Еркин Қарақалпақстан Вести Каракалпакстана 19:29:16, 02.07.2020
Хош келипсиз! | RSS
Сайт мазмуны

Кириў усылы

НЫЗАМ ҲҮЖЖЕТЛЕРИН ТАРҚАТЫЎ СИСТЕМАСЫН ТҮП-ТИЙКАРЫНАН ЖЕТИЛИСТИРИЎ ИЛАЖЛАРЫ ҲАҚҚЫНДА

ӨЗБЕКИСТАН РЕСПУБЛИКАСЫ ПРЕЗИДЕНТИНИҢ ҚАРАРЫ

Қабыл етилген нызам ҳүжжетлериниң сөзсиз ҳәм  ўақтында орынланыўында нормативлик-ҳуқықый ҳүжжетлерди өз ўақтында тарқатыў, орынлаўшыларға ҳәм халыққа олардың мазмун-мәнисин түсиндириўдиң нәтийжели механизмлерин жаратыў үлкен әҳми­йетке ийе.

Соның менен бирге, әмелге асырылып атырған илажларға қарамастан, нызам ҳүжжетлерин тарқатыўдың бир пүтин системасы қәлиплеспеген, нормативлик-ҳуқықый ҳүжжетлерди, соның ишинде, рәсмий тарқатпаларды орынлаўшылар­ға жеткериўдиң, түсиндириў жумысларын алып барыўдың тәртиби ҳәм мүддетлери және бул саладағы қадағалаў орнатылмаған.

Пуқараларды ҳуқықый хабардар етиў тийкарынан дәстүрий ғалаба хабар қураллары арқалы қағаз көринисинде әмелге асырылмақта, бул болса ҳуқықый мәлимлемениң толықлығына ҳәм еркин пайдаланылыўына, оның өз ўақтында тарқатылыўына унамсыз тәсир көрсетпекте. Бунда халықтың социаллық белсенди қатламлары, соның ишинде, исбилерменлердиң ҳәм жаслардың мәлимлемеге болған талаплары ҳәм сораўлары инабатқа алынбай атыр.

Ҳәрекеттеги кемшиликлер елимизде алып барылып атырған реформаларды әмелге асырыў, жәмийетте нызам үстинлиги ҳәм нызамшылық принциплериниң нәтийжелилигине унамсыз тәсир етпекте.

Нормативлик-ҳуқықый ҳүжжетлерди тарқатыў системасын түп-тийкарынан жетилистириў, орынлаўшыларды ҳәм халықты нызам  ҳүжжетлериниң мазмун-әҳмийетин ҳаққындағы ҳуқықый мәлимлеме менен тәмийинлеўдиң сапасын арт­тырыў, бул саладағы жумысларды шөлкемлестириўге принципиаллық жаңа көз-қарасларды ислеп шығыў мақсетинде:

1. Қабыл етилген нормативлик-ҳуқықый ҳүжжетлерди, оларға киргизилген өзгерислер менен қосымшаларды орынлаўшыларға өз ўақтында жеткериўди тәми­йинлеў, олардың мазмун-әҳмийетин түсиндириў, сондай-ақ, тийисли нызам ҳүжжетлериниң текстинен иркинишсиз пайдаланыў имканиятын жаратыў ҳәм өзиниң қурамлық және аймақлық бөлимлеринде нызам ҳүжжетлери нормаларының бир түрде қолланылыўы үстинен турақлы қадағалаўды әмелге асырыў, министрлик, мәмлекетлик комитетлер, ведомстволар, хожалық басқарыў уйымлары ҳәм жергиликли мәмлекетлик ҳәкимият уйымларының әҳмийетли ўазыйпалары етип белгиленсин.

2. 2017-жылдың февралынан сондай тәртип орнатылсын, оған бола:

Өзбекистан Республикасы Олий Мажлиси Нызамшылық палатасына киригизилип атырған нызам жойбарларының текстлеринде тийисли нызамлар қабыл етилгеннен кейин оның орынланыўын шөлкемлестириў, орынлаўшыларға жеткериў ҳәм халық арасында мазмун-әҳмийетин түсиндириўди шөлкемлестириўге жуўапкер болған анық мәмлекетлик уйымлар, соның ишинде, мәмлекетлик басқарыў уйымлары көрсетилиўи шәрт;

ҳүжжетти қадағалаўды әмелге асырыў жүкленген жуўапкер мәмлекетлик уйым яки шөлкем, сондай-ақ, лаўазымлы шахслар тәрепинен қол қойылғаннан соң, оны орынлаў, орынлаўшыларға жеткериў ҳәм оның мазмун-әҳмийетин халық арасында түсиндириў бо­йынша илажлар режеси тас­тыйықланады;

нормативлик-ҳуқықый ҳүжжетлерге қол қойылған күни мәлимлеме-талқылаў материаллары менен бирге (нормативлик-ҳуқықый ҳүжжеттиң концепциясы билдирилген түсиндириў хаты, өзгерислер менен қосымшалар түсиндирилген ҳалдағы салыстырыў кестеси) қағаз ҳәм электрон түрде Өзбекистан Республикасы Әдиллик министрлигине жибериледи;

Өзбекистан Республикасы Әдиллик министрлиги бир күнлик мүддетте нормативлик-ҳуқықый ҳүжжетлерди ҳәм тийисли мәлимлеме-талқылаў материалларын Өзбекистан Республикасы Министрлер Кабинети тәрепинен белгиленетуғын дизим бойынша барлық мәмлекетлик уйымларға ҳәм шөлкемлерге электрон түрде жеткерилиўин тәми­йинлейди;

мәмлекетлик уйымлар ҳәм шөлкемлер нормативлик-ҳуқықый ҳүжжетлердиң мәлимлеме-талқылаў материаллары тийкарында, қабыл етилген нызам ҳүжжетлерин орынлаўшыларға жеткериў ҳәм оның мазмун-әҳмийетин халыққа түсиндириў бойынша илажлар әмелге асырылыўын тәмийинлейди.

3. Нызам ҳүжжетлерин тарқатыў, олардың мазмун-әҳмийетин орынлаўшыларға ҳәм халыққа түсиндириў схемасы 1-қосымшаға муўапық тастыйықлансын.

4. Өзбекистан Республикасы Әдиллик министрлигине төмендеги қосымша ўазыйпалар ҳәм функциялар жүкленсин:

нормативлик-ҳуқықый ҳүжжетлерди барлық мәмлекетлик уйымларға ҳәм шөлкемлерге өз ўақтында жеткериў, олардың нормативлик-ҳуқықый ҳүжжетлерди тарқатыў бойынша жумысын нәтийжели муўапықластырыў, методикалық басшылық етиў ҳәм қадағалаў;

мәмлекетлик уйымларды, пуқаралардың өзин-өзи басқарыў уйымларын, мәмлекетлик емес коммерциялық емес шөлкемлерди ҳәм ғалаба хабар қуралларын, пуқаралық жәмийетиниң басқа да институтларын тартқан ҳалда жәмийетте ҳуқықый үгит-нәсиятты шөлкемлестириў;

мәмлекетлик ҳәкимият ҳәм басқарыўды буннан былай да демократияластырыўдың ҳуқықый тийкарларын раўажландырыў ҳәм жети­лис­тириў, пуқаралық жәмийетин қәлиплестириў, суд-ҳуқық системасын раўажландырыў, социаллық-экономикалық реформаларды тереңлестириў, сондай-ақ, елимизде нызам дөретиўшилиги, ҳуқықты қолланыў, ҳуқық қорғаў жумысы саласында фундаментал ҳәм әмелий изертлеўлердиң әмелге асырылыўын муўапықластырыў;

суд экспертизасы жумысын буннан былай да раўажландырыўдың тийкарғы бағдарларын ислеп шығыў, суд экспертлерин таярлаў ҳәм маманлығын арттырыў саласындағы жумысларды муўапықластырыў;

суд экспертизасы саласындағы системалы машқалаларды комплексли үйрениў ҳәм оларды шешиўге байланыслы илимий тийкардағы усынысларды ҳәм тәсиршең механизмлерди ислеп шығыў.

5. Өзбекистан Республикасы Әдиллик министрлигиниң Нызам ҳүжжетлерин жәмлеў ҳәм ҳуқықый мәлимлеме басқармасы және Ҳуқықый үгит-нәсият ҳәм ҳуқықый билимлендириў бас­қармасы негизинде:

басқарма хызметкерлериниң шекленген улыўма саны тийисли түрде 10 ҳәм 28 штат бирлиги болған Өзбекистан Республикасы Әдиллик министрлигиниң Ҳуқықый үгит-нәсият ҳәм мәлимлеме басқармасы және оның Қарақалпақстан Республикасы Әдиллик министрлиги, ўәлаятлар ҳәм Ташкент қалалық әдиллик басқармаларындағы аймақлық бөлимлери;

басқарма хызметкерлериниң шекленген улыўма саны 7 штат бирлиги болған Өзбекистан Республикасы Әдиллик министрлигиниң Юридикалық билимлендириў ҳәм суд-экспертиза жумысын муўапықластырыў басқармасы шөлкемлестирилсин.

6. Ҳуқықый үгит-нәсият ҳәм ағартыўшылық бойынша мәмлекетлик уйымлардың жумысларын муўапықластырыў бойынша Ведомстволараралық кеңес (ке­йинги орынларда — Ведомстволараралық кеңес)тиң жаңаланған қурамы 2-қосымшаға муўапық тасты­йықлансын.

Қарақалпақстан Республикасы Министрлер Кеңеси, ўәлаятлар ҳәм Ташкент қалалық ҳәкимликлери бир ҳәптелик мүддетте аймақлық әдиллик басқармалары баслықларының басшылығында, қурамына басқа да ҳуқық қорғаў уйымларының, судлардың, мәмлекетлик бас­қарыў уйымларының, билимлендириў мәкемелериниң, мәмлекетлик емес коммерциялық емес басқа да шөлкемлердиң ўәкиллерин киргизген ҳалда Ведомстволараралық кеңестиң аймақлық комиссияларын шөл­кемлестирсин.

Төмендегилер Ведомстволараралық кеңес ҳәм оның аймақлық комиссияларының тийкарғы ўазыйпалары етип белгиленсин:

орынлаўшыларды ҳәм халықты нызамшылықтың мазмун-мәниси ҳаққында хабардар етиўдиң сапасын түп-тийкарынан арттырыў, бул жумысты шөлкемлестириўге принципиаллық жаңа көз-қарасларды ислеп шығыў бойынша комплексли илажларды қабыл етиў;

халықтың түрли қатламларын, соның ишинде, исбилерменлердиң ҳәм жаслардың мәлимлемеге болған талапларын есапқа ала отырып, ҳуқықый үгит-нәсиятты ҳәм ағартыўшылықты әмелге асырыўдың заманагөй механизмлерин енгизиў;

мәмлекетлик уйымлардың ҳәм шөлкемлердиң ҳуқықый мәлимлемеден кең көлемде пайдаланыўын тәмийинлеў, усы салада пуқаралық жәмийети институтлары ҳәм ғалаба хабар қураллары менен нәтийжели бирге ислесиў жумысын муўапықластырыў.

7. Өзбекистан Республикасы Олий Мажлиси Сенаты, Қарақалпақстан Республикасы Жоқарғы Кеңеси, халық депутатлары ўәлаятлық ҳәм Ташкент қалалық Кеңеслеринде ҳәр жылы ти­йислисинше Өзбекистан Республикасы Әдиллик минис­трлиги ҳәм оның аймақлық басқармаларының ҳуқықый үгит-нәсият ҳәм ағартыўшылықтың жағдайы ҳаққындағы мәлимлемесиниң тыңланыўы әмелиятқа енгизилсин.

8. Өзбекистан Республикасы Нызам ҳүжжетлери мағлыўматлары миллий базасы (кейинги орынларда — Миллий база)на 2017-жылдың 25-сентябринен нормативлик-ҳуқықый ҳүжжетлер жәрияланатуғын рәсмий дәрек статусы берилиўи мүнәсибети менен:

Өзбекистан Республикасы Әдиллик министрлиги жанындағы Ҳуқықый мәлимлеме менен тәмийинлеў орайына (кейинги орынларда — Орай) нызам ҳүжжетлериниң Миллий базада рәсмий басып шығарылыўын тәмийинлеў жуўапкершилиги жүкленсин;

Өзбекистан Республикасы Мәлимлеме технологияларын ҳәм коммуникацияларын раўажландырыў минис­трлиги еки ай мүддетте Өзбекистан Республикасы Әдиллик министрлиги ҳәм мәмлекетлик уйымлар және шөлкемлер арасында нызам ҳүжжетлерин тез тарқатыў мақсетинде қорғалған байланыс каналлары (VPN) ар­қалы ведомстволараралық электрон бирге ислесиўди шөлкемлестирсин;

Өзбекистан Республикасы Конституциялық суды, Жоқарғы суды ҳәм Жоқары хожалық судына Конституциялық суд қарарларын, Жоқарғы суд ҳәм Жоқары хожалық суды пленумларының нызам ҳүжжетлерин қолланыў мәселелери бо­йынша түсиниклер бериў ҳаққындағы қарарларын олар қол қойған күннен баслап бир күнниң ишинде электрон түрде Миллий базаға орналастырыў ушын Орайға жибериў усыныс етилсин;

Өзбекистан Республикасы Сыртқы ислер минис­трлиги Өзбекистан Республикасы халықаралық шәртнамаларының элек­трон версияларын олар күшке кирген күннен баслап бир күнниң ишинде Миллий базаға орналастырыў ушын Орайға жиберсин;

Сыртқы экономикалық байланыслар, инвестициялар ҳәм саўда министрлиги Өзбекистан Республикасы Әдиллик министрлиги ҳәм басқа да мәпдар министрликлер ҳәм ведомстволар менен биргеликте Миллий база шеңберинде ең көп талап етилетуғын нормативлик-ҳуқықый ҳүжжетлер текстлериниң инглис тилиндеги мағлыўматлар банкин жаратыў, Миллий базаны жетилистириў ҳәм Орайдың материаллық-техникалық базасын беккемлеў бойынша жумысларды қаржыландырыў ушын белгиленген тәртипте техникалық жәрдем (грантлар)ди тартыў мәселесин ислеп шықсын.

9. Өзбекистан Республикасы Әдиллик министрлиги нормативлик-ҳуқықый ҳүжжетлерди тарқатыў ҳәм ҳуқықый үгит-нәсият системасын жетилистириў мақсетинде әдиллик уйымларының ҳәм Орайдың материаллық-техникалық базасын раўажландырыў ушын Өзбекистан Республикасы Минис­трлер Кабинети тастыйықлайтуғын дизимлерге бола алып кирилетуғын Өзбекистан Республикасында ислеп шығарылмайтуғын үскене, компьютер ҳәм сервер техникасы, техникалық қураллар, бағдарламалық өнимлер ҳәм басқа да материаллық-техникалық ресурс­лар ушын 3 жыл мүддетке бажыхана төлемлерин (бажыхана рәсмийлестирилиўи жыйынларынан тыс­қары) төлеўден азат етилсин.

10. Өзбекистан Республикасы Әдиллик министрлиги бир ай мүддетте:

нормативлик-ҳуқықый ҳүжжетлерди тарқатыўдың тәсиршең механизмлерин, оларды халық арасында кеңнен түсиндириў бойынша илажларды нәзерде тутатуғын «Ҳуқықый мәлимлемени тарқатыў ҳәм оннан пайдаланыўды тәмийинлеў ҳаққында»ғы нызам, сондай-ақ, жаңаланған Ҳуқықый үгит-нәсият ҳәм ағартыўшылық бойынша мәмлекетлик уйымлардың жумысыларын муўапықластырыў бойынша Ведомстволараралық кеңес ҳаққындағы реже жойбарларын Өзбекистан Республикасы Министрлер Кабинетине киргизсин;

Өзбекистан баспасөз ҳәм хабар агентлиги, Электрон ғалаба хабар қураллары миллий ассоциациясы ҳәм Өзбекистан миллий телерадиокомпаниясы менен биргеликте ғалаба хабар қуралларының қабыл етилип атыр­ған нормативлик-ҳуқықый ҳүжжетлердиң мазмун-әҳмийетин жеткериў бойынша ролин буннан былай да күшейтиўди, нызам ҳүжжетлерине бийғәрез экспертлер, қәнигелер ҳәм халықтың пикирин және мүнәсибетин сәўлелендиретуғын талқылан­ған ток-шоулар, көз-қараслар, пикир-усыныслар және нызам ҳүжжетлери ҳәм ҳуқықты қолланыў әмелиятын кеңнен додалаўдың басқа да заманагөй түрлерин енгизиўди нәзерде тутатуғын Комплексли бағдарламаны ислеп шықсын ҳәм тастыйықласын;

ҳуқық қорғаў уйымлары ҳәм судлардың экспертлик изертлеўлерге болған талапларынан келип шығып, Өзбекистан Республикасы Әдиллик министрлиги жанындағы Х.Сулайманова атындағы республикалық суд экспертизасы орайы аймақлық бөлимшелериниң санын көбейтиўге байланыслы усыныслар киргизсин;

мәпдар министрликлер ҳәм ведомстволар менен биргеликте нызам ҳүжжетлерине усы қарардан келип шығатуғын өзгерислер менен қосымшалар ҳаққында усыныслар киргизсин.

11. Усы қарардың орынланыўын қадағалаў Өзбе­кис­тан Республикасының Бас министри А.Н.Ариповқа ҳәм Өзбекистан Республикасы Президентиниң мәмлекетлик кеңесгөйлерине жүк­ленсин.

Өзбекистан Республикасы Президенти Ш.МИРЗИЁЕВ.

Ташкент қаласы, 2017-жыл 8-февраль.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF