Еркин Қарақалпақстан Вести Каракалпакстана 18:18:50, 02.07.2020
Хош келипсиз! | RSS
Сайт мазмуны

Кириў усылы

ИНГЛИС ТИЛИ БОЙЫНША БИРИНШИ ДОКТОР

Инсан тәбияты солай жаратылған. Ол саналы түрде өз қатарлары арасында биринши болыўға тырысады. Лекин, «Жүз­ден жүйрик, мыңнан тулпар шығады» дегендей, тек турмыста бахты күлип, аты озғанларға ғана бириншилик несип етеди. Мәселен, елимиздиң биринши илим докторы Нәжим Дәўқараев, академигимиз Марат Нурмуҳаммедов, бокс бо­йынша Азия ойынлары жеңимпазы Алишер Әўезбаев, муай тай бойынша жәҳән чемпионы Еркинбай Қуты­баевларды халқымыз бәрҳа мақтаныш етеди.

Тахтакөпир районы республикамыздың социал-экономикалық ҳәм жәмийетлик-сиясий турмысында айрықша орын тутатуғын белгили елатлардың бири. “әрезсизликтен соң да бул аймақта көплеген өзгерис ҳәм жаңаланыўлар жүз берди. Бир қатар тахтакөпиршилер өзиниң үлгили ислери менен кең жәмийетшиликке танылып, мәмлекетимиздиң жоқары атақ ҳәм сыйлықларына миясар болды. Олардан Өзбекистан Қаҳарманлары — Ағытай Әдилов, Сәрсенбай Сейт­назаров, Зульфия атындағы мәмлекетлик сыйлықтың лауреатлары — Қумар Бег­ниязова ҳәм Айжамал Жолдасбаеваларды айрықша атап өтсек орынлы болады. Өткен жылдың июнь айын­да және бир тахтакөпирши қыздың усындай тарийхый табысы пүткил аўылласлары сыяқлы елимиздиң зыялыларын да шексиз қуўанышқа бөледи десек ҳешқандай алжаспаған боламыз. Бул қанатлы хабар себепшиси инглис тили бойынша Қарақалпақстанның биринши илим докторы Халифа Палўанова болып табылады.

Педагоглар шаңарағында туўылып камалға келген Халифа ҳәм оның туўысқанларының ҳәзирги заманға сай тәлим-тәрбия алыўы ушын ата-анасы Дәрибай Палўанов ҳәм “умша Низаматдиновалар тәрепинен барлық қолайлы шараятлар жаратып берилди. Нәтийжеде шаңарақтағы бес перзенттиң үшеўи муғаллимшилик, екеўи шыпакерлик кәсибин таңлап, жоқары оқыў орынларын табыслы тамамлады. Әсиресе, Халифаның инглис тилин үйрениўге деген қызығыўшылығы оның Өзбекистан мәмлекетлик жәҳән тиллери университетине оқыўға түскеннен соң және де күшейди.

Студентлик дәўиринде өзине жаратылған қолайлы шараят, тәжирийбели устазлардың көрсеткен жол-жоба ҳәм мәсләҳәтлеринен орынлы пайдаланған ол қатар-қурбылары арасында өзиниң билим-илим ийелеўге деген қызығыўшылығы менен ажыралып турды ҳәм зийреклиги, билимлилиги арқасында 2002-жылы Әлишер Наўайы атындағы мәмлекетлик, 2003-жылы болса Президент стипендиясына ылайық деп табылды. Халифаның бул ерискен табыслары оның келешегине айдын жол ашты ҳәм 2003-жылы өзи тәлим алған дәргайдың магистратурасына имтихансыз қабылланып, 2005-жылы филология илимлериниң докторы, профессор Махфуза Расулованың басшылығында «Изучение экологический лексики в английском языке на примере Аральского море» деген темада магистрлық жумысын табыслы қорғап шықты. 2005-жылы болса, усы оқыў дәргайының аспирантурасына оқыўға түсип, 2008-жылы тамамлады. Соңынан Халифа университеттиң инглис тили фонетикасы ҳәм фонологиясы кафедрасына жумысқа алып қалынып, елимиз жасларына тәлим берди. Соның менен бирге, ол өзиниң илимий изленислерин тоқтатпастан еркин излениўши сыпатында устазы, филология илимлериниң докторы, профессор Гүландам Бакие­ваның басшылығында «Инглис, өзбек, қарақалпақ ҳәм орыс тиллеринде экологиялық терминлердиң деривацион семантикалық принциплери» деген темада изертлеўлер жүргизеди.

Изертлеўлер нәтийжесинде жүзеге келген мәселелер бойынша Өзбекистаннан тысқары Россия, Қазақстан, Қубла Корея ҳәм Ҳиндстан мәмлекетлериниң илимий журналларына өз мақалалары менен қатнасып, жәмийетшилик арасында жаңа пикирлерди оятты ҳәм бирқанша илимий монографиялардың авторына айланды. Жерлесимиздиң усындай машақатлы илимий мийнетлери өз жемисин берип, ол 2016-жылдың июнь айында Ташкент мәмлекетлик Шы­ғыс­таныў институты жанындағы Илимий Кеңестиң нәўбеттеги мәжилисинде өзиниң жоқарыда аты көрсетилген илимий жумысын табыслы қор­ғап шығады ҳәм филология илимлериниң докторы дәрежесине ылайық деп табылды.

— Мениң бундай жетискенликлерге ерисиўиме себепши болған ата-анам, мектеп ҳәм университетте жалықпастан тәлим-тәрбия берген устазларыма шексиз миннетдаршылық билдиремен,-дейди Халифа Пал­ўанова өз қуўанышлары менен бөлисе отырып. — Қарақалпақстанлылар арасында инглис тили бо­йынша биринши болып докторлық дәрежеге жетисиўим маған шексиз қуўаныш бағышлаўы менен бирге үлкен жуўапкершиликти де жүклейди. Алдағы ўақытлары хал­қымыздың исенимин  ақлап, буннан да көбирек мийнет ислеўге ҳәрекет етемен,-дейди жүзлери гүл-гүл жайнап.

Әлбетте, биз оған исенемиз ҳәм бул жолда ийгиликли нийетлер жолдасыңыз болсын, деймиз.

Ә.ОРАЗОВ.

СҮЎРЕТТЕ: Халифа Палўанова.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF