Еркин Қарақалпақстан Вести Каракалпакстана 23:54:46, 19.10.2018
Хош келипсиз! | RSS
Сайт мазмуны

Кириў усылы

Жаңалықлардың жанлы айнасы

Ғәрезсизлик жылнамаларына нәзер таслар екенбиз, бәрше тараўлар сыяқлы ғалаба хабар қураллары саласында да кең көлемли жаңаланыўлар әмелге асырылып келинбекте. Ең тийкарғысы, жәмийетимиздиң ажыралмас бөлеги есапланған телевидениениң материаллық-техникалық базасы ҳәр тәреплеме беккемленип, жыл сайын раўажланып, турмысымызда жүз берип атырған ҳәр бир ўақыя ҳәм жаңалықлардың жанлы айнасына айланып бармақта.

Әсиресе, Қарақалпақстан телевидениеси менен биргеликте бир қатар қала ҳәм районларымызда жумыс алып барып атырған жергиликли телевидениелердиң жумысларын да үлкен жетискенликлеримиздиң бири сыпатында айтып өтсек арзыйды.

2010-жыл 1-сентябрь сәнесинде өзиниң дәслепки көрсетиўлери менен биринши қәдемин атқан «Әмиў­дәрья телевидениеси»ниң жумыслары да бүгинги күнге келип әдеўир дәрежеде жетилисти, көрсетиўлер сапа ҳәм мазмун жағынан ҳәр тәреплеме байыды, эфир ўақты кеңейип, тамашагөйлер саны да көбейди. Бул табысларға әлбетте телевидение жәмәәтиниң тынымсыз мийнетлери, өз кәсибине бол­ған пидайылығы нәтийжесинде ерисилди.

- Ҳәзирги күн телевидениемиздиң көрсетиўлер ўақты 4 саатты қурайды ҳәм ҳәптениң алты күнинде эфиге узатылады. Бәршемизге мәлим, бүгинги раўажлан­ған технологиялар әсиринде халықтың хабар ҳәм жаңалықларға болған талабы күн сайын артып бармақта. Сонлықтан да халқымыздың оператив информацияларға болған талабын қанаатландырыў мақсетинде районымыздың бәрше аймақларында ҳәм ҳәр бир тараўда жүз берип атырған жаңалықларды «Замин» информациялық бағдарламасы арқалы өз ўақтында, қалыс түрде жеткерип барыўға ҳәрекет етип атырмыз. Буннан тысқары, шетки аўылларымыз бенен мәҳәллелеримиз турмысын кеңнен жарытыў, заманымыз қаҳарманларының мийнетлерин жәмийетшиликке үгит-нәсиятлаў, районымыз көлеминде киши бизнес пенен жеке исбилерменликти раўажландырыўға қаратылып атырған итибар ҳәм олардың жетискенликлери, ти­йисли тараў қәнигелери менен биргеликте жасларымыздың арасында саламат турмыс тәризин қәлиплестириў, бәркамал, нәўқыран әўладты тәрбиялап жетилис­тириў ҳәм басқа да бир қатар рәң-бәрең жанрлардағы көрсетиўлерди берип барыўға да айрықша итибар қаратылмақта. Депутатларымыз бенен сайлаўшылар арасындағы байланысты беккемлеўде «Депутат ҳәм турмыс» көрсетиўи үзликсиз түрде сәўлелендирилип атыр­ған болса, «Зиё» атамасында шөлкемлестирилген интеллектуал телеойынға улыўма орта билим бериў мектеплери менен кәсип-өнер колледжлеринде билим алып атырған жасларымыздың қызығыўшылығы күн сайын артып бармақта. Усындай жетискенликлерге ерисиўимизде әлбетте дөретиўшилик жәмәәтимиздеги ҳәр бир хызметкердиң салмақлы үлеси бар, - дейди «Әмиўдәрья телевидениеси»ниң бас редакторы Ғулам Ешниязов.

Бүгинги дәўир тез пәтлер менен раўажланып бармақта. Дерлик ҳәр күни пайда болып атырған технологиялық жаңалықларды өз ўақтында өзлестирип, дәўир менен тең қәдем атыў бәршемизден үлкен жуўапкершиликти талап етеди. «Әмиўдәрья телевидениеси»ниң дөретиўшилик жәмәәти де усы жуўапкершиликти тереңнен сезине отырып бәрқулла жаңа мазмундағы көрсетиўлерди жолға қойыў, олардың сапасын ҳәм рәң-бәреңлигин арттырыў, эфир ўақтын ҳәм тарқатылыў шеңберин және де кеңейтиў мақсетинде кең көлемли жумыслар алып бармақта. Биз де өз гезегинде әмиўдәрьялы кәсиплеслеримизди бүгинги байрам менен қутлықлап, халық ийгилиги жолындағы машақатлы ислеринде табыслар тилеймиз.

Қ.АЖИБАЕВ.

Әмиўдәрья районы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF