Еркин Қарақалпақстан Вести Каракалпакстана 19:09:24, 22.09.2019
Хош келипсиз! | RSS
Сайт мазмуны

Кириў усылы

ИЛИМЛЕР АКАДЕМИЯСЫНЫҢ ЖУМЫСЫН, ИЛИМИЙ-ИЗЕРТЛЕЎ

ЖУМЫСЛАРЫН ШӨЛКЕМЛЕСТИРИЎ, БАСҚАРЫЎ ҲӘМ ҚАРЖЫЛАНДЫРЫЎДЫ

БУННАН БЫЛАЙ ДА ЖЕТИЛИСТИРИЎ  ИЛАЖЛАРЫ ҲАҚҚЫНДА

Өзбекистан Республикасы Президентиниң Қарары

Экономиканың инновациялық раўажланыўында академиялық илимниң әҳмийетин буннан былай да арттырыў, Илимлер академиясының абырайын күшейтиў ҳәм оның жумысын жетилистириў, илимий-изертлеўди ҳәм инновациялық жумысты басқарыў ҳәм тәртипке салыўдың бирден-бир системасын қәлиплестириў, сондай-ақ, Өзбе­кистан Республикасын социаллық-экономикалық раўажландырыўда илимниң орнын арттырыў мақсетинде:

1. Өзбекистан Илимлер академиясының тийкарғы ўазыйпалары ҳәм жумыс бағдарлары етип төмендегилер белгиленсин:

тәбийғый, техникалық ҳәм социаллық-гуманитарлық илимлер саласында фундаменталь, әмелий ҳәм инновациялық илимий изертлеўлер алып барыў;

илимниң билимлендириў ҳәм өндирис пенен интеграциясының механизмлерин беккемлеў ҳәм раўажландырыў;

экономика тармақларының ҳәм республика аймақларының талапларын есап­қа ала отырып, илим ҳәм технологияларды раўажландырыўдың, мәмлекетлик илимий-техникалық бағдарламалардың тийкарғы бағдарларын қәлиплестириўге байланыслы усыныслар ислеп шығыў;

жәҳән ҳәм республика илим жетискенликлерин үйрениў ҳәм талқылаў, олардан Өзбекистан Республикасының мәпи жолында пайдаланыў бағдарында усыныслар ислеп шығыў;

елимиздиң илимин, илимий потенциалын, илим ҳәм техника жетискенликлерин ғалаба ен жайдырыў ҳәм үгит-нәсиятлаў;

шет еллердиң илимлер академиялары, илимий-изертлеў шөлкемлери ҳәм қорлары менен халықаралық бирге ислесиў, халық­аралық илимий форумларды ҳәм конференцияларды шөлкемлестириўде ҳәм өткериўде қатнасыў;

Илимлер академиясы мәкемелериниң илимий потенциалынан ҳәм материаллық-техникалық базасынан пайдалана отырып, жоқары маманлықтағы кадрлар таярлаўда қатнасыў.

2. Өзбекистан Республикасы Илимлер академиясы, Жоқары ҳәм орта билимлендириў министрлиги, Қаржы министрлиги, Айрықша жағдайлар министрлиги, Илим ҳәм технологияларды раўажландырыўды муўапықластырыў комитетиниң Өзбекистан Миллий университети жанындағы Тарийх институтын Илимлер академиясының қарамағына өткериў, сондай-ақ, Өзбе­кис­тан Республикасы Илимлер академиясының қурамында:

Өзбекистан Миллий университети жанындағы Математика институты негизинде В.И.Романовский атындағы Математика институтын;

Өзбекистан Миллий университети Физика факультетиниң тийисли лаборато­рия­лары ҳәм сийрек ушырасатуғын объектлери, сондай-ақ, Өзбекистан Республикасы Айрықша жағдайлар министрлиги жанындағы Радиация қәўипсизлиги орайы тийкарында Ядро физикасы институтын;

Ташкент мәмлекетлик техника университети Инженерлик-физика факультетиниң тийисли лаборато­риялары тийкарында У.А.Арифов атындағы Ион-пламза ҳәм лазер технологиялары институтын;

Өзбекистан Республикасы Илимлер академиясы Қурылмалардың сейсмикалық беккемлиги институты ҳәм Ташкент мәмлекетлик техника университети жанындағы Тармақ машина қурылысы машқалалары илимий-изертлеў орайы тийкарында М.Т.Уразбаев атындағы Механика ҳәм қурылмалардың сейсмикалық беккемлиги институтын;

Өзбекистан Миллий университети жанындағы Полимерлер химиясы ҳәм физикасы илимий-изертлеў орайы тийкарында Полимерлер химиясы ҳәм физикасы институтын;

Ташкент мәмлекетлик шығыстаныў институты жанындағы Әбу Райхан Беруний атындағы Шығыс қолжазбалары орайы тийкарында Әбу Райхан Беруний атындағы Шығыстаныў инс­титутын;

Самарқанд қаласындағы Археология институты ҳәм Өзбекистан Республикасы Илимлер академиясы Архео­логия институтының Ташкент бөлими тийкарында Я.Ғуломов атындағы Архео­логиялық изертлеўлер инс­титутын;

Әлийшер Наўайы атындағы Ташкент мәмлекетлик өзбек тили ҳәм әдебияты университети жанындағы Өзбек тили ҳәм әдебияты илимий-изертлеў институты тийкарында Өзбек тили, әдебияты ҳәм фольклоры инс­титутын;

Әлийшер Наўайы атындағы Ташкент мәмлекетлик өзбек тили ҳәм әдебияты университети жанындағы Өзбек тили ҳәм әдебияты музейи тийкарында Әлийшер Наўайы атындағы мәмлекетлик әдебият музе­йин шөлкемлестириў ҳаққындағы усынысына келисим берилсин.

3. Өзбекистан Республикасы Илимлер академиясы, Жоқары ҳәм орта арнаўлы билимлендириў министрлиги, Халық билимлендириў министрлигиниң Жоқары ҳәм орта арнаўлы билимлендириў министрлиги жанындағы Өзбекистанның ең жаңа тарийхы жәмийетшилик кеңесин Илимлер академиясы жанындағы Өзбекистанның ең жаңа тарийхы жәмийетшилик кеңесине айландырыў ҳаққындағы усынысына келисим берилсин.

Жоқары ҳәм орта арнаўлы билимлендириў минис­трлиги жанындағы Өзбе­кистанның ең жаңа тарийхы мәселелери бойынша Муўапықластырыўшы методикалық орай Илимлер академиясының қарамағына өткерилсин, ол Илимлер академиясы жанындағы Өзбекистанның ең жаңа тарийхы бойынша жәмийетшилик кеңестиң жумысшы уйымы етип белгиленсин.

4. Өзбекистан Республикасы Илимлер академиясы, «Наўайы кән-металлургия комбинаты» мәмлекетлик кәрханасы, Илим ҳәм технологияларды раўажландырыўды муўапықластырыў комитети, Өзбекистан Республикасы Экономика министрлигиниң Илимлер академиясының Наўайы бөлимин шөлкемлестириў ҳаққындағы усынысы қабыл етилсин.

Илимлер академиясының Наўайы бөлимин сақлаў, сондай-ақ, оның әмелий ҳәм инновациялық изерт­леўлерин әмелге асырыўға бағдарланған қаржылары «Наўайы кән-металлургия комбинаты» мәмлекетлик кәрханасының есабынан, соның ишинде, ти­йисли илимий-технологиялық қолланбаларды енгизиў нәтийжесинде алынған сап пайданың 10 процент муғдары есабынан қапланатуғыны белгилеп қойылсын.

5. Қайта шөлкемлестирилген Илимлер академиясының илимий мәкемелери юридикалық шахс статусына ийе мәмлекетлик мәкеме болып табылатуғыны, олар алдын өзлери қарамағында болған министрликлер менен ведомстволар тийкарындағы илимий мәкемелердиң ҳуқықлары ҳәм миннетлемелери бойынша ҳуқықый мийрасқорлары есапланатуғыны белгилеп қойылсын.

6. Илимниң тийкарғы бағдарларының раўажланыўын тәмийинлеў, сондай-ақ, илимий-изертлеў мәкемелелери жумысын нәтийжели муўапықластырыў мақсетинде Илимлер академиясының басқарыў аппараты структурасында физика-математика ҳәм техникалық илимлер, химия-биология илимлери, социаллық-гуманитарлық илимлер бойынша бөлимлер шөлкемлестирилсин.

Илимлер академиясының Қарақалпақстан бөлими баслығы, Хорезм Маъмун академиясының баслығы ҳәм Илимлер акаде­мия­сының Наўайы бөлими баслығы өз статусына бола Илимлер академиясының вице-президентине теңлестирилсин.

7. Әмелиятқа сондай тәртип енгизилсин, оған муўапық тармақлық илимий-изертлеў мәкемелери илимлер академиясының ассо­циа­цияластырылған ағзасы болыўы мүмкин.

8. Өзбекистан Республикасы Илимлер академиясының шөлкемлестириў ҳәм басқарыў аппараты структуралары 1- ҳәм 2-қосымшаға муўапық тастыйықлансын.

Өзбекистан Республикасы Илимлер академиясы президентине, зәрүрлик бол­ғанда,  Өзбекистан Республикасы Илимлер академиясы басқарыў аппараты структурасына хызметкерлердиң тастыйықланған шекленген улыўма саны шеңберинде өзгерислер киргизиў ҳуқықы берилсин.

9. Илим ҳәм техноло­гиялар бойынша Мәмлекетлик комиссия (кейинги орынларда Мәмлекетлик комиссия) 3-қосымшаға муўапық қурамда шөлкемлестирилсин.

10. Төмендегилер Мәмлекетлик комиссияның тий­карғы ўазыйпалары етип белгиленсин:

илимий-техникалық жумыс саласында бирден-бир мәмлекетлик сиясатты ислеп шығыў ҳәм әмелге асырыў;

мәмлекетлик илимий-техникалық ҳәм иннова­циялық сиясаттың тийкарғы бағдарларын ҳәм усы салаларда мәмлекетлик сиясатты әмелге асырыўға бағдарланған илажларды белгилеў;

фундаменталь, әмелий ҳәм инновациялық изертлеўлердиң грант тийкарындағы мәмлекетлик илимий-техникалық бағдарламаларын тас­тыйықлаў;

орынланып атырған жойбарларды ҳәм оларды енгизиў илажларының әмелге асырылыўы бойынша мәмлекетлик уйымлар басшыларының ҳәм лаўазымлы шахслардың есапларын тыңлаў ҳәм жеке жуўапкершилиги мәселелерин көрип шығыў.

11. Өзбекистан Республикасы Илимлер академиясы, Экономика министрлиги, Қаржы министрлиги, Жоқары ҳәм орта аранаўлы билимлендириў министрлигиниң Өзбекистан Республикасы Министрлер Кабинети жанындағы жумысы сапластырылып атырған Илим ҳәм технологияларды раўажландырыўды муўапықластырыў комитети тийкарында Өзбекистан Республикасы Илим ҳәм технологиялар агентлигин шөлкемлестириў ҳаққындағы усынысына келисим берилсин.

Өзбекистан Республикасы Илим ҳәм технологиялар агентлигиниң структурасы 4-қосымшаға муўапық тастыйықлансын.

Өзбекистан Республикасы Илим ҳәм технологиялар агентлигиниң бас директорына, зүрүрлик болғанда, Өзбекистан Республикасы Илим ҳәм технологиялар агентлиги структурасына хызметкерлердиң тастыйықланған шекленген улыўма саны шеңберинде өзгерислер киргизиў ҳуқықы берилсин.

12. Өзбекистан Республикасы Илим ҳәм техноло­гиялар агентлигиниң тийкар­ғы ўазыйпалары ҳәм жумыс бағдарлары етип төмендегилер белгиленсин:

елимизди социаллық-экономикалық, жәмийетлик-сиясий раўажландырыў ўазыйпаларын ҳәм заманагөй илим жетискенликлерин инабатқа ала отырып, илим ҳәм технологияларды раўажландырыўдың тийкар­ғы бағдарларын белгилеў ҳәм әмелге асырыў илажларын орынлаў;

мәмлекетлик илимий-техникалық бағдарламаларды қәлиплестириў, әмелге асырыў ҳәм олардың орынланыўында және елимизди социаллық-экономикалық раўажландырыўда илимий-изертлеў жумыслары нәтийжелеринен пайдаланыўдың системалы мониторингин алып барыў;

әҳмийетли тармақлараралық илимий-техникалық бағдарламалардың орынланыўын тәмийинлеў;

экономика тармақлары ҳәм социаллық сала ушын фундаменталь, әмелий ҳәм инновациялық изертлеўлердиң орынланыўы бойынша илимий-техникалық хызметлер көрсетиўде мәмлекетлик тапсырмаларды қәлиплестириў;

ҳәр жылғы Республикалық инновациялық идеялар, технологиялар ҳәм жойбарлар ярмаркасының өткерилиўин шөлкемлестириў ҳәм оның шеңберинде қол қо­йылған шәртнамалардың орынланыўы бойынша мониторинг алып барыў;

илим ҳәм технологиялар саласында халықаралық бирге ислесиўди раўажландырыў, шет ел инвестицияларын ҳәм грантларын тартыў, шет елли шериклер менен қоспа илимий жойбарлар ҳәм инновациялық қолланбалардың орынланыўын шөлкемлестириў;

жоқары маманлықтағы илимий ҳәм илимий-педагог кадрлар таярлаў жумысын режелестириў ҳәм муўапықластырыў.

13. Өзбекистан Республикасы Илим ҳәм техноло­гиялар агентлиги Мәмлекетлик комиссияның жумысшы уйымы есапланатуғыны белгилеп қойылсын.

14. Илим ҳәм техноло­гиялар агентлиги республиканың илимий-изертлеў, билимлендириў ҳәм басқа да мәкемелери тәрепинен әмелге асырылатуғын мәм­лекетлик илимий-техникалық бағдарламалардың ҳәм жойбарлардың бирден-бир буйыртпашысы етип белгиленсин.

15. Өзбекистан Республикасы Илим ҳәм техноло­гиялар агентлиги Илимлер академиясы, Экономика министрлиги ҳәм Қаржы министрлиги менен биргеликте, үш ай мүддетте Өзбекистан Республикасы Министрлер Кабинетине имаратларды, қурылмаларды ҳәм басқа да материаллық-техникалық базаны сақлаў ҳәм олардан пайдаланыў қәрежетлерин базалық қаржыландырыў механизмин енгизиўди нәзерде тутатуғын илимий-изертлеў мәкемелерин қаржыландырыў тәртибин жетилистириў бойынша усыныслар киргизсин.

16. Елимизде илим ҳәм технологиялардың жедел раўажланыўын тәмийинлеўге бағдарланған изертлеўлерди шөлкемлестириў ушын шараят жаратыў, бәсекиге шыдамлы илимий-көлемли жергиликли өнимлер ислеп шығарыўды өзлес­тириў мақсетинде Мәмлекетлик комиссияның жанында юридикалық шахс статусына ийе болған Илимий-техникалық жумысты қоллап-қуўатлаў ҳәм раўажландырыў қоры шөлкемлес­тирилсин.

17. Илимий-техникалық жумысты қоллап-қуўатлаў ҳәм раўажландырыў қорының қаржыларын қәлиплес­тириў дәреклери етип:

Өзбекистан Республикасы Интеллектуаллық мүлк агентлигине патент бажылары, жыйымлар ҳәм басқа да салық категориясына кирмейтуғын төлемлерден келип түскен валюта қаржыларының 90 проценти;

халықаралық қаржы шөлкемлериниң ҳәм институтларының грантлары ҳәм кредитлери;

қәўендерлер — юридикалық ҳәм физикалық шахслардың, Өзбекистан Республикасы резидентлериниң ҳәм резидент емеслердиң қаржылары;

нызам ҳүжжетлеринде қадаған етилмеген басқа да түсимлер белгиленсин.

18. Илимий-техникалық жумысты қоллап-қуўатлаў ҳәм раўажландырыў қоры қаржыларын басқарыў ўазыйпасы Мәмлекетлик комиссияға жүкленсин.

19. Төмендегилер Илимий-техникалық жумысты қоллап-қуўатлаў ҳәм раўажландырыў қоры қаржыларынан пайдаланыўдың тийкар­ғы бағдарлары етип белги­ленсин:

Өзбекистан Республикасы Илимлер академиясы, Жоқары ҳәм орта арнаўлы билимлендириў министрлиги, Денсаўлықты сақлаў министрлиги, Аўыл ҳәм суў хожалығы министрлиги ҳәм басқа да министрликлердиң ҳәм ведомстволардың илимий-изертлеў ҳәм жоқары билимлендириў мәкемелеринде елимизде илим ҳәм технологиялардың жедел раўажланыўын тәмийинлеўге, бәсекиге шыдамлы илимий-көлемли жергиликли өнимлерди ислеп шығарыўды өзлестириўге бағдарланған алдынғы илимий изертлеўлерди ҳәм излениў жумысларын алып барыў ушын таңлаў тийкарындағы, улыўма жаңа типтеги заманагөй жоқары технологиялық әсбап-үскенелер менен тәмийинленген илимий лабораторияларды шөлкем­лестириў бойынша илажларды қаржыландырыў;

мәмлекетлик илимий-техникалық бағдарламалар шеңберинде жаратылған интеллектуаллық мүлк объектлерин шет елде дизимнен өткериў (патентлеў) қәрежетлерин қаплаў;

мәмлекетлик илимий-техникалық бағдарламаларды әмелге асырыўда қатнасатуғын илимий-изертлеў ҳәм жоқары билимлендириў мәкемелериниң илимий лабораториялары ушын қосымша заманагөй илимий әсбап-үскенелер, зәрүрли жумсалатуғын материаллар ҳәм комплектлеўши бөлеклер менен үзликсиз тәми­йинлеў ушын қаржы ажыратыў;

Өзбекистан Республикасы Илимлер академиясы, Жоқары ҳәм орта арнаўлы билимлендириў министрлиги, Денсаўлықты сақлаў министрлиги, Аўыл ҳәм суў хожалығы министрлиги ҳәм басқа да министрликлер менен ведомстволарға қараслы илимий-изертлеў ҳәм жоқары билимлендириў мәкемелериниң жетекши илимий электрон мағлыўматлар базасынан еркин пайдаланыўы ушын талап етилетуғын қәрежетлерди қаплаў;

жас илимпазлардың жетекши шет ел илимий орайларында, соның ишинде, илимий лабораторияларды үскенелеў ушын сатып алынатуғын заманагөй илимий ҳәм технологиялық әсбап-үскенелер менен ислесиўди үйрениўи ушын шөлкем­лестирилетуғын қысқа мүддетли илимий стажировкаларды қаржыландырыў.

20. Өзбекистан Республикасы Сыртқы экономикалық байланыслар, инвестициялар ҳәм саўда минис­трлиги, Экономика минис­трлиги, Илим ҳәм технологиялар агентлиги мәпдар министрликлер ҳәм ведомстволар менен биргеликте илимий изертлеўлер өткериў, илимий лабораторияларды үскенелеў ҳәм илимпазлардың шет елге стажировкаларын шөлкемлестириў ушын шет ел кредитлерин ҳәм грантларын тартыў бойынша халықаралық қаржы инс­титутлары ҳәм басқа да шет елли донорлар менен системалы жумыс алып барсын.

21. Өзбекистан Республикасы Қаржы министрлиги, Экономика министрлиги ҳәм Илимлер академиясының илимий изертлеўлери жуўмақлары бойынша салмақлы нәтийжелерге ерискен илимпазларды сыйлықлаў ушын Илимлер академиясының илимий хызметкерлерин материаллық хошаметлеў қорын шөлкем­лестириў ҳаққындағы усынысына келисим берилсин.

Илимлер академиясының илимий хызметкерлерди материаллық қоллап-қуўатлаў қоры Илимлер академиясы илимий-изертлеў мәкемелериниң хожалық ҳәм исбилерменлик жумысынан түскен сап пайданың 10 проценти муғдарындағы жеңиллик есабынан қәлиплестирилетуғыны белгилеп қойылсын.

22. Өзбекистан Республикасы Министрлер Кабинети еки ай мүддетте усы қарардың орынланыўын тәмийинлеўге қаратылған, соның ишинде, төмендегилерди нәзерде тутатуғын ҳүкиметлик қарарды қабыл етсин:

тийисли жоқары билимлендириў мәкемелери менен терең интеграцияны тәми­йинлей отырып, Илимлер академиясының қарамағына өткерилип атырған ҳәм оның қурамында қайта шөлкем­лестирилип атырған илимий-изертлеў мәкемелериниң жумысын жолға қойыў;

Илим ҳәм технологиялар мәмлекетлик комиссиясы, Илим ҳәм технологиялар агентлиги, Илимий-техникалық жумысты қоллап-қуўатлаў ҳәм раўажландырыў қоры, Илимлер академиясының Наўайы бөлими, Илимлер академиясының илимий хызметкерлерди материаллық хошаметлеў қорының жумысын шөл­кемлестириў.

23. Өзбекистан Республикасы Илимлер академиясы, Илим ҳәм технологиялар агентлиги, Әдиллик минис­трлиги, Қаржы министрлиги, Экономика министрлиги, Жоқары ҳәм орта арнаўлы билимлендириў минис­трлиги басқа да мәпдар министрликлер ҳәм ведомстволар менен биргеликте бир ай мүддетте:

Өзбекистан Республикасы Министрлер Кабинетине әмелдеги нызам ҳүжжетлерине усы қарардан келип шығатуғын өзгерислер менен қосымшалар киргизиў ҳаққында усыныслар киргизсин;

ведомстволық нормативлик ҳүжжетлердиң усы Қарарға муўапықластырылыўын тәмийинлесин.

24. Усы қарардың орынланыўын қадағалаў Өзбе­кистан Республикасының Бас министри А.Н.Ариповқа жүкленсин.

Өзбекистан Республикасы

Президенти Ш.МИРЗИЁЕВ.

Ташкент қаласы, 2017-жыл 17-февраль.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF