Еркин Қарақалпақстан Вести Каракалпакстана 18:32:37, 22.09.2019
Хош келипсиз! | RSS
Сайт мазмуны

Кириў усылы

ИМКАНИЯТТАН НӘТИЙЖЕЛИ ПАЙДАЛАНЫП

Соңғы жыллары елимиздиң билимлендириў мәкемелеринде шет тиллерин үйрениў мәмлекетлик сиясат дәрежесине көтерилди. Мәмлекетимиздиң Биринши Президенти И.Кәримовтың 2012-жыл 10-декабрьдеги «Шет тиллерди үйрениў системасын буннан былайда жетилистириў илажлары ҳаққында»ғы қарары талапларынан келип шығып, республика ҳүкимети тәрепинен барлық тәлим-тәрбия дәргайларының материаллық-техникалық базасы беккемленип, олар жаңа оқыў қолланбалар ҳәм заманагөй мультимедиа қураллары менен тәмийинленди.

 

Нөкис районындағы 21-санлы улыўма билим бериў орта мектебиниң инглис тили муғаллимлери де өзлерине жаратылып берилген усындай қолайлы мүмкиншиликлерден ақылға уғрас пайдаланып, оқыўшыларды заман талапларына сай оқытыўда алдынғы педогогикалық технологияларды нәтийжели қолланып келмекте. Жас қәниге муғаллим Айгүл Нуржанова усы мектепте шөлкемлестирилген «English club» дөгерегиниң басшысы болып табылады.

­Жасыратуғыны жоқ, буннан бес, он жыл бурын шет тиллерин үйрениўге оқыўшылардың қызығыўшылығы, интасы онша күшли емес еди,­дейди А.Нуржанова. ­ Соңғы жыллары ҳүкиметимиз тәрепинен жүргизилип атырған сиясат ҳәм қоллап-қуўатлаўлардың нәтийжесинде шәкиртлеримиздиң шет тиллерине болған қызығыўшылығы барған сайын артып, олар ингилис тилинде емин-еркин сөйлеў дәрежесине жетисти.

Сондай-ақ, мектептиң педогогикалық жәмәәти инглис тили менен биргеликте оқыўшылардың барлық пәнлерге деген интасын күшейтиўге ҳәм тәлим-тәрбия процесин мәмлекетлик билимлендириў талапларына сай жүргизиў ушын өзлериниң бар билим ҳәм күш жигерин аянбастан жумсап келмекте. Нәтийжеде мектеп оқыўшылары ҳәр жыл сайын өткерилип киятырған билимлер беллесиўи, пәнлер олимпиадасы, спорт жарыслары ҳәм ҳәр қыйлы таңлаўларға  белсене қатнасып, сыйлы орынларды алыўға миясар болмақта.

Атап айтқанда, өткен оқыў жылында  пәнлер олимпиадасынан мектептиң 9-класс оқыўшысы Раул Аяпбергенов физика пәнинен республикада сыйлы 3-орынды ийелеўге миясар болған болса, билимлер беллесиўинде 7-класс оқыўшы Д.Абдиреймов қарақалпақ тили ҳәм әдебияты пәни ҳәм Қ.Даўлетназаровлар өзбек тили пәнинен 2-орынды ийеледи.  Сондай-ақ, Батырбек Баўетдинов «Камалат» ЖЖҲ Қарақалпақстан Республикасы тәрепинен шөлкемлестирилген «Ең белсенди саламат турмыс тәризи үгит-нәсиятшысы» таңлаўының Қарақалпақстан Республикасы басқышында «Ең жақсы фотосүўрет» бағдары бойынша 2-орын, Қуўаныш Меңлибаев балалар дөретиўшилик орайы тәрепинен өткерилген «Кемесазлық» бағдары бойынша Қарақалпақстан Республикасында сыйлы 1-орынды ийеледи.

Соның менен бирге, өткен оқыў жылында мектептиң футбол командасы Қарақалпақстан Республикасы чемпионатында жеңимпаз болыўға еристи. Ал, быйылғы оқыў жылында «Үмит нәлшелери» спорт жарысында футбол түринен 1-орын ҳәм Р.Қутлымуратова стол теннисинен, С.Сметова 200 метрге жуўырыўда 1-орынларды қолға киргизди.

Мектебимиздиң бундай жоқары көрсеткишлерге ерисиўинде мектеп директоры Н.Қыдырниязов ҳәм тәжирийбели устазлардан Өзбекистан Республикасы халық билимлендириўиниң ағлалары ­ информатика пәни муғаллими Д.Қонарбаев, өзбек тили пәни муғаллимлери Г.Байымбетова, М.Шарибаевлардың ислеген мийнетлери айрықша болмақта. Әлбетте, бундай қолайлы имканиятлардан нәтийжели пайдаланған мектеп жәмәәтиниң қолға киргизген жетискенликлери көрген көзди қуўантып, елимиздиң ертеңги күнге исенимин арттырады.

А.ОРАЗОВ.

СҮЎРЕТТЕ: А.Нуржанова.

Ә.ОРАЗОВтың түсирген сүўрети.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF