Еркин Қарақалпақстан Вести Каракалпакстана 22:19:14, 22.09.2019
Хош келипсиз! | RSS
Сайт мазмуны

Кириў усылы

ОРТА АРНАЎЛЫ, КӘСИП-ӨНЕР БИЛИМЛЕНДИРИЎИ МӘКЕМЕЛЕРИНИҢ ЖУМЫСЫН БУННАН БЫЛАЙ ДА ЖЕТИЛИСТИРИЎ ИЛАЖЛАРЫ ҲАҚҚЫНДА

Өзбекистан Республикасы Президентиниң Қарары

Академиялық лицейлерде оқыў процесиниң сапасын ҳәм нәтийжелилигин түп-тийкарынан арттырыў, академиялық лицейлерде улыўма билим бериў мектеплериниң ең қәбилетли питкериўшилерин жәмлеў, улыўма билим бериў мектеплери питкериўшилериниң таңлап алын­ған кәсиплерди ҳәм қәнигеликлерди ийелеп алыўға болған талабын қанаатландырыў ушын шараятларды буннан былай да кеңейтиў мақсетинде:

1. Өзбекистан Республикасы Экономика министрлиги, Қаржы министрлиги, Жоқары ҳәм орта арнаўлы билимлендириў министрлиги, Мәденият министрлиги, Денсаўлықты сақлаў министрлиги, Өзбекистан Республикасы Жоқары ҳәм орта арнаўлы билимлендириў минис­трлигиниң Орта арнаўлы, кәсип-өнер билимлендириўи орайының республикада жумыс алып барып атырған академиялық лицейлердиң санын оптималластырыўды, академиялық лицейлерде оқыў процесиниң сапасын түп-тийкарынан жақсылаў илажлары әмелге асырылыўын нәзерде тутатуғын, соның ишинде:

материаллық-техникалық ҳәм оқыў-педагогикалық базасы салыстырмалы түрде төмен дәрежели 1-қосымшаға муўапық төрт академиялық лицейди сапластырыў, сапластырылып атырған академиялық лицейлердиң 1-бас­қышларына оқыўшыларды қабыл етиўди 2017/2018-оқыў жылынан баслап тоқтатыў;

жумыс алып барыў көрсеткишлери ең төмен болған 2-қосымшаға муўапық 54 акаде­мия­лық лицейди басқышпа-бас­қыш кәсип-өнер колледжлерине айландырыў;

кәсип-өнер колледжлерине айландырылған академиялық лицейлердиң 2-ҳәм 3-басқышлары оқыўшыларының контингентин кәсип-өнер колледжлерине айландырылып атырған академиялық лицейлердиң имаратларында әмелдеги оқыў бағдарламалары ҳәм оқытыў шәртлери бойынша белгиленген тәртипте оқытыўды жуўмақлаў;

3-қосымшаға муўапық оқыў процесиниң нәтийжелилигин буннан былай да арттырыў ҳәм академиялық лицейлерди питкериўшилердиң жоқары оқыў орынларына оқыўға кириў көрсеткишлерин арттырыў илажлары бағдарламасы ҳаққындағы усынысы қабыл етилсин.

2. Алдын атап өтилгенлер менен биргеликте төмендегилер академиялық лицейлердиң әҳмийетли ўазыйпалары ҳәм жумыс бағдарлары етип белгиленсин:

улыўма билим бериў мектеплериниң ең қәбилетли оқыўшыларын таңлаў, олардың интеллектуаллық қәбилетлерин буннан былай да раўажландырыў ҳәм оқыўды жоқары оқыў орынларында даўам еттириўге мақсетли терең таярлаў;

оқыўшылардың дөретиўшилик потенциалының көриниўи ҳәм белсенди болыўға көмеклесетуғын, индивидуал талантларды және ҳәр бир оқыўшының қәбилетлери менен өзгешеликлерин есапқа ала отырып, билимлерди ийелеп алыў процесинде еркин жумыс көнликпелерин қәлиплестиретуғын ҳәм раўажландыратуғын билимлендириў орталығын жаратыў;

алдынғы жергиликли ҳәм сырт ел билимлендириў мәкемелериниң тәжирийбесин есапқа ала олтырып билимлендириў процесин шөлкемлестириўдиң заманагөй түрлерин енгизиў ҳәм оның мазмунын турақлы түрде жаңалап барыў.

3. Төмендегилер:

кәсип-өнер колледжлерине айландырылып атырған академиялық лицейлердиң 2-ҳәм 3-басқышларының оқыўшылары билим бериў жуўмақланғаннан соң жақын жерде жайласқан билимлендириў бағдары уқсас бол­ған академиялық лицейлерде жуўмақлаўшы мәмлекетлик аттестацияны тапсырады ҳәм мәмлекетлик үлгидеги акаде­миялық лицей питкериўшиси дипломын алатуғыны:

академиялық лицейлерде оқыў топарларының қурамы 26 оқыўшыдан артық болмаған тәризде қәлиплестирилетуғыны;

тереңлестирилип үйренилетуғын пәнлер (билимлендириў бағдарлары) бойынша акаде­миялық лицейлерде әмелий, лаборатория ҳәм семинар шынығыўлары топарларды еки киши топарға бөлиў жолы арқалы шөлкемлестирилетуғын киши топарларда өткерилетуғыны;

академиялық лицейлерде хызметкерлерди педагогикалық жумысқа тартыў жоқары мағлыўматлы ҳәм кеминде 5 жыл үзликсиз педагогикалық жумыс стажына ийе болған пуқаралардың арасынан таңлаў тийкарында әмелге асырылатуғыны;

академиялық лицейлер директорларының бос лаўазымларын ийелеўге таңлаўда қатнасыў ушын талабанлар бойынша усыныслар Орта арнаўлы, кәсип-өнер билимлендириўи системасы басқарыў уйымларының басшы кадрларын таңлаў, тайынлаў ҳәм аттестациядан өткериў бо­йынша республикалық комиссияға академиялық лицейлер бириктирилген жоқары оқыў орынларының ректорлары тәрепинен киргизилетуғыны;

2017/2018-оқыў жылынан баслап академиялық лицейлердиң оқыўшыларын улыўма билим бериў пәнлери бойынша сабақлықлар менен тәмийинлеў Өзбекистан Республикасы Қаржы министрлиги жанындағы бюджеттен тысқары Республикалық мақсетли китап қорының қаржылары есабынан ижара тийкарында әмелге асырылатуғыны, улыўма билим бериў пәнлери бойынша сабақлықлар менен тәми­йинлеў бюджет қаржылары есабынан бийпул тийкарда әмелге асырылатуғын кем тәмийинленген шаңарақлардан шыққан оқыўшылар буған кирмейтуғыны;

академиялық лицейлердиң питкериўшилерине 4-қосымшаға муўапық дизим бойынша арнаўлы тереңлестирилген таярлықты талап етпейтуғын айрықша қәнигеликлер берилетуғыны белгилеп қойылсын;

4. Өзбекистан Республикасы Жоқары ҳәм орта арнаўлы билимлендириў министрлигиниң Орта арнаўлы, кәсип-өнер билимлендириўи орайы мәпдар министрликлер ҳәм ведомстволар, жергиликли атқарыўшы ҳәкимият уйымлары менен биргеликте:

бир ай мүддетте академиялық лицей питкериўшилерине қәнигеликлер бериў тәртибин, сондай-ақ, академиялық лицейлерди питкериўшилерге қәнигеликлер бериў ҳаққындағы мәмлекетлик үлгидеги сертификат үлгисин ислеп шықсын ҳәм тастыйықласын;

еки ай мүддетте академиялық лицейлерге оқыўшыларды таңлаў тийкарында қабыл етиў тәртиби ҳаққындағы режени, сондай-ақ, академиялық лицейлердиң оқыўшыларын сабақлықлар менен тәмийинлеў тәртиби ҳаққындағы режени ислеп шықсын ҳәм тастыйықласын;

үш ай мүддетте топланған унамлы тәжирийбени есапқа ала отырып, академиялық лицейлердиң оқыў режелерин ҳәм бағдарламаларын сын көзқарастан қайта ислеп шығып, белгиленген тәртипте тастыйықласын, онда оқытыўдың 3-басқышынан баслап тереңлестирилип үйренилетуғын пәнлер бойынша оқытыў саатларының санын көбейткен ҳалда қайта бөлистириўди нәзерде тутсын;

оқыўшылар контингентин қайта бөлистириўди, оларды жоқары маманлықтағы оқытыўшы кадрлар менен тәмийинлеўди, кадрлар таярлаў бағдарларына муўапық зәрүр оқыў-лаборатория үскенелери, компьютер техникасы, оқыў-нормативлик ҳүжжетлер, оқыў ҳәм методикалық әдебиятлар менен тәмийинлеўди есапқа ала отырып, орта арнаўлы, кәсип-өнер билимлендириўдиң қайта шөлкемлестирилип атырған мәкемелеринде оқыў-тәрбия процесин сапалы шөлкемлестириўди тәмийинлесин.

5. Өзбекистан Республикасы Жоқары ҳәм орта арнаўлы билимлендириў министрлиги, қарамағында жоқары оқыў орынлары болған мәпдар минис­трликлер менен ведомстволар тәлим-тәрбия процесиниң сапасын арттырыўда, сондай-ақ, академиялық лицейлердеги оқытыўшылар қурамының маманлығын арттырыўға бириктирилген академиялық лицейлерге системалы тийкарда ҳәр тәреплеме методикалық ҳәм әмелий жәрдем көрсетиўди тәмийинлесин.

6. Жоқары оқыў орынлары басшылығына жоқары оқыў орынларының бюджеттен тысқары қаржылары (пуллы-контракт тийкарында оқытыў ушын түсимлер буған кирмейди) есабынан бириктирилген академия­лық лицейлер ушын оқыў-лаборатория үскенесин, жумсалатуғын материалларды, компьютер техникасын ҳәм басқа да шөлкемлестириў техникасын, сабақлықлар менен оқыў қолланбаларын сатып алыў ҳуқықы берилсин.

7. Өзбекистан Республикасы Жоқары ҳәм орта арнаўлы билимлендириў министрлигиниң Орта арнаўлы, кәсип-өнер билимлендириў орайы Өзбекистан Республикасы Халық билимлендириў министрлиги менен биргеликте академиялық лицейлерди айырым пәнлер терең үйренилетуғын мәмлекетлик қәнигелестирилген улыўма билим бериў мәкемелерине бириктириў және билимлендириўдиң үзликсизлигин ҳәм бир тутаслығын тәмийинлеўге әмел ете отырып, қәбилетли оқыўшылар менен ислесиў шеңберинде олар арасында өз-ара әмелий бирге ислесиў механизмин нәзерде тутатуғын Режени үш ай мүддетте ислеп шықсын ҳәм тастыйықласын.

8. Өзбекистан Республикасы Экономика министрлиги, Қаржы министрлиги, Жоқары ҳәм орта арнаўлы билимлендириў министрлигиниң Орта арнаўлы, кәсип-өнер билимлендириўи орайы, Қарақалпақстан Республикасы Министрлер Кеңеси, ўәлаятлар ҳәм Ташкент қаласы ҳәкимликлери Өзбекистан Республикасының ҳәр жылғы Инвес­тициялық бағдарламасы жойбарын ҳәм қурылыслардың мәнзилли дизимлерин қәлиплес­тириўде академиялық лицейлер тийкарында шөлкемлестирилетуғын кәсип-өнер колледжлери ушын жаңа оқыў устаханаларын қурыўға қаржылар ажыратылыўын нәзерде тутсын.

9. Өзбекистан Баспасөз ҳәм хабар агентлиги, Қаржы минис­трлиги, Өзбекистан Республикасы Жоқары ҳәм орта арнаўлы билимлендириў министрлигиниң Орта арнаўлы, кәсип-өнер билимлендириўи орайы Өзбекистан Республикасы Жоқары ҳәм орта арнаўлы билимлендириў министрлигиниң Орта арнаўлы, кәсип-өнер билимлендириўи орайы тәрепинен ҳәр жылы қәлиплестирилетуғын болжаў квоталарын есапқа алған, соның ишинде, сабақлықлар усақлап сатыў тармағы арқалы еркин сатылыўын нәзерде тута отырып, зәрүр тиражда ҳәм атамаларда сапалы заманагөй сабақлықлар ислеп шығылыўын және басып шығарылыўы нәтийжели шөлкемлестирилиўин тәмийинлесин.

10. Қаржы министрлиги, Жоқары ҳәм орта арнаўлы билимлендириў министрлиги, Жоқары ҳәм орта арнаўлы билимлендириў министрлигиниң  Орта арнаўлы, кәсип-өнер билимлендириўи орайының жоқары оқыў орынларының академиялық лицейлерге оқытыўшылық жумысына мийнетке саат есабы менен ҳақы төлеў шәртлеринде тартылатуғын профессор-оқытыўшылар қурамының мийнетине саат есабы менен ҳақы төлеў муғдарларын жоқары оқыў орынлары студентлери менен оқыў шынығыўлары алып барылғанлығы ушын мийнетке саат есабы менен ҳақы төлеў муғдарларына теңлестириў ҳаққындағы усынысы қабыл етилсин.

11. Өзбекистан Республикасы Қаржы министрлиги ҳәр жылы Өзбекистан Республикасы Мәмлекетлик бюджетин қәлиплестириўде оның параметрлеринде усы қарарды орынлаўға байланыслы қәрежетлерди қаплаўға «Маориф» тармағы бойынша ажыратылатуғын қаржылар шеңберинде зәрүр қаржылар ажыратылыўын нәзерде тутсын.

12. Өзбекистан Республикасы Жоқары ҳәм орта арнаўлы билимлендириў министрлигиниң  Орта арнаўлы, кәсип-өнер билимлендириў орайы мәпдар министрликлер ҳәм ведомстволар менен биргеликте бир ай мүддетте:

нызам ҳүжжжетлерине усы қарардан келип шығатуғын өзгерислер менен қосымшалар ҳаққында Өзбекистан Республикасы Министрлер Кабинетине усыныслар киргизсин;

ведомстволық нормативлик-ҳуқықый ҳүжжетлер усы қарардың қағыйдаларына муўапықлас­тырылыўын тәмийинлесин.

13. Усы қарардың орынланыўын қадағалаў Өзбекистан Республикасының Бас министри А.Н.Ариповқа ҳәм Өзбекистан Республикасы Президентиниң Мәмлекетлик кеңесгөйи         А.Н.Юнусходжаевқа жүкленсин.

Өзбекистан Республикасы Президенти Ш.МИРЗИЁЕВ.

Ташкент қаласы, 2017-жыл 14-март.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF