Еркин Қарақалпақстан Вести Каракалпакстана 00:30:52, 22.05.2019
Хош келипсиз! | RSS
Сайт мазмуны

Кириў усылы

ТАШКЕНТ МӘЛИМЛЕМЕ ТЕХНОЛОГИЯЛАРЫ УНИВЕРСИТЕТИНИҢ ЖУМЫСЫН БУННАН БЫЛАЙ ДА ЖЕТИЛИСТИРИЎ ИЛАЖЛАРЫ ҲАҚҚЫНДА

Өзбекистан Республикасы Президентиниң Қарары

VIII-IX әсирлерде Шығыста жасап  дөретиўшилик пенен шуғылланған уллы илимпаз Муҳаммед ал-Хорезмий математика, геометрия, астрономия, тарийх, география ҳәм басқа да илимлерге байланыслы көплеген шығармалар жазған. Ол «ноль» санын ҳәм онлық санақ системасын және полюс координаталарын бириншилерден болып тийкарлап берген ҳәм әмелиятқа енгизген. Муҳаммед ал-Хорезмий алгебра пәнине ҳәм алгоритмлестириў теориясына тийкар сал­ған, илимий мағлыўматларды және трактатларды баянлаўдың анық қағыйдаларын ислеп шыққан.

Онлық санақ системасы, алгебра ҳәм алгоритмлестириў бағдарларында дүнья илимин раўажландырыў хызметлери улыўма тән алынған Шығыс илимпазлары арасында тек Муҳаммед ал-Хорезмийдиң шығармалары ҳәм атамасы илимий дөгереклерде кеңнен қолланылып киятырған «алгоритм» ҳәм «алгебра» сыяқлы заманагөй илимий атамаларда мәңгилестирилди. Бүгинги күнде жоқары технологияларға тийкарланған заманагөй мәлимлеме-коммуникация техноло­гиялары саласында орынланып атырған барлық есаплаў әмеллерине уллы илимпаз Муҳаммед ал-Хорезмийдиң илимий жаңалықлары тийкар болып хызмет етпекте.

Уллы илимпаз Муҳаммед ал-Хорезмийдиң айрықша ҳәм бийбаҳа мийрасын қәдирлеў, қәстерлеп сақлаўдың қаншелли әҳми­йетлилигин жас әўладтың сана-сезимине терең сиңдириў, сондай-ақ, жасларға тәлим-тәрбия бериў ҳәм илимниң жоқары шеклерин ийелеў ушын шараятлар жаратыў және республика экономикасының жетекши тармақлары ҳәм салалары ушын мәлимлеме-коммуникация техноло­гиялары саласында жоқары маманлықтағы қәнигелерди таярлаў системасын буннан былай да жетилистириў мақсетинде:

1. Өзбекистан Республикасы Мәлимлеме технологияларын ҳәм коммуникацияларын раўажландырыў министрлиги, Жоқары ҳәм орта арнаўлы билимлендириў министрлигиниң Ташкент мәлимлеме технологиялары университетине (кейинги орынларда — Университет деп аталады.) Муҳаммед ал-Хорезмийдиң атын бериў ҳаққындағы усынысы мақуллансын.

2. Өзбекистан Республикасы Мәлимлеме технологияларын ҳәм коммуникацияларын раўажландырыў министрлиги, Жоқары ҳәм орта арнаўлы билимлендириў министрлиги Өзбекистан Республикасы Илим ҳәм технологиялар агентлиги менен биргеликте 2017/2018-оқыў жылынан баслап Университетте уллы илимпаз Муҳаммед ал-Хорезмийдиң атын мәңгилестириў және оның уллы ҳәм бийбаҳа мийрасын кең үйрениўге байланыслы төмендеги илажларды әмелге асырсын:

экономиканың жетекши тармақларында ҳәм салаларында билимлендириў, илим ҳәм өндиристиң беккем байланысларын тәмийинлеў ушын мәлимлеме-коммуникация технологиялары саласында республикалық ҳәм халықаралық көлемде илимий-әмелий әнжуманлар шөлкем­лестириў;

жоқары билимлендириў мәкемелериниң студентлери арасында мәлимлеме-коммуникация технологиялары саласында, соның ишинде, бағдарламалық өнимлерди жаратыў бағдарында таңлаўлар ҳәм олимпиадалар өткериў;

Университеттиң талантлы студентлери ушын берилетуғын Муҳаммед ал-Хорезмий атындағы стипендияны енгизиў;

республиканың жетекши илимпазларының, атап айтқанда, академиклердиң ҳәм илим ғайраткерлериниң қатнасында жоқары билимлендириў мәкемелериниң студентлери, жас илимпазлар, профессор-оқытыўшылар менен илимий ушырасыўлар және дөгерек сәўбетлерин шөлкемлестириў;

математикалық модельлестириў, алгоритмлеў ҳәм криптология салаларында, компьютер ҳәм бағдарламалық инжиниринг, телекоммуникация ҳәм телевизиялық технологиялар, мәлимлеме қәўипсизлиги бағдарларында заманагөй оқыў әдебиятларын ислеп шығыў, олардың мультимедиалы әўладларын жаратыў және студентлердиң, илимпазлардың ҳәм педагоглардың усы оқыў әдебиятларынан еркин пайдаланыўы ушын оларды электрон ресурсларға орналастырыў;

ғалаба хабар қуралларында ҳәм «ZiyoNet» миллий билимлендириў тармағында уллы ағартыўшы, энциклопедист илимпаз Муҳаммед ал-Хорезмийдиң өмирин ҳәм дөретиўшилигин сәўлелендиретуғын мақалаларды және материалларды берип барыў;

заманагөй технологияларға тийкарлан­ған илимниң жаңа қырларын изертлеў ушын жаңа оқыў ҳәм илимий-изертлеў лабораторияларын шөлкемлестириў;

талантлы студентлердиң, жас илимпазлардың ҳәм профессор-оқытыўшылардың перспективалы илимий-изертлеў жумысларының нәтийжелери ҳәм илимий мақалалары күнделикли түрде жәрияланып барылатуғын «Муҳаммед ал-Хорезмий әўладлары» атамасындағы илимий журналды шөлкемлестириў;

2018-жылы Муҳаммед ал-Хорезмийдиң туўылған күниниң 1235 жыллығын кеңнен белгилеў бойынша илимий-әмелий ҳәм руўхый-ағартыўшылық илажларды әмелге асырыў.

3.Университет жанындағы Бағдарламалық өнимлер ҳәм аппарат бағдарламалық комплекслер жаратыў орайы тийкарында юридикалық тәреп статусына ийе болған Мәлимлеме-коммуникация технологиялары илимий-инновациялық орайы (кейинги орынларда Орай деп аталады) шөлкемлестирилсин ҳәм оның тийкарғы ўазыйпалары етип төмендегилер белгиленсин:

республика экономикасының жетекши тармақлары ҳәм салалары ушын реал талапларды есапқа алып, ишки ҳәм сыртқы базарларда бәсекиге шыдамлы, сапалы жергиликли бағдарламалық өнимлерди, бәринен бурын, Университетте билим алып атырған студентлерди кеңнен тарта отырып, ислеп шығыў;

мәлимлеме-коммуникация техноло­гиялары саласында илимий мектеплерди буннан былай да раўажландырыў, жас илимпазлардың ҳәм илимий-педагог хызметкерлердиң мийнетин хошаметлеў, олардың илимий-изертлеў және тәжирийбе-конструкторлық жумысларын коммер­цияластырыўды шөлкемлестириў;

экономиканың жетекши тармақлары ҳәм салаларының буйыртпалары тийкарында басқарыў, өндирис, бизнес ҳәм басқа да бағдарлардағы процесслерди автоматлас­тырыўды системалы илимий талқылаў, олардың модельлерин және алгоритмлерин ислеп шығыў ҳәм енгизиў;

республикада жоқары технологияларға тийкарланған техникалық ҳәм бағдарламалық өнимлерди жаратыў, импорттың орнын басатуғын қурылмаларды жергиликлилестириў ҳәм экспортқа жарамлы қурылмаларды ислеп шығыў бойынша фундаменталь және әмелий илимий-изертлеў жумысларын алып барыў;

мәмлекетлик илимий-техникалық грантлар ҳәм хожалық шәртнамалары тийкарында илимий-изертлеў жумысларын әмелге асырыў;

Университет студентлерин, қәнигелерин ҳәм жас илимий хызметкерлерди миллий бағдарламалық өнимлерди және аппарат бағдарламалық комплекслерди жаратыў бойынша илимий-изертлеў жойбарларына кеңнен тартыў;

шет еллердиң мәлимлеме-коммуникация технологиялары саласындағы алдынғы илимий-изертлеў орайлары менен өз-ара пайдалы бирге ислесиўди жолға қойыў.

4. Орай Университет жанындағы Бағдарламалық өнимлер ҳәм аппарат бағдарламалық комплекслер жаратыў орайының барлық ҳуқықлары ҳәм миннетлемелери бойынша ҳуқықый мийрасқоры болып есапланады.

5. Университет жанында юридикалық шахс статусына ийе болмаған Илимий-инновациялық раўажландырыў қоры (ке­йинги орынларда Қор деп аталады) шөлкемлестирилсин ҳәм оның қаржыларын қәлиплестириў дәреклери етип, мобиль байланыс хызметлерин көрсететуғын юридикалық тәреплер (уялы байланыс компаниялары) тәрепинен абонент санынан пайдаланғаны ушын төленетуғын төлемнен түсетуғын қаржылардың 1,0 проценти муғдарындағы ажыратпалар ҳәм нызам ҳүжжетлери менен қадаған етилмеген бас­қа да түсимлер белгиленсин.

6. Қор қаржыларынан пайдаланыўдың тийкарғы бағдарлары етип төмендегилер белгиленсин:

Университет ушын оқыўлық сабақлықларды ҳәм илимий әдебиятларды жаратыў ҳәм басып шығарыў, соның ишинде, шет ел әдебиятларын сатып алыў, оның талант­лы студентлери ушын берилетуғын Муҳаммед ал-Хорезмий атындағы стипендия қаржыларын қаплаў ҳәм «Муҳаммед ал-Хорезмий әўладлары» атамасындағы илимий журналдың басып шығарылыўын қаржылай қоллап-қуўатлаў;

Университет ҳәм Орайдың мәлимлеме технологияларын ҳәм коммуникацияларын раўажландырыў саласындағы илимий-изертлеў ҳәм тәжирийбе-конструкторлық жумысларын таңлаў тийкарында қаржыландырыў, олардың илимий ҳәм оқыў лабораторияларын заманагөй әсбап-үскенелер, зәрүрли жумсалатуғын материаллар ҳәм комплектлеўши бөлеклер менен тәмийинлеў;

Университеттиң талантлы студентлерин, профессор-оқытыўшыларын ҳәм жас илимий хызметкерлерди шет елдиң жетекши жоқары билимлендириў мәкемелеринде ҳәм илимий-изертлеў орайларында таярлаў, қайта таярлаў ҳәм маманлығын арттырыў, сондай-ақ, университетте сабақ өтиў ҳәм Орайда илимий изертлеўлер өткериў ушын жоқары маманлықтағы шет елли қәнигелер менен илимпазларды тартыў.

Қор қаржыларын басқарыў ўазыйпасы Университеттиң Қәўендерлик кеңесине жүкленсин.

7. Өзбекистан Республикасы Мәлимлеме технологияларын ҳәм коммуникация­ларын раўажландырыў министрлиги еки ай мүддетте:

Университет ҳәм Орайдың структурасын және уставын тастыйықласын ҳәм белгиленген тәртипте мәмлекетлик дизимнен өткерилиўин тәмийинлесин;

Өзбекистан Республикасы Қаржы министрлиги ҳәм басқа да мәпдар минис­трликлер ҳәм ведомстволар менен биргеликте Қор қаржыларын қәлиплестириў және оннан пайдаланыў тәртиби ҳаққындағы режени тастыйықлаў туўралы Ҳүкиметлик қарардың жойбарын киргизсин;

басқа да мәпдар министликлер ҳәм ведомстволар менен биргеликте нызам ҳүжжетлерине усы қарардан келип шығатуғын өзгерислер менен қосымшалар ҳаққында Министрлер Кеңесине усыныслар киргизсин.

8. Өзбекистан Республикасы Орайлық банкине ҳәм коммерциялық банклерге Университеттиң буйыртпалары бойынша Қор қаржылары есабынан шет елден сатып алынатуғын заманагөй илимий әсбап-үскенелер, комплектлеўши бөлеклер және шет елдиң илимий әдебиятлары ушын зәрүр болған пул қаржыларын конвертациялаў усыныс етилсин.

9. Өзбекистан Республикасы Президентиниң «Өзбекистан Республикасының 2017-жылғы тийкарғы макроэкономикалық көрсеткишлери болжаўы ҳәм Мәмлекетлик бюджет параметрлери ҳаққында»ғы 2016-жыл 27-декабрдеги ПҚ-2699-санлы қарарына қосымшаға муўапық өзгерислер киргизилсин.

10. Усы қарардың орынланыўын қадағалаў Өзбекистан Республикасының Бас министри А.Н.Ариповқа ҳәм Өзбекистан Республикасы Президентиниң Мәмлекетлик Кеңесгөйи  А.Н. Юнусходжаевларға жүкленсин.

Өзбекистан Республикасы Президенти Ш.МИРЗИЁЕВ.

Ташкент қаласы, 2017-жыл 15-март.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF