Еркин Қарақалпақстан Вести Каракалпакстана 18:31:42, 22.09.2019
Хош келипсиз! | RSS
Сайт мазмуны

Кириў усылы

ИСЕНИМ КЕЛЕШЕККЕ БАҒДАРЛАЙДЫ

Өзбекистан Республикасында өз абырайына ийе педагог қәнигелерди таярлайтуғын Әжинияз атындағы Нөкис мәмлекетлик педагогикалық институтының педагог хызметкерлери ҳәм студент-жаслары ушын өткен 2016-жыл табыслы жыллардың бири болды. Себеби, институттың көпшилик студентлери өз билими, талапшаңлығы, зийреклигиниң нәтийжесинде ҳүкиметимиз тәрепинен жара­тыл­ған шараятлардан кең пайдаланып, бир қатар жетискенликлерге еристи.

Руўхый тетик, терең ой-пикирге ийе болған инсан барлық ўақытта да өз Ўатанының келешеги, халқының пәраўанлығы ушын хызмет етеди. Усыларды есапқа алған институтта руўхый-ағартыўшылық бағдарындағы илажларға үлкен итибар қаратылып атыр. Мәселен, жоқары ҳәм орта арнаўлы оқыў орынлары сту­дент­лери менен оқыўшыларының коррупцияға қарсы гүресиў бойынша билимлерин және де тереңлестириў мақсетинде Өзбекистан көлеминде «Биз жаслар елимизге хызмет етиўде ҳүжданлы, инсаплы ҳәм ҳадал болыўымыз шәрт» сүрени астында өткерилген жарыста институттың Тарийх факультетиниң студенти С.Әметов «Ең жақсы социаллық аудиоролик» жөнелиси бойынша биринши, педагогика факультетиниң 4-курс студенти Ш.Даўылбаев «Ең жақсы сүўрет» таңлаўы бойынша үшинши орынды ийеледи. Қарақалпақстан ҳәм Өзбекистан Республикалары көлеминде өткерилип киятырған «Жал­ғызсаң, муқаддес Ўатан», «Сөнбес жулдыз» ҳәм «Куйла, ёшлигим» таңлаўларында Педагогика факультети «Музыкалық тәлим» бағдарының студентлери Ғ.Бектурғанова ҳәм Т.Тилеўмуратовлар жеңисли орынларды қолға киргизип келмекте. Сондай-ақ, жоқары оқыў орынлары арасындағы «Қуўнақлар ҳәм зийреклер» таңлаўында институттың «Туран», «Салық билимданлары» жарысында «Қолқанат» командалары сыйлы екинши, Қарақалпақстан Республикасы «Камалат» жаслар жәмийетлик ҳәрекети басламасы менен жоқары оқыў орынлары арасында шөлкемлестирилген «Закаўат» интеллектуал ойынында 7 жоқары оқыў орны арасында институт командасы биринши орынды жеңип алды. Институтымыздың студентлери жыл даўамында спорт тараўында көплеген жетискенликлерге ерис­ти. Мәселен, «Универсиада» спорт ойынларында волейболшы қызлар командасы екинши орынды қолға киргизген болса, спорттың жеке түрлери бойынша дене тәрбиясы факультетиниң студенти Р.Джангабаев (аўыр атлетика) биринши орынды ийелеп, Универсиада рекордын орнатты. Сондай-ақ, факультет студентлеринен Г.Жумабаева,    Н.Есенбаева, Ш.Жоллыбаева, Д.Отарбаев, Ә.Әлимбетова, Х.Нарбаева, Н.Жийенбаевалар Өзбекистан көлеминдеги жарысларда ҳәм халықаралық турнирлерге мүнәсип қатнасып келмекте.

Ҳүкиметимиз тәрепинен жаслар ушын жаратылып берилген шараятлардан студентлер толық пайдаланбақта. Мәселен, институтымыздан Н.Жуманиязова ҳәм Л.Сейтжановалар Наўайы атындағы мәмлекетлик стипендия ийелери болса, айырым студентлер Елбасшымыз тәрепинен исбилерменлерге көрсетилген жеңилликлер ҳәм мүмкиншиликлерден кең пайдаланып, «Жас исбилермен — ел-журт таянышы» таңлаўына өз бизнес-идеялары менен қатнасып, жеңиске ериспекте. Солардан жас исбилермен Ж.Срашованы мысал сыпатында келтирип өтсек орынлы болады.

2017-жыл да институт студентлери ушын табыслы басланды. Өзбекистан Республикасы бойынша «Камалат стипендиясы» ушын өткерилген таңлаўға 567 студент қатнасқан болса, соннан 108 студент жеңиске еристи. Усы жерде бир нәрсени мақтаныш пенен айтып өтиў керек, Қарақалпақстан Республикасы жоқары оқыў орынларынан сегиз студент «Камалат стипендиясы»н алыўға ерискен болса, соның төртеўи Әжинияз атындағы Нөкис мәмлекетлик педагогикалық институтының студентлери болып табылады. Бул институт жәмәәти ушын жоқары көрсеткиш ҳәм мәртебе.

Бундай жасларға тәлим-тәрбия бериўде тәжирийбели педагог-хызметкерлеримиздиң мийнетлери айрықша. Себеби, шәкиртлер жетискенлиги устаз мийнетиниң жемиси. Институтта бундай пидайы устазлар көплеп табылады. Олардың бир қатары «Өзбекистан Республикасы ғәрезсизлигиниң 25 жыллық естелик нышаны» менен сыйлықланса, Өзбекистан көлеминде өткерилген таңлаўдың «Жылдың ең жақсы педагог-оқытыўшысы» номинациясы бойынша М.Алламбергенова, «Ең талантлы жас алым» номинациясы бо­йынша Ҳ.Алламбергенов, «Жылдың ең белсенди руўхый үгит-нәсиятлаўшысы» номинациясы бойынша А.Абатовлар жеңимпаз болды. «Нөкис пединституты» Өзбекистан Республикасы Олий Мажлис жанындағы Мәмлекетлик емес, коммерциялық емес шөлкемлерди ҳәм пуқаралық жәми­йеттиң басқа да институтларын қоллап-қуўатлаў жәмийетлик фонды тәрепинен жәрияланған грантлар таңлаўында «Жас үгит-нәсиятлаўшылар» жойбарын жеңип алды ҳәм 2016-жылы бул жойбар табыслы жуўмақланды. Жойбар шеңберинде Қарақалпақстан Республикасы көлеминде бир қанша жумыслар исленип, соның менен бир қатарда «Жасларға ҳуқықый билим бериўде «Мәмлекетимизде демократиялық реформаларды және де тереңлестириў ҳәм пуқаралық жәмийетин раўажландырыў Концепциясы»ның әҳмийети» атамасындағы мақалалар топламы шығарылып, республикамыз жоқары оқыў орынлары, академиялық лицейлер ҳәм кәсип-өнер колледжлериниң китапханаларына бийпул тарқатылды. Институтта бүгинги күни студент жаслар 22 бакалавр тәлим бағдары, 8 магистратура қәнигелиги бойынша  билим алмақта. Олардың дәўир менен тең қәдем таслаўы, заманагөй коммуникациялық технологиялардан пайдалана алыў имканиятын жаратыў ушын институт аймағын қамтый алатуғын WI-FI зонасы шөлкем­лестирилди. Бул студентлер институттың компьютер бөлмелеринде ҳәм өзлериниң жеке компьютер ҳәм ноутбуклери жәрдеминде қәлеген ўақытта интернетке бийпул жалғанып, оқыў ушын  керекли болған сайт­лардан емин-еркин пайдаланып, билим алыў ушын тийкар жаратылды деген сөз. Студент өзиниң  оқытыўшы менен қарым-қатнасын және де жеңиллес­тириў ушын Өзбекистан жоқары оқыў орынларында Mod1e системасындағы аккаунтына кирип тапсырма алады. Аралық ҳәм шегаралық баҳалаў ушын тийисли болған тест сораўларын да усы система арқалы шешип, өзине керекли болған балларды топлап барыў, оқытыўшының лекция текст­лери менен танысып шыға алыў имканиятларына ийе. Mod1e системасы бириншиден, студент пенен оқытыўшы арасындағы көринбейтуғын тосқынлықты алып таслайтуғын болса, екиншиден, оқытыўшының да, студенттиң де ўақтын үнемлейди, бул болса соңғы нәтийжеге, яғный, билим сапасының артыўына алып келеди. Институттың билимли, илимли студентлери «бизлердеги исеним келешекке бағдарлайды» деп исеним менен айта алады.

Д.ДАҒАРОВА, журналист.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF