Еркин Қарақалпақстан Вести Каракалпакстана 23:13:27, 22.09.2019
Хош келипсиз! | RSS
Сайт мазмуны

Кириў усылы

ЖАСЛАРДЫ ИСБИЛЕРМЕНЛИККЕ ТАРТЫЎ — БАСЛЫ ЎАЗЫЙПА

Мәмлекетимизде әмелге асырылып атырған реформалардың тийкарғы бағдарларының бири — киши бизнес ҳәм жеке исбилерменликти раўажландырыў, олар ушын қолайлы шараятлар жаратыўдан ибарат. Әсиресе, Өзбекис­тан Республикасы Президентиниң 2016-жыл 5-октябрьдеги «Исбилерменлик жумысының жедел раўажланыўын тәмийинлеўге, жеке мүлкти ҳәр тәреплеме қорғаўға ҳәм исбилерменлик орталығын сапа жағынан жақсылаўға байланыслы қосымша илажлар ҳаққында»ғы Пәрманы тараўға көплеген жеңилликлер жаратып берди.

Әлбетте, тараўға қаратылып атырған бундай итибар киши бизнес ҳәм жеке исбилерменлик жумысын басламақшы болған кәсип-өнер колледжин питкериўши жаслардың өз исбилерменлик жумысын баслаўына айрықша қоллап-қуўатлаў болатуғынлығына гүман жоқ. Ҳәзирги күнлери барлық кәсип- өнер колледжлеринде келешегимиз болған жасларды исбилерменликке тартыў, оқыўды питкергеннен соң олардың өз бизнесин дурыс жолға қойыўына жәрдем бериў мақсетинде ҳәр қыйлы илажлар өткерилмекте.

Усындай илажлардың бири жақында Нөкис мелиорация ҳәм суў хожалығы кәсип-өнер колледжинде болып өтти.  Оған колледж оқыўшылары ҳәм олардың ата-аналары қатнасты. Илажда «Камалат» ЖЖҲ Қарақалпақстан Республикасы Кеңесинен, мәмлекетлик салық инспекциясы, коммерциялық банклерден қәнигелер ҳәм Бердақ атындағы ҚМУ экономика факультети оқытыўшылары колледж питкериўшилерине Өзбекистан Республикасы Президентиниң 2010-жыл 28-июльдеги «Билимлендириў мәкемелериниң питкериўшилерин исбилерменликке тартыў бойынша қосымша илажлар ҳаққында»ғы Пәрманына муўапық мәмлекетимиз тәрепинен кәсип-өнер колледжи питкериўшилери ушын ажыратылып атырған жеңиллетилген кредитлер көлеми, жаслар банкке өз бизнес жойбарларын усыныў ҳәм оларды рәсмийлестириў тәртиби ҳаққында кең түрде түсиник берип өтти.

— Өткерилип атырған бундай түсиник жумыслары бизлердей колледж питкериўшилерине кең имканиятлар жаратады деп ойлайман. Келешекте мен де өзим туўылып өскен Нөкис районы «Қутлы» АПЖ аймағынан коммерциялық банклердиң жеңиллетилген кредитлери есабынан фермер хожалығын ашыў нийетиндемен,-дейди колледждиң 3-курс оқыўшысы Ж.Дәрибаев.

Илажда колледж питкериўшилери менен олардың ата-аналары өзлерин қызықтырған сораўлары бойынша қәнигелерге мүрәжат етип, оларға тийисли жуўаплар алды.

Р.АРЗИЕВ.

СҮЎРЕТЛЕРДЕ: өткерилген илаждан көринислер.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF