Еркин Қарақалпақстан Вести Каракалпакстана 07:33:39, 27.09.2020
Хош келипсиз! | RSS
Сайт мазмуны

Кириў усылы

ТРАНСПОРТ ХЫЗМЕТИН ЖАҚСЫЛАЎ УШЫН

Хабарыңыз болса, Өзбекистан Республикасы Президенти Ш.Мирзиёев өткен жылғы сайлаўалды ушырасыўында да, орынларда социаллық-экономикалық реформалардың барысы, халқымыздың турмыс дәрежесин ҳәм сапасын буннан былай да арттырыўға қаратыл­ған дөретиўшилик ҳәм абаданластырыў жумыслары менен жақыннан танысыў, халық пенен ушырасыў және пикирлесиў мақсетинде усы жылдың 20-21-январь күнлери Қарақалпақстан Республикасына еткен сапарында да Шоманай районында болған еди.

Соны айрықша атап өтиў керек, бүгинги күнде район инфраструктурасын жақсылаў, бул жерде жасаўшы халықтың турмыс дәрежесин көтериў мақсетинде көлемли жумыслар исленбекте. Атап өтетуғын болсақ, Шоманайда нан ҳәм нан өнимлери, трикотаж буйымларын ислеп шығарыўды ҳәм турмыс хызметин көрсетиўди және де раўажландырыў бойынша бир қатар жойбарлар әмелге асырылады. Сондай-ақ, районда жаңадан 2 мектеп қурылыўы, 3 мектепке капитал оңлаў жумыслар жүргизилиўи, балалар ҳәм жас өспиримлер спорт мектебин II типке масластырылған реконс­трукциялаў ислериниң алып барылыўы режелестирилген.

Өткен шемби күни район халқының турмысында және бир қуўанышлы ўақыя жүз берди. Өзбекистан Республикасы Президентиниң «2017-2021-жылларда Аралбойы аймағын раўажландырыў мәмлекетлик бағдарламасы ҳаққында» ҳәм Қарақалпақстан Республикасы Министрлер Кеңесиниң «Қарақалпақстан Республикасы аймақларын социаллық-экономикалық раўажландырыў, халықтың турмыс дәрежесин және де жақсылаўға байланыслы қосымша ис-илажлар бағдарламасы ҳаққында»ғы қарарлары талапларын орынлаў ҳәм Шоманай районында халыққа транспорт хызметин көрсетиўди жақсылаў ушын 10 дана «Isuzu» ҳәм 15 дана «Дамас» автомобильлери шәртнама тийкарында берилди.

Жаңа транспортларды тапсырыў мәресимине Қарақалпақстан Республикасы Министрлер Кеңесиниң Баслығы Қ.Сариев, «Қарақалпақавтотех» акционерлик жәмийетиниң баслығы П.Қайыпбеков ҳәм район ҳәкими Б.Янгибаевлар қатнасып, жыйналғанларды қызғын қутлықлады ҳәм бул илаж Президентимиз Ш.Мирзиёевтың республикамыз халқына болған ғамқорлығының және бир көриниси екенин атап өтти.

С.ЖАНИЕВ, арнаўлы хабаршымыз.

СҮЎРЕТТЕ: жаңа транспортларды тапсырыў мәресиминен көринис.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF