Еркин Қарақалпақстан Вести Каракалпакстана 08:52:57, 04.07.2020
Хош келипсиз! | RSS
Сайт мазмуны

Кириў усылы

ИНСАН МӘПЛЕРИ ХАЛЫҚ ПЕНЕН ТИККЕЛЕЙ ПИКИРЛЕСИЎ АРҚАЛЫ ТӘМИЙИНЛЕНЕДИ

Президентимиз Шавкат Мирзиёев елимиз Конституциясы қабыл етилгениниң 24 жыллығына бағышланған салтанатлы мәресимде «Парламентлик ҳәм жәмийетлик қадағалаўдың тәсиршең механизмлерин қәлиплестириў мақсетинде қала ҳәм районларда ҳақыйқый жағдайды үйренип, тийисли басшылардың есабатын халық депутатлары кеңеслери сессиясының додалаўына киргизиў тәртибин енгизиўди турмыстың өзи талап етпекте» деген пикирге айрықша тоқтап өткен еди.

Президентимиздиң белгилеп берген ўазыйпасы тийкарында Өзбекистан Республикасы Олий Мажлиси Нызамшылық палатасы депутатлары ҳәм Сенат ағзалары жергиликли Кеңес депутатларының қатнасында Шымбай ра­йонында аймақты социаллық-экономикалық раўажландырыў, халықтың турмыс дәрежесин буннан былай да жақсылаў, пуқаралардың ҳуқық ҳәм еркинликлерин тәмийинлеў бағдарында алып барылып атырған жумысларды үйренип шықты.

Усы жылдың 8-февраль күни халық депутатлары Шымбай районлық Кеңесиниң он тоғызыншы сессиясы селектор тәризинде болып өтти.

Сессияны районлық Кеңес депутаты, «Мәҳәлле» қайырқомлық жәми­йетлик фондының районлық бөлими баслығы Б.Абдуллаев алып барды.

«Өзбекистан Республикасы Олий Мажлиси Нызамшылық палатасы депутатлары ҳәм сенаторлар тәрепинен усы жылдың 1-7-февраль күнлери Шымбай районында аймақты раўажландырыўдың ең әҳмийетли мәселелерин шешиўге, пуқаралардың ҳуқықлары менен еркинликлерин тәмийинлеўге байланыслы үйрениў нәтийжелери ҳаққында»ғы мәселе бойынша Олий Мажлис Нызамшылық палатасының депутаты Ж.Абдижамилов баянат жасады.

Үйрениў нәтийжелери және әмелге асырылыўы тийис болған баслы ўазыйпалар ҳаққында район ҳәкими Ө.Қазақбаев кең түрде шығып сөйлеп, орын алған кемшиликлерди сапластырыў илажлары ҳәм алда турған ўазыйпаларға айрықша итибар қаратты. Буннан соң күн тәртибиндеги мәселе бо­йынша «Нураный» қорының районлық Кеңесиниң баслығы Ө.Толыбеков, «Бердақ» мәкан пуқаралар жыйыны баслығы Ф.Палванова, Өзбекистан - Қытай қоспа кәрханасы «Ланэкстракт» жуўапкершилиги шекленген жәмийетиниң атқарыўшы директоры М.Гаипов, райондағы 5-санлы мектептиң директоры Т.Палваниязова, районлық Ишки ислер бөлиминиң баслығы   П.Ещанов, район прокуроры Д.Елмуратов, сондай-ақ, республикамыздың бир қатар министрлик, мәкеме, кәрхана басшылары шығып сөйледи.

Сессияда Қарақалпақстан Республикасы Жоқарғы Кеңесиниң Баслығы М.Ерниязов районда исбилерменликти қоллап-қуўатлаў, билимлендириў, медицина, саўда, хызмет көрсетиў салаларын раўажландырыў, халықтың бәнтлигин тәмийинлеў, коммуналлық хызметлердиң сапасын жақсылаў, жергиликли Кеңес депутатларының белсендилигин арттырыў менен байланыслы бир қатар мәселелерге айрықша тоқтап өтти.

Сессияда Өзбекистан Республикасы Нызамшылық палатасының Спикери Н.Исмоилов қатнасты ҳәм күн тәртибиндеги мәселе бойынша кең түрде шығып сөйледи.

Билдирилген пикир-усыныслар тийкарында тийисли қарарлар қабыл етилди.

Усының менен халық депутатлары Шымбай районлық Кеңесиниң он тоғызыншы сессиясы өз жумысын тамамлады.

Қарақалпақстан хабар агентлиги.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF