Еркин Қарақалпақстан Вести Каракалпакстана 04:23:06, 23.03.2019
Хош келипсиз! | RSS
Сайт мазмуны

Кириў усылы

ӘДЕПЛИЛИКТИҢ ӘҲМИЙЕТИ

Инсан баласы өмирге келер екен, оған саламатлық, ырыс­қы-несийбе бериледи. «Болар бала, бес жасынан белгили» дегениндей, ол үлкейген сайын минез-қулқы анықласып барады. Соңынан ҳәр бир адам өзине жараса пазыйлетлерге ийе болады. Ҳеш бир жақсы ҳәм жаман қәсийетлер нәсилден-нәсилге берилмейди. Биз ақыллылық, тәртиплилик, ҳақ кеўиллилик, сабырлылық, кишипейиллилик, әлпайымлылық пазыйлетлерге ийе адамды әдепли, керисинше, тәртипсизлик, сабырсызлық, көргенсизлик, қызғаншақлық қәсийетлерге ийе адамды әдепсиз адам деп санаймыз. Сондай-ақ, адам өз-өзинен әдепли болып қәлиплеспейди. Буның ушын оған ҳәр тәреплеме туўры жол көрсетиў, жақсы тәлим-тәрбия талап етиледи.

Қатты тәртип көрсе бала күнинде,

Өнер менен қуўандырады түбинде.

Бала нени билсе, жастан уяда

Өле-өлгенше соны таныр қыядан.

(Юсуп Баласағуний).

Бул қатарларда келтирип өтилгениндей, жаслардың әдепли болып жетилисиўинде шаңарақтағы тәрбия, жәмәәт, оның дөгерегиндеги адамлар, кең жәмийетшилик ҳәм оқыў орынларының тутқан орны айрықша. Бунда, әсиресе, оқыў орынларында ислейтуғын устазлар менен баланың ата-анасы тығыз бирге ислессе, жақсы нәтийжелерге ерисиўге болады, деп ойлайман. Әдепли адамның әлпайымлығы ҳәм кишипейиллиги оның адамлар арасындағы жүрис-турысынан, қарым-қатнасынан белгили болады.

Ҳәзирги күнде елимиздеги барлық оқыў орынларында тәрбия саатлары өтилмекте. Бул жасларымызды үлкенлерге ҳүрмет, кишилерге иззет көрсетиў руўхында, әдепли етип тәрбиялаўда үлкен әҳмийетке ийе.

Меҳрибаным ПАЛЎАНОВА,

Нөкис политехника кәсип-өнер колледжи арнаўлы пән оқытыўшысы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF