Еркин Қарақалпақстан Вести Каракалпакстана 18:16:55, 02.07.2020
Хош келипсиз! | RSS
Сайт мазмуны

Кириў усылы

ИНСАН ҲУҚЫҚ ҲӘМ ЕРКИНЛИКЛЕРИ — ЖОҚАРЫ ҚӘДИРИЯТ

Өткен шемби күни Халық депутатлары Қоңырат районлық Кеңесиниң ХХ сессиясы селектор тәризинде болып өтти. Сессияға Олий Мажлис Нызамшылық палатасының ҳәм Қарақалпақстан Республикасы Жоқарғы Кеңесиниң, районлық Кеңестиң депутатлары, бир қатар минис­трлик ҳәм шөлкемлердиң, ҳуқық қорғаў ҳәм пуқаралардың өзин-өзи басқарыў уйымлары басшылары, исбилерменлик субъектлериниң ўәкиллери қатнас­ты.

Өзбекистан Республикасы Президенти Шавкат Мирзиёевтың Өзбекистан Республикасы Конституциясының 24 жыллығына бағышланған салтанатлы мәресимдеF «Парламентлик ҳәм жәмийетлик қадағалаўдың тәсиршең механизмин қәлиплестириў мақсетинде қала ҳәм районларда ҳақыйқый жағдайды үйренип, тийисли басшылардың есабатын халық депутатлары Кеңеслери сессиясы додалаўына киргизиў тәртибин турмыстың өзи талап етпекте. Ҳәр бир ўәлаяттан сайланған Олий Мажлис депутатлары ҳәм сенаторлар ҳәр айда он-он еки күн даўамында бир ра­йонда болып, өзлери сайланған аймақтағы атқарыўшы ҳәкимият органы, прокуратура ҳәм ишки ислер бөлими жумысларын үйренип анализ етиўи ҳәм тийисли жуўмақ бериўи мақсетке муўапық болар еди» деген пикирди билдирген еди. Президентимиздиң бул ўазыйпасының орынланыўын тәмийинлеў мақсетинде усы айдың басынан баслап Олий Мажлис Нызамшылық палатасы депутатлары районда болып, халықтың турмыс дәрежесин және де жақсылаў, пуқаралардың ҳуқық ҳәм еркинликлерин тәмийинлеў бағдарында алып барылып атырған жумыслар ҳәр тәреплеме үйренип шығылды.

Сессия күн тәртибине киргизилген «Олий Мажлис Нызамшылық палатасы депутатлары тәрепинен усы жылдың 10-9-апрель күнлери Қоңырат районында аймақты раўажландырыўдың ең әҳмийетли ўазыйпаларын шешиўге, пуқаралардың ҳуқықлары ҳәм еркинликлерин тәмийинлеўге байланыслы өткерилген үйрениў нәтийжелери ҳаққында»ғы мәселе бойынша Олий Мажлис Нызамшылық палатасы депутаты, исши топар ағзасы Н.Айтжанова баянат жасады.

Районды социал-экономикалық жақтан раўажландырыў, халықтың турмыс дәрежесин жақсылаўда, оларды ойландырып жүрген машқалаларды сапластырыўға, елимиздиң раўажланыўын жаңа басқышқа алып шығыўға қаратылған Президентимиздиң қабыл еткен Пәрман ҳәм қарарлары орынларда халық тәрепинен қоллап-қуўатланып, ең әҳмийетлиси олардың орынланыўына үлкен итибар қаратылып атырғаны айрықша атап өтилди ҳәм орын алып атырған кемшиликлерге де сын көзқарастан, ашық-айдын баҳа берилди.

Үйрениў нәтийжелери ҳәм әмелге асырылыўы тийис болған баслы ўазыйпалар бойынша район ҳәкими Ш.Темирбаев, районлық прокуратура, медицина бирлеспеси, ишки ислер бөлими баслықлары шығып сөйлеп, күн тәртибиндеги мәселе бойынша өзлериниң пикир ҳәм усынысларын билдирип өтти.

Сессияның жумысына Өзбекистан Республикасы Олий Мажлиси Нызамшылық палатасының Спикери Н.Исмайлов, Қарақалпақстан Республикасы Жоқарғы Кеңеси Баслығының орынбасары А.Ҳамраев қатнасты ҳәм кең түрде шығып сөйледи.

Сессияда көрип шығылған мәселелер бойынша тийисли қарар қабыл етилди.

Қ.МӘМБЕТНИЯЗОВ.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF