Еркин Қарақалпақстан Вести Каракалпакстана 23:25:10, 22.09.2019
Хош келипсиз! | RSS
Сайт мазмуны

Кириў усылы

ӘСКЕРИЙ ОКРУГТИҢ ДҮЗИЛГЕН КҮНИ БЕЛГИЛЕНДИ

Ғәрезсиз елимиз Қураллы Күшлериниң қәлиплесиўиниң дәслепки басқышында әскерий округлер, шегара регионлары, ең әҳмийетли бағдарларда жоқары жаўынгерлик қәбилетке ийе болған күшлер шөлкемлестирилди. Усы орында Өзбекистан Республикасы Министрлер Кабинетиниң  1999-жыл 10-февральдағы арнаўлы қарары, Өзбекистан Республикасы Қорғаныў министрлигиниң 1999-жыл  26-февральдағы директивасына тийкарланып Арқа-Батыс әскерий округиниң шөлкемлестирилиўи тарийхый ўақыялардың бири болды. Быйыл усы әскерий округ дүзилгенине 18 жыл толды.

Усы мүнәсибет пенен өткен екшемби күни салтанатлы мәжилис болып өтти. Илажда Арқа-Батыс әскерий округиниң сәркардасы, полковник Т.Иргашев шығып сөйлеп, жыйналғанларды, соның ишинде офицерлер, сержантлар ҳәм әскерлерди, Қураллы Күшлердиң ветеранларын, олардың шаңарақ ағзаларын қутлы сәне менен қутлықлады.

Атап өтилгениндей, шерек әсир даўамында басып өткен машақатлы жолы­мыз­ға нәзер таслар екенбиз,  Биринши Президентимиздиң тиккелей басшылығында өз ўақтында қабыл етилген реформаларды әмелге асырыў нәтийжесинде Өзбекистан бүгинги күни профессиональ таярлыққа ийе, заманагөй қурал-жарақ ҳәм техникалар менен тәмийинленген, елимиздиң қәўипсизлигин ҳәм аймақлық пүтинлигин, шегараларымыздың қол-қатылмаслығын сақлаў бойынша кең көлемли ўазыйпаларды нәтийжели орынлайтуғын, пуқараларымыздың тыныш-татыў турмысын қорғай алатуғын миллий армиясына ийе болды.

Реформалар шеңберинде әскерлердиң жаўынгерлик таярлығының бирден-бир системасы жаратылды. Бүгинги дәўир талабынан келип шығып, жаўынгерлик таярлықтың әҳмийетли бағдарлары белгилеп алынды. Усы тийкарда физикалық таярлық, оқ атыў қураллары менен ислесиў, тактикалық шынығыўлар сыяқлы илажлар жаңа басқышларға көтерилип бармақта. Арнаўлы тактикалық ҳәм штаб шынығыўларын өткериўде тийкарғы итибар методикалық шынығыў менен материаллық-оқыў базаны қәлиплестириўге қаратылып, жеке қурамда шөлистанлықта, қолайсыз ықлым шараятында жаўынгерлик ҳәрекетлерди алып барыў көнликпелерин пайда етиўге, оқыў барысын имканияты барынша айқын жаўынгерлик жағдайға жақынластырған ҳалда алып барыўға әҳмийет бериледи. Бүгинги күни округ өзиниң дала-оқыў орайына ийе болып, онда взвод, батальон, әскерий бөлим қурамында тактикалық оқыўларды өткериў ушын барлық шараят жаратылған.

Қураллы Күшлердеги реформалар барысында 2007-жылы Арқа-Батыс әскерий округинде сержант­лар таярлаў мектеби шөлкемлестирилип, оқыў процеси жолға қойылды. Оның материаллық-техникалық ҳәм оқыў базасын беккемлеў, заманагөй компьютер техникасы, мәлимлеме-коммуникация технологиялары ҳәм билимлендириў қураллары менен үскенелеў бойынша бир қатар илажлар әмелге асырылды. Бүгинги күни сержантларды таярлаў, қайта таярлаў ҳәм олардың кәсиплик шеберлигин арттырыўдың нәтийжели системасы жаратылды. Бул офицерлер менен әскерлер қурамы арасындағы тек байланыстырыўшы буўын емес, бәлким шын мәнисинде армиямыздың таяныш буўыны, офицерлердиң исенимли жәрдемшилери болған сержантларға өзлериниң кәсибин, теория­лық ҳәм әмелий билимлерин жетилистириўи, миллий армиямыздың қатарын бүгинги күнниң талабына жуўап беретуғын, интеллектуаллық жақтан жетик қәнигелер менен толтырыў ушын кең имканият бермекте.

Өткен жыллар даўамында  Өзбекистан Республикасының «Улыўма әскерий мийнет ҳәм әскерий хызмет ҳаққында»ғы Нызамына муўапық шөлкемлестирилген альтернативалы шақырыў резерви батальонларында республикамыздан және Хорезм ўәлаятынан 109 мыңнан аслам жасларымыз өзлериниң әскерий көнликпелерин арттырды ҳәм олар Қураллы Күшлеримиздиң резерви сыпатында дизимге алынды.

Әскерий бөлимлердеги жаўынгерлик таярлық системасын буннан былай да жетилистириў, Қураллы Күшлер түрлери арасында өз-ара тез жәмлескенликти, жеке қурамның дала оқыў шынығыўларын сапалы өзлестириўин тәмийинлеў бағдарында шөлкемлестирилген «Ең алдыңғы қәниге» таңлаўы әскерий хызметтиң абырайын, жасларымыздың Ўатанымызға, әскерий кәсипке болған садықлығын арттырыўға хызмет етпекте. Бүгинги күнге дейин таңлаўдың республикалық басқышында 50 ден зыят әскерий хызметкер сыйлы орынларды ийелеп қайтты. Буннан тысқары, өткен жыллар даўамында округ сержантлар таярлаў мектеби, республикамыз және Хорезм ўәлаяты қорғаныў ислери басқармалары, альтернативалы шақырыў батальонлары, бир қатар әскерий қалашалар түрли таңлаўларда жоқары орынларды ийелеўге миясар болды.

Өзбекистан Республикасының Президенти, Қураллы Күшлердиң Жоқары Бас Сәркардасы Ш.Мирзиёев тәрепинен белгилеп берилген ўазыйпаларды орынлаўда жергиликли мәмлекетлик ҳәм жәмийетлик шөлкемлер менен биргеликте жумыслар алып барылмақта. Бунда әскерий хызметкерлерди, олардың шаңарақ ағзаларын социаллық қорғаўға айрықша итибар қаратылмақта. Атап айтқанда, соңғы он жыл даўамында  144 әскерий хызметкер менен Қураллы Күшлердиң ветеранларына үй-жай сатып алып берилди, 43 хызметкер жер участкасы, 7 хызметкер үй-жай қурыў ушын узақ мүддетли ипотека кредити менен тәмийинленди. Соның менен бирге, оларға медициналық жәрдем көрсетиў ҳәм бийпул медициналық тексериўден өткериў, мүддетли әскерий хызметти үлгили өтеген әскерлерге «Усыныснама» бериў сыяқлы мақсетли илажлардың әмелге асырылып атырғаны елимиз және Қорғаныў ислери министрлиги басшыларының мақтанышлы кәсип ийелерине болған айрықша итибары және ғамқорлығынан дәрек береди.

Илаж соңында әскерий хызмет даўамында ажыралып турған бир топар хызметкерлер Арқа-Батыс әскерий округи басшылығы, республикалық жәмийетлик шөлкемлер  тәрепинен Ҳүрмет жарлығы және баҳалы саўғалар менен сыйлықланды.

Салтанатлы кеше республикамыз көркем өнер шеберлери менен жас атқарыўшыларының концерт бағдарламасы менен жуўмақланды.

Д.АБИБУЛЛАЕВ,

Қарақалпақстан хабар агентлигиниң хабаршысы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF