Еркин Қарақалпақстан Вести Каракалпакстана 18:41:45, 22.09.2019
Хош келипсиз! | RSS
Сайт мазмуны

Кириў усылы

ХАЛЫҚТЫ ЖУМЫС ПЕНЕН ТӘМИЙИНЛЕЎ ­

БАСЛЫ ЎАЗЫЙПАМЫЗ

Дәрья, теңиздеги дизбеклескен толқынлардың жағалаўларына асыққаны киби, быйыл­ғы «Халық пенен пикирлесиў ҳәм инсан мәплери жылы»нда район прокуратурасына ҳақ нийет пенен келип, турмыс маш­қалаларын бирлесип шешиўге умтылғанлардың көплигине гүўа болдық. Халықтың бәнт­лигин тәмийинлеўдеги район прокуратурасының белсендилиги көп­шиликке өрнек болғандай ийгиликли ислери ҳаққында район прокуроры, әдиллик кеңесшиси Ермашев Жеңис Маратович кең түрде сөз етти.

— Мәмлекетимиз Президенти Ш.М.Мирзиёев жыл басында республикамызға келип, халқымыз турмысы менен жақыннан танысып, табысларымызға қуўа­ныўы менен бирге орын алған қәте-кемшиликлерди қатаң сынға алған еди. «Халық мәмлекет уйымларына емес, ал, мәмлекетлик уйымлар халыққа хызмет етиўи керек» деген қанатлы сөзлерин күнделикли жумысларымызға уран етип алдық. Мийнетке жарамлы адамлар жумыслы болып, дәрамат табыўының бирден-бир дереги киши ҳәм орта бизнес пенен көбирек шуғылланыўы кереклигин мәсләҳәт етти.

Елимиз басшысы Арал теңизи бойында жайласқан районымыздың социал-экономикалық турмыс шараятларын жақсылаўға айрықша кеўил аўдарып, таза ишимлик суўы менен тәмийинлеў ушын  узынлығы 101 километрлик «Қоңырат-Мойнақ» суў тармақлары қурылысының ирге тасын қалап, 1-июльге полиэтилен трубаларда суў жеткерилетуғын болды.

Биринши гезекте ҳаял-қызларымызды писентли жумыс пенен қамтамасыз етиў мақсетинде ишки мүмкиншилик ҳәм имка­ниятлардан жетерли пайдаланып, басқа да тараўлар менен бирликте ислеп шыққан жойбарларымыз ҳүкимет басшылары тәрепинен өз қоллап-қуўатлаўларын тапты. Усы жылдың 27-январь күни өз қәўендерлигине алған «Өз Дән өнимлери» акционерлик жәми­йети тәрепинен Япония мәмлекетинде ислеп шығылған «JANOME» маркалы 100 дана электр қуўаты менен ислейтуғын тигиў машиналары алып келинди. Таяр затлар тигип шығарыў ушын «ҚҚ Дән өнимлери» АЖ ­ 65, «Тақыя­тас Дән өнимлери» АЖ ­ 160, «Шымбай Дән» ЖШЖ ­ 50 миллион 500 мың сумлық, «Қоңырат Ун заводы» АЖ ­ 75 миллион 120 мың сумлық, «Төрткүл Дән өнимлери» ЖШЖ ­ 50 миллион 400 мың сумлық, жәми 401 миллион 720 мың сумлық товарлар жеткизип берди.

Сондай-ақ, «Үшсай» аўыл пуқаралар жыйыны аймағында жасаўшы 100 ҳаял-қыз бенен «Мийнет шәртнамасы», «Ис бериўшиниң буйыртпасы бойынша хызметкер тәрепинен жумысларды орынлаў (хызмет көрсетиў) ушын мийнет шәртнама»сы ҳәм «Кәрхана буйыртпасына муўапық жумысларды орынлаў, әсбап-үскенелер ҳәм әнжамларды мүлкий ижараға (бийпул) алыў шәртнама»лары дүзилди ҳәм олардың барлығы ҳақыйқый жумыс орынлары менен тәмийинленди. Яғный, «Өз Дән өнимлери» АЖне қараслы жәмийетлерге хызметкер сыпатында жумысқа қабыл етиў буйрықлары шығарылып, үзликсиз ис көлемлери белгилеп берилди.

Усылайынша аймақта жасаўшы 100 ҳаял-қыз үйлеринде өнермент ретинде олар тәрепинен буйырыл­ған ис көлеми бойынша тийисли өнимлерди тигип шығарады ҳәм ийесине тапсырады. Ал, буйыртпашылар тәрепинен өз ўақтында мийнет ҳақылары толық төленип барылады. Олардың ҳәр бирине Мәмлекетлик салық комитетлеринде дизимге алынғанлығы ҳәм салық төлеўшиниң идентифика­ция номерлери берилди. Халық банкиниң Мойнақ районлық бөлими тәрепинен жыйналып барылатуғын пенсия ҳәм мийнет дәптершелери рәсмийлестирилди.

Ҳәзирги күнде «Үшсай»­лы 100 ҳаял-қыз  өз үйлеринде берилген буйыртпалар бойынша жумысларын баслап жиберди.

Буннан тысқары, район орайында  «GOLD MUYNAK MASTERS» («Мойнақтың алтын қоллы шеберлери») жуўапкершилиги шекленген жәмийети шөлкемлестирилип, райондағы «Бир айна» орайында тийисли мәмлекетлик дизимге алынды. Шөлкемлестириўшилердиң улыўма жыйналысында жәмийеттиң Уставы ҳәм Устав қоры жәми 350 миллион сум етип белгиленди.  Ал, бул жәми­йеттиң шөлкемлестириўшиси «Хожели пахта тазалаў заводы» акционерлик жәмийети болып, жәмийеттиң атамасы тастыйықланып, салық төлеўшиниң идентификация номери берилди ҳәм Агробанктың Мойнақ районы бөлиминде есап бети ашылды.

«Өз Пахта санаат» акцио­нерлик жәмийетиниң қәўендерлигинде усы жылдың 29-январь күни районымызға Қытайда ислеп шығарылған «JUITA»  маркалы 99 дана тигиў машинасы, әсбап-үскенелер, арнаўлы стол ҳәм стуллары менен алып келинди. Иркинишсиз монтажлаў ҳәм орнатыў ислери толық рәўиште әмелге асырылды.

Соның менен бирге, 31-январь күни усы  «GOLD MUYNAK MASTERS» («Мойнақтың алтын қоллы шеберлери») жуўапкершилиги шекленген жәмийети қасында үй шараятында тигиў менен шуғылланыўшы өнерментлер топары дүзилип, оларға Қытайдың «АСМЕ-988» маркалы 51 дана тигиў машинасы жеткерип берилди. Усы жәми­йетте 99 тигиўши, 51 тигиў өнерменти, 8 басқарыў ҳәм жәрдемши штат бирлиги ашылып, район орайында жасаўшы жәми 158 ҳаял-қыз ҳақыйқый жумыс пенен тәмийинленди.

Ең әҳмийетлиси, усы жумыс пенен қамтамасыз етилген ҳаял-қызлардың жумыс көлеми алдын-ала кепилленген тәртипте шөлкемлестирилди. Өйткени, биринши нәўбетте «Өз Пахта санаат» АЖ ҳәм оған қараслы жәмийетлер өзлериниң жумыслары ушын зәрүр болған арнаўлы кийим-кеншек, пахта теретуғын фартук ҳәм басқа да хызмет әнжамлары ушын буйыртпа береди ҳәм сол арқалы ис ҳақыларының өз ўақтында төлениўи тәмийинленеди.

Солай етип, районымыздағы  «Үшсай» аўыл пуқаралар жыйынынан 100, ра­йон орайынан 158, барлығы болып 258 ҳаял-қыздың жумыс пенен бәнтлиги тәмийинленди.

Иске кириспестен алдын қысқа мүддетли оқыў әме­лияты курслары шөлкем­лес­тирилип, тигиў машиналары ҳәм зәрүр үскенелер менен ислесиў тәртип-қағыйдалары, талаплары үйретилип, мийнет қәўипсизлиги нормалары таныстырылды, мийнет пенен байланыслы басқа да ҳуқық ҳәм миннетлемелер бойынша түсиниклер берилди.

Жаңадан жаратылған жумыс орынларының тоқтамастан әмелге асырылыўы, хызметкерлер ушын қолайлы шараятлар жаратыў ҳәм де олардың ҳуқықлары бузылыўларының алдын алыў бойынша биз — прокуратура хызметкерлери бул тараўдағы нызамлардың толық ҳәм анық орынланыўын тәмийинлеўге кепиллик беремиз. Олардың жумысларына ҳәрқандай нызамсыз араласыўлар, керексиз қағазпазлық, тийкарсыз шеклеўлерге тыйым салып, ҳәр тәреплдеме қадағалаўларды күшейтемиз. Егер де, унамсыз ҳалатлар жүз берген жағдайда нызам шеңберинде кескин шаралар көриледи.

2017-жыл 31-январь күни район ҳәкимлиги мәжилислер залында «Үшсай» АПЖ­да Қарақалпақстан Республикасы Жоқарғы Кеңесиниң Баслығы М.Ерния­зов, Қарақалпақстан Республикасы прокуроры Э.Таджиев ҳәм ҳүкимет ағзалары қатнасыўында жумыс пенен тәмийинленген ҳаял-қыз­лар­ға тигиў машиналары, жумысқа қабыл етилиў буйрықлары, мийнет шәрт­намалары ҳәм басқа да ҳүжжетлер салтанатлы жағдайда тапсырылып, биринши үлкен мийнет көтериңкилиги жағдайында басланып кетти.

Бул бағдарда  республика басшыларының қоллап-қуўатлаўы менен кең көлемли, қосымша ис-илажлар бағдарламасы ислеп шығылды. Жақын жылларда районымызға улыўма 46,5 миллиард сумға жақын инвестиция қаржысын киргизиў арқалы өндирис ҳәм исбилерменликти ен жайдырыўға байланыслы 70 жойбар таярланып, бир мың үш жүзден зыят жумыс орынларын жаратыў жобаластырылмақта...

Ө.ӨТЕЎЛИЕВ.

СҮЎРЕТТЕ: Район прокуроры Ж.Ермашев.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF