Еркин Қарақалпақстан Вести Каракалпакстана 02:53:55, 17.09.2019
Хош келипсиз! | RSS
Сайт мазмуны

Кириў усылы

БАССЕЙНДЕГИ БЕЛЛЕСИЎЛЕР

Соңғы пайытларда республикамызда раўажланып атырған спорт түрлериниң бири – бул жүзиў болып, оның менен шуғылланыў тилегин билдирген жаслардың саны күн сайын артып бармақта. Жүзиў машқыларына бир неше жыллардан берли турақлы қатнасып киятырған спортшыларымыз бул аралықта әдеўир тәжирийбе топлап, мәмлекет көлеминдеги жарысларда өзлерин көрсете баслады десек, асыра айтқан болмаймыз.

Жақында быйылғы жүзиў бойынша шөлкемлестирилген Қарақалпақстан чемпионаты да бул бағдарда алып барылып атырған жумыслардың туўры жолда екенин және бир мәрте тастыйықлады.

Нөкис Олимпия резервлери колледжиниң суў ҳәўизинде 1997-2002 ҳәм 2003-2005-жылларда туўылған жас өспиримлер ҳәм қызлар арасында өткерилген бул чемпионатқа усы колледж, Өзбекистан Жүзиў федерациясы Қарақалпақстан филиалы, «Арал» жүзиў бассейни ҳәм Хожели қаласындағы 1-санлы Меҳрибанлық үйи жәмәәтлеринен 100 ге шамалас жас жүзиў шеберлери жеңимпазлық ушын гүрес жүргизди. Олар 50, 100, 200 ҳәм 400 метр аралықларға еркин, баттерфляй, арқада жүзиў, брасс ҳәм комплекс усылларында күш сынасты.

Қызығарлы өткен беллесиўлер жуўмағында 1997-2002-жылларда туўылған жас өспиримлер ҳәм қызлар арасында жүзиўдиң ҳәр қыйлы усыллары бойынша Б.Меңлибаева, Ш.Қарлыбаев, М.Оразымбетова, А.Сапарбаев, А.Мырзағулова, М.Дәўлетбаев, Ә.Юсупбаев, Т.Сейтов, И.Орынбаевлар, 2003-2005-жылларда туўылғанлар арасында болса Н.Казакова, Е.Жумаханов, Г.Абдиреймова, Р.Узақбергенов, Ю.Дүйсенбаев, Д.Алламбергенов, А.Сәтбаева, Р.Ержанов, Д.Өтеўлиев, Р.Батырбаев ҳәм М.Сулаймановлар финиш сызықларына биринши жетип келип, Қарақалпақстан чемпионы атақларын жеңип алды.

– Жарысты өткериўден гөзленген тийкарғы мақсет – жаслардың бос ўақытларын мазмунлы өткериў, олар арасында саламат турмыс тәризин қәлиплестириў, республикамызда спорттың жүзиў түрин және де раўажландырыў ҳәм Өзбекистан көлеминде болып өтетуғын чемпионатларға, кубок беллесиўлерине, быйыл Жиззақ қаласында болып өтетуғын «Бәркамал әўлад-2017» спорт ойынларына талантлы спортшыларды таңлап алыў ҳәм Қарақалпақстан сайланды командасын муўапықластырыўдан ибарат, – дейди жүзиў бойынша республикамыз сайланды командасының аға тренери Руслан Ильясов. – Өткерилген беллесиўлер барысында бул талапларға жуўап беретуғын спортшыларымыздың көп екенине көзимиз жетти…

Чемпионат соңында жеңимпазлар ҳәм сыйлы орын ийелери Өзбекистан Жүзиў федерациясы Қарақалпақстан филиалы тәрепинен таярланған дипломлар ҳәм медальлар менен сыйлықланды.

С.ЖАНИЕВ.

СҮЎРЕТТЕ: чемпионат жеңимпазлары ҳәм сыйлы орын ийелери.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF