.

Жоқары сана-сезимли, илим-техниканы кәсиплик шеберлигине бирлестирген заманласларымыз мисли ертеклердегидей көзди ашып жумғанша тақыр жерлерге үлкен қурылыслар қурып атырғаны қуўандырады.

Ө.ӨТЕЎЛИЕВ, өз хабаршымыз.

Қоңырат районы.

СҮЎРЕТЛЕРДЕ: 1. (Солдан оңға қарай) Гербиш өриўшилер бригадасының бригадири Қ.Қурбанов, штаб баслығы, аға инженер Ә.Қыдыров ҳәм прораб Ф.Ҳамраевлар қурылыс барысын көзден өткермекте. 2. Тегисликтиң пор топырақлары ыдырап кетпеси ушын тырнағын қарамай менен майлап атырған А.Өтепбергенов пенен прораб Ф.Ҳамраевтың жумыслары жүдә жуўапкершиликли. 3. Гербиш өриўши Т.Қыдырниязов ҳәм Б.Дәўлетмуратовлардың исинен мүлтик таппайсаң. 4. Геодезист О.Сарыбаев истиң сапалы болыўына айрықша кеўил бөледи.

Автордың түсирген сүўретлери.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF