Еркин Қарақалпақстан Вести Каракалпакстана 22:18:12, 22.09.2019
Хош келипсиз! | RSS
Сайт мазмуны

Кириў усылы

ЕКИ МАШҚАЛА БИРДЕН ӨЗ ШЕШИМЛЕРИН ТАПТЫ

«Үшсай» — тарийхта аты бар, жағысын таслап қаш­қан теңиз бойындағы бүгинги күнде 235 шаңарақ түтин түтететуғын аўыл. Теңиз толып-тасқан жыллары терең сай, қолтықларында заводына балық тасыған үлкен-кишили кемелер иркилип, шырақлары  жайнап турғанларын кексе әўлад ўәкиллери еслесе, бүгинги күнде геологлар қалашасына таңырқана қарайды. Туўылған жерине садық қалған, балықшы болған «үшсай»лылар ата кәсибин өзгертип, шарўашылыққа бет бурыпты.

— Жаслайымнан ийне-сабақ услап, кесте тоқыған ықласыма бола ата-анам жеңил-желпи кийимлерди тигиўге қол машын сатып әперди. Әттең, район ора­йындағы колледждиң тигиўшилик бөлимин питкергели үйде, иссиз едим. Жақында көктен тилегеним жерден табылып, жумыслы болдық. Он еки түрли әмелди орынлайтуғын японның тигиў машынын атыма атап бергели үйде буйыртпа тийкарында көрпе-төсеклер менен көпшикке тыс тигип басладым, - деп қуўанышы қойнына сыймаған Жадыра Абылаеваға ҳармасын айттық.

— Атақлы шебер болмасам да, ул-қызларымның көйлеклерин тигип, қурақ қураў қолымнан келеди, -дейди Гүлзина Жаңасаева сәўбетимизге қосылып.

— Ҳадал мийнетиңниң наны мазалы. Өзим менен қатар жумысқа алынған аўыллас қыз-келиншеклер мени орталықтан жетекшиликке сайлап, мойныма жуўапкершилик жүкледи...

— Уршық ийирип, гилем тоқыў қолымнан келгени менен бирин тапсам бирин таппай, гез келген жумысларды таңламай ислеп жүрдим. Бизлерге тигиў машынларына қоса таўар, бу­йыртпашы, қарыйдарына шекем таўып, өзлеримиз, мәмлекетимиз ушын пайда келтиретуғын жумыслы еткенине мың да бир рахмет,-деп кеўли елжиреген Эльмира Атамуратованың жүрек төринен қайнап шыққан сөзлери толқынландырып жиберди.

— Көптен шешилмей киятырған машқалалар, жумыссызлық пенен аўыз суў мәселеси теңдей шешилгенине қуўанышымыз шексиз. «Қызыл шалы» аўылында жасайтуғын 60 шаңарақ күни бүгинге шекем аўыз суўын узақлардан тасып ишеди. Қоңыраттан таза ишимлик суўы полиэтилен трубаларда жеткизилерин еситкели қуўанышымыз қойнымызға сыймай жүрипти,-деген жол баслаўшымыз «Үш сай» аўыл пуқаралар жыйыны баслығы Тәжи Метеев пенен аўыл аралап, талай жаңалықлардың гүўасы болдық...

Ө.ӨТЕЎЛИЕВ.

СҮЎРЕТТЕ: «Үшсай»лы тигиўши Жадыра Абылаева жумыс ўақтында.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF