Еркин Қарақалпақстан Вести Каракалпакстана 09:14:30, 04.07.2020
Хош келипсиз! | RSS
Сайт мазмуны

Кириў усылы

САПА СИСТЕМАСЫ ТАЛАП ДӘРЕЖЕСИНДЕ

Қарақалпақстан Республикасы Министрлер Кеңеси тәрепинен республикамыздағы өнимлерин экспорт етиўши кәрханаларда ISO 9001: 2015 халықаралық стандарт талаплары тийкарында сапа менеджмент системасын енгизип, халықаралық дәрежеде тән алынған уйым тәрепинен сертификатластырыў режеси тасты­йықлан­ған еди. Усы реже бо­йынша халықаралық стандартлар талапларын енгизиў, кәрханалар ушын сапа системасының абзаллықлары ҳәм әҳмийети, заманагөй басқарыў системасына кәрхана баслықларының (басқарыўдың заманагөй методларын енгизиўде) билим ҳәм көнликпелерин арттырыў мақсетинде семинарлар өткериў белгиленген.

Усы реже тийкарында «Өз­стандарт» агентлиги Қарақалпақстан Сынаў ҳәм сертификатластырыў орайы мәмлекетлик кәрханасы тәрепинен аймағымыздағы экспортқа өним шығарыўшы кәрханаларға халықаралық стандарт нормалары, сапа менеджмент системасын енгизиў мақсетинде окыў семинары шөлкемлесирилди. Илажда Германияның «Tuv Thuringen» халық­аралық сертификатластырыў уйымы­ның Орта Азия мәмлекетлери бойынша ўәкили, халық­аралық «MANAGEMENT» журналының бас редакторы Риад Ибрагимов сапа системасын енгизиў бойынша республикамыздағы экспорт етиўши кәрхана басшыларына ҳәм исбилерменлик субъектлери ўәкиллерине түсиниклер берди.

— Семинар тийкарынан интерактив усылларда тәжирийбели қәнигелер қатнасыўында өткерилип, мәмлекетимизде исбилерменликти еле де раўажландырыўда билим ҳәм көнликпелеримизди, жетекшилик қәбилетлеримизди еле де жетистириўде бир қатар усыныслар берилди. Әлбетте, булардың барлығы елимизде исбилерменлик субъектлерине жаратылып атыр­ған кең имканиятлардың нәтийжеси деп билемиз,-дейди семинар қатнасыўшысы «Халлықан» ЖШЖниң басқарыўшысы Гүмисай Бабажанова.

Илаж соңында қатнасыўшылар өзлерин қызықтырған сораўларына қәнигелерден жуўаплар алды.

Р.АРЗИЕВ.

СҮЎРЕТЛЕРДЕ: семинардан көринислер.

Автордың түсирген сүўретлери.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF