Еркин Қарақалпақстан Вести Каракалпакстана 18:51:06, 22.09.2019
Хош келипсиз! | RSS
Сайт мазмуны

Кириў усылы

ФАРМАЦЕВТИКА ТАРАЎЫНДАҒЫ ӨЗГЕРИСЛЕР

2016-жыл 31-октябрьде Өзбекистан Республикасы Президентиниң «Халықты дәри-дәрмақ қураллары ҳәм медициналық буйымлар менен тәмийинлеўди буннан былай да жақсылаўға байланыслы илажлар ҳаққында»ғы қарары қабыл етилген еди. Усы қарар талапларының орынланыўы бойынша Қарақалпақстан Республикасы Меншиклестириў, монополиядан шығарыў ҳәм бәсекиликти раўажландырыў комитети «Реклама жумысларын қадағалаў ҳәм тутыныўшылардың ҳуқықларын қорғаў» бөлиминиң бас қәнигеси Алима Шагиловаға мүрәжат еткенимизде ол төмендегилерди айтып берди:

— Бүгинги күни халықтың сапалы ҳәм арзан баҳадағы дәри-дәрмақларға, медициналық буйымларға болған талабын инабатқа алып, ҳүкиметимиз тәрепинен тараўды раўажландырыў бойынша жүргизилип атырған реформалардың нәтийжесинде бир қатар илажларды әмелге асырыў ўазыйпалары белгиленген.

Фармацевтикалық жумыс пенен шуғылланыўшы кәрханаларды техникалық ҳәм технологиялық жақтан қайта үскенелеў тийкарында фармацевтика тараўын раўажландырыў бойынша әмелге асырылатуғын мәнзилли ис-илажлар, сондай-ақ, жаңа кәрханаларды жолға қойыў нәтийжесинде ишки тутыныў базарын жергиликли дәри-дәрмақ қураллары менен толтырыў  нәзерде тутылған.

Белгиленген ўазыйпалардан келип шығып,  халықты ҳәм де медицина мәкемелерин турақлы, арзан баҳадағы ҳәм сапалы дәрилер ҳәм медицина бу­йымлары менен тәмийинлениў дәрежесин жақсылаў, олардың баҳаларын белгилеп, ашық-айдынлық механизмин енгизиў мақсетинде Өзбекистан Республикасы Президентиниң 2016-жыл 31-октябрьдеги «Халықты дәри-дәрмақ қураллары ҳәм медициналық буйымлар менен тәмийинлеўди буннан былай да жақсылаўға байланыслы илажлар ҳаққында»ғы қарары қабыл етилди.

Қарарда 2017-жыл 1-январьдан баслап дәри қуралларына көтере ҳәм усақлап сатыў баҳаларының дүзилиўи, оларды надурыс қолланғанлығы ушын жуўапкершилик нормаларын ҳәм қадағалаў механизмлерин күшейтиў бойынша ҳәм бас­қа да бир қатар илажларды әмелге асырыў бойынша талаплар  белгиленген.

Атап айтқанда, шеттен алып келинетуғын, сондай-ақ, мәмлекетимизде ислеп шығарылатуғын дәри-дәрмақлар ҳәм медицина буйымларын көтере ҳәм усақлап сатыў оларды жеткерип бериўде қатнасыўшылар санына қарамастан, көтере саўда кәрханалары ушын сатып алынған баҳасынан (базалық баҳасынан) 15 проценттен ҳәм усақлап сатыў шақапшалары ушын көтере баҳасынан 20 проценттен артық болмаған шекленген саўда үстемелери муғдарларын қолланыў белгиленген. Соның менен бирге, усы қарар менен белгиленген баҳаларда сатылатуғын социаллық әҳмийетке ийе 189 атамадағы (соның ишинде мәмлекетимизде ислеп шығарылған 66 ҳәм сырт­тан алып келинетуғын 123) дәри қураллары ҳәм медициналық буйымлары дизими тастыйықланған еди.

2016-жыл 20-декабрьдеги Өзбекистан Республикасы Президентиниң қарары менен 2016-жыл 31-октябрьдеги «Халықты дәри-дәрмақ қураллары ҳәм медициналық буйымлар менен тәмийинлеўди буннан былай да жақсылаўға байланыслы илажлар ҳаққында»ғы қарарына киргизилген өзгеристе белгиленген баҳаларда сатылатуғын социаллық әҳмийетке ийе дәри қураллары ҳәм медициналық буйымлар саны 343 атамаға көбейди.

Соны да көрсетип өтиў әҳмийетли, жоқарыда атап өтилген қарар талабына муўапық Әдиллик министрлигиниң 2016-жыл 6-декабрь күнги 2846-санлы Денсаўлықты сақлаў министрлигиниң 2016-жыл 21-ноябрьдеги 71-санлы буйрықларына тийкарланып, 76 атамадағы дәриханаларда болыўы шәрт дәри қураллары ҳәм медицина буйымларының дизими тастыйықланды.

Баҳалары ҳүкиметимиз тәрепинен белгиленген, социаллық әҳмийетке ийе (343 атамада) ҳәм саўдада болыўы шәрт болған (76 атамада) дәри-дәрмақлар ҳәм медицина буйымлары фармацевтика жумысы менен шуғылланыў ушын арнаўлы рухсатнамаға (лицензияға) ийе бол­ған дәриханалар тәрепинен сатылыўы керек.

Тутыныўшылар жоқарыда атап өтилген социаллық әҳмийетке ийе ҳәм саўдада болыўы шәрт болған дәри-дәрмақлар, медицина буйым­ларының дизими ҳәм олардың баҳалары ҳаққында, «Шағым ҳәм усыныслар китабы», усақлап сатыў қағыйдалары, тутыныўшылардың тийкарғы ҳуқықлары ҳәм басқа да керекли мағлыўматларды дәрихана ишинде жайластырылған «Тутыныўшылар мүйеши» арқалы билиўине болады.

Дәриханаларда Ҳүкиметимиз тәрепинен белгиленген саўдада болыўы шәрт дәри-дәрмақлардың ҳәм медицина буйымларының дизими ҳәм де олардың баҳалары ҳаққындағы мағлыўматлар қыстырылып қойылмаған жағдайда, сондай-ақ, басқа да нызамбузыўшылыққа жол қойылған ўақытта республикамыз пуқараларының Қарақалпақстан Республикасы Меншиклестириў, монополиядан шығарыў ҳәм бәсекиликти раўажландырыў комитетине 222-30-11 исеним телефоны арқалы мүрәжат етиўине  болады.

Жазып алған: Р.АРЗИЕВ.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF