Еркин Қарақалпақстан Вести Каракалпакстана 18:30:51, 22.09.2019
Хош келипсиз! | RSS
Сайт мазмуны

Кириў усылы

МЕҲРИ ДӘРЬЯ, ҚӘЛБИ ҚУЯШ ШЫПАКЕР

Халық арасында «Мийнет инсанды бахытқа бөлейди»  деген гәп бар. Ҳақыйқатында да солай. Инсан камалға келип, кәсип ийелеп, Ўатан алдындағы перзентлик парызын жуўапкершилик пенен өтесе, бир күн келип оның жемисин татады.

Елимиздиң Биринши Президенти И.Кәримовтың «Елим деп, журтым деп, жанып жасаў керек» деген  даналық сөзин терең уғынып, мийнет етип атырған ҳақ нийетли, ҳадал жүрекли, пидайы заманласларымыз арамызда талай ғана. Әсиресе, медицина тараўында ерлер менен бир сапта турып, күнди-күн, түнди-түн демей шаңарақ тәшўишлерине қоса, өз кәсибин инабат пенен атқарып киятырған ҳаял-қызларға қайыл қалмай илаж жоқ. Олардың жемисли мийнетлерин халыққа таныстырсақ арзыйды.

Узақ жыллардан берли ана ҳәм бала саламатлығын беккемлеўде пидайылығы менен халық алғысына миясар болып киятыр­ған шыпакерлердиң бири Гәўҳар Абдуллаева ҳаққында сөз етпекшимиз.

Шаңарақта әкениң орны, оның тәрбиясы өз алдына. Жаслайынан әкеси Мәдрейим ағаның (марҳум) фельдшер болып, аўыл аралап, халыққа көрсеткен медициналық хызметлерин көрип өскен қыз әкеси сыяқлы жетик медицина хызметкери болыўды арзыў етти.  Қоңыраттың кең даласында туўылған Г.Абдуллаеваның дуз несийбеси Қанлыкөл районына шашылды. «Ықлас қалыс» дегениндей, билим алыў жолындағы талпыныслары Ташкент медицина институтына жетелеп, шыпакерлик кәсибин ийеледи. Соңынан, Нөкис қаласындағы республикалық туўыў үйинде бир жыллық интернатураны өтеп, мийнет жолын районлық  туўыў үйинде акушер-гинеколог  болып ислеўден баслады.

Ҳәзирети Наўайы бабамыздың «Билмегенин сорап үйренген алым, арланып сорамаған өзине залым» деген даналық сөзин өзине уран етип, көп жыллық тәжирийбеге ийе акушер-гинеколог шыпакерлер Р.Алламбергенова, З.Ғаппаровалардың ис усылларын үйренип, билмегенлерин сорап, жыллар өтип ол да устазларындай  дәрежеге жетисти. Пуқталығы, талапшаңлығы, тил алғышлығы, кишипейиллиги менен  жәмәтте абырайы артып, туўыў үйи баслығы лаўазымына көтериледи.

Мине соннан берли де шерек әсирден аслам ўақыт өтип, қаншама аналар босанып, шаңарақ жарасығы ҳәм шадлығы болған нәрестелердиң дүньяға келиўинде Г.Абдуллаеваның мийнетлери айрықша болды.

— Жас босанатуғын яки жағдайы аўыр жүкли аналарды бас­қа шыпакерлер бар болса да таслап кетиўге көзим қыймай түнги мезгилди туўыў үйинде өткерген күнлерим көп болды. Олар босанып, нәресте дүньяға келгенше қаншама ҳәрекет, ғамқорлық етсек, буннан соң сутка даўамында да ана ҳәм баланың денсаўлығын бақлап, керекли жәрдем көрсетемиз.

Усындай әдетке айланған күнделикли жумысларға қоса аўылларға шығып туўыў жасындағы ҳәм жас босанған аналарды нәрестелерди тереңлестирилген тексериўлерден өткерип, олар арасында үгит-нәсият жумысларын алып барамыз.

Хызмет бабындағы жумыслардан артып, үй машқаласы, перзент тәрбиясы менен де шуғылланыўға ўақыт табаман,- дейди гүрриңлескенмизде ол.

Г.Абдуллаева өмирлик жолдасы Қ.Оспанов пенен үлгили шаңарақ болып, татыўлықта перзентлерин тәрбиялап камал­ға келтирмекте. Үлкен баласы Ташкент химия технологиялары институтын питкерип, «Үстирт газ химия комплекс»инде ислеп атырған болса, қызы Ташкент педиатрия медицина институты Нөкис филиалында оқып атыр.

Шаңарақ бахты ҳәмме нәрседен үстин. Исмине сай иси менен гәўҳардай жарқыраған меҳир нурын әзиз ана ҳәм нәрестелеримизге бағышлаған Гәўҳардың машақатлы кәсибинде талмас күш-ғайрат тилеймиз.

Палўанбай ДӘЎЛЕТМУРАТОВ,

Өзбекистан Журналистлер дөретиўшилик аўқамының ағзасы.

Қанлыкөл районы.

СҮЎРЕТТЕ: Г.Абдуллаева (оңда) жумыс пайытында.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF