Еркин Қарақалпақстан Вести Каракалпакстана 15:49:47, 24.09.2020
Хош келипсиз! | RSS
Сайт мазмуны

Кириў усылы

ИСБИЛЕРМЕНЛИК  УШЫН ЖӘНЕ  ДЕ КЕҢ  ИМКАНИЯТЛАР

Президентимиз Шавкат Мирзиёевтың басшылығында бүгинги күнде пүткил елимизде, соның ишинде, Аралбойы аймағында да киши бизнес ҳәм жеке исбилерменликти раўажландырыў бойынша кең көлемли жумыслар әмелге асырылмақта.

Әсиресе, бул бағдарда салық ҳәм басқа да мәжбүрий төлемлерден жеңилликлер бериў және экспорт потенциалын буннан былай да арттырыў мақсетинде жол-транспорт қаржылары, бажыхана төлемлеринен преференциялар бериў бойынша бир қатар қарарлар қабыл етилди.

Елимизде исбилерменликке кең жол ашыў ҳәм исбилерменлер ушын жаратылып атырған жеңилликлер ҳәм имканиятлар ҳаққындағы мәселеге бағышланып усы жылдың 24-март күни Қарақалпақстан Республикасы Жоқарғы Кеңесинде мәжилис болып өтти.

Мәжилисти Қарақалпақстан Республикасы Жоқарғы Кеңесиниң Баслығы М.Ерниязов басқарып барды ҳәм елимизди, соның ишинде Аралбойы аймағын раўажландырыў бойынша алып барылып атырған кең көлемли жумысларға айрықша тоқтап өтти.

Өзбекистан Республикасы Экономика министри Галина Саидова ҳәм оның басшылығында келген исши топар ағзалары, сондай-ақ, экономика тараўы қәнигелери, исбилерменлер сөзге шығып, бүгинги күнде елимизде исбилерменликке қаратылып атырған жоқары итибар ҳәм оларға жаратып берилген имканиялар ҳаққында кең түрде сөз етти.

Бул бағдарда усы жылдың 17-март күни Президентимиз тәрепинен қабыл етилген «Қарақалпақстан Республикасы ҳәм Хорезм ўәлаятында исбилерменлик жумысын жүргизиўге қосымша қолайлы шараятлар жаратыў илажлары ҳаққында»ғы қарары экономикамызды буннан былай да беккемлеўде әҳмийетли орын ийелейди.

Қарар Қарақалпақстан Республикасының кәрханаларын, атап айтқанда, санаат бойынша 3 бағдарды, яғный, қурылыс материллары, электротехника ҳәм фармацевтика санаатлары кәрханалары ушын жүдә кең болған және бәсекиге шыдамлы жумыс орталығын жаратыўды өз ишине алады.

Бул ең дәслеп Қарақалпақстан Республикасы ҳәм Хорезм ўәлаятында дизимнен өткен ҳәм усы аймақларда жумыс алып барып атырған юридикалық тәреплердиң өз өнимлери экспортынан келип түсетуғын валюта түсимин мәжбүрий сатыўдан азат етилиўинде өзиниң көринисин табады. Яғный, алдын ири кәрханалардың экспортынан алынатуғын валюта түсимлериниң тең ярымы Миллий банкке сатылған болса, енди усы валюта түсиминиң толық суммасы кәрхана есабында қалдырылады.

Сондай-ақ, усы қарар менен Қарақалпақстан Республикасы ҳәм Хорезм ўәлаятында дизимнен өткен фармацевтика, электротехника ҳәм пардозлаў қурылыс материалларын ислеп шығарыўға қәнигелестирилген кәрханаларды усы жылдың 1-апрелинен баслап 2022-жылдың 1-январына шекем мүлк салығы, жер салығы, инфраструктураны раўажландырыў салығы және Республикалық жол фондына мәжбүрий төлемлерден азат етилетуғыны, бир қатар жеңилликлер ҳәм имканиятлар белгилеп қойылған.

Мәжилис қатнасыўшылары тийисли қәнигелерден өзлерин қызықтырған сораўларына жуўаплар алды.

C.ЖАНИЕВ.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF