Еркин Қарақалпақстан Вести Каракалпакстана 00:01:51, 20.10.2018
Хош келипсиз! | RSS
Сайт мазмуны

Кириў усылы

Балаларды бахтыяр еткен басылым

Оқыўшылық дәўирим еди. Бир күнлери мектебимизде айы­р­ым муғаллимлердиң майда-шүйде нәрселерди әкелип, кәсиплеслерине сатып жүргенлигин сезип қалдым. Себеби, сабақлар үзилиске түсе баслаған еди. Оның үстине, бундай әдет жоқары класс оқыўшылары арасында да жүз бере баслады. Ойланып отырмай, сүйикли газетамыз болған «Жеткиншек»ке «Мектеп ­ саўдагершиликтиң орны емес» деген темада мақала жазып жибердим ҳәм ол газетаның жақын санларының биринде жарық көрди. Мақалада мектебимиздиң аты көрсетилмеген болса да, директорымыз педагогикалық кеңес мәжилисин өткерип, жоқарыдағыдай аўҳалға тыйым салынды.


Бул жағдай журналистикаға болған қызығыўшылығымды арт­тырып, «Жеткиншек»ке басқа да дөретпелеримди жибере басладым ҳәм олар турақлы түрде шығып турды. Шымбайдан Бахыт Палўанов, Гүлдана Айтымбетова, Нөкистен Минажатдин Қутлымуратов, Гүлзар Қалба­ева, Миясар Қабулова, Қанлы­көлден Абат Крамов, Хожелиден мен ҳәм басқа да бир қатар жас қәлем ийелери газетаның жас хабаршылар клубының белсенди ағзасы болып, ҳәр қыйлы темаларда мақалалар жазар едик. Соны мақтаныш пенен айтыў мүмкин, өз дөретиўшилигиниң дәслепки қәдемин әйне «Жеткиншек»тен баслаған бул жаслардың басым көпшилиги соңғылығында өз кәсибиниң белгили маманлары болып жетилисти.

Булардың барлығын сөз етип отырғандағы мақсетим ­ республикамыз балалары менен жас өспиримлериниң бахтияр турмысын тәмийинлеўде гиреўли орны бар бул газета быйыл 80 жасқа шығып отыр. Жоқарыда айтқанымдай, усы дәўир ишинде ол қаншадан-қанша жазыўшы-шайырлар, журналистлер ушын ҳақыйқый дөретиўшилик мектеби болып хызмет атқармады дейсиз? Соңғылығында белгили мәмлекетлик ғайраткерлер, жәмийетлик искерлер болып жетилискен көплеген жерлеслеримиз де әйне усы газетаның дөретиўшилик устаханасында шыңланды, десем асыра айт­қан болмайман.

Дәслепки саны 1932-жылдың 20-январында Төрткүл қаласында 1550 нусқада басылып шыққан «Жеткиншек» бүгинги күнде кишкенелеримиздиң қәлбинде Ўатанды сүйиў, дослықты қәстерлеў, тәбиятты қорғаў, халқымыздың салт-дәстүрлери менен үрп-әдетлерин абайлап-асыраў сезимлерин тәрбиялаўда, республикамыздағы барлық балалардың миллетине, социаллық шығысына қарамастан, олардың ҳуқықларын қорғаўда, ҳүкиметимиз, Қарақалпақстан Республикасы Халық билимлендириў министрлиги ҳәм «Камалак» балалар шөлкеми тәрепинен алға қойылған ўазыйпаларды орынлаўда минсиз хызмет етип киятыр.

Газета бетлеринен турақлы орын алған «Мектеп турмысы», «Сениң үлгили досларың», «Мектептен тыс билимлендириў ­ дәўир талабы», «Дыққат, жас өспирим!», «Келиң, досласайық!», «Хабаршыларымыз хабарлайды» ҳәм басқа да көплеген рубрикалар астында жәрияланып атырған мақалалар, «Мийрас», «Барлығын билгим келеди», «Аңқаў кескир», «Түлкишек», «Желқом», «Қулағыңа гәпим бар», «Малика» клублары, «Қарлығаш» тә­бият газетасы арқалы берилип киятырған материаллар оқыўшылардың сүйикли дөретпелерине айланған. Соны да айтып өтиўимиз тийис, бул газета республикамызда латын графикасында шығатуғын бирден-бир басылым болып есапланады.

Газета редакциясында бүгинги күнде тәжирийбели журналист Абдулла Ембергеновтың басшылығында жақсы дөретиўшилик жәмәәт қәлиплескен. Жуўаплы хаткер Дарийха :ббиниязова, хабаршылар Зухра Исакова, Жеңисгүл Ибадуллаева, компью­тер операторы Қабыл Бегимов, художник Еркин Хожамуратовлар ҳәр бир санның версткасы алдынан сол санның сапалы ҳәм мазмунлы шығыўы ушын терең ойласып-кеңесип алады.

«Жеткиншек»тиң бир артықмаш тәрепи, ол соңғы пайытларда сәл кешеўиллеп қалған балалар әдебиятының раўажланыўына салмақлы үлес қосып киятыр. «Жәҳән әдебияты дүрданаларынан», «Туўысқан халықлар әдебиятынан» рубрикалары астында дүнья ҳәм туўысқан халықлардың жазыўшы-шайырларының шығармаларының, сондай-ақ, жергиликли қәлем ийелери дөретпелериниң турақлы берип барылыўы бул пикиримизди тастыйықлайды.

­ Жақын күнлерде интернет тармағында «Жеткиншек»тиң жеке веб-сайтын ашыў нийетиндемиз, ­ дейди газета бас редакторы А.Ембергенов. ­ Бул арқалы раўажланған басылымлар қатарынан орын алсақ, алдымыз­ға қойған және бир мақсетимиздиң орынланғаны болады...

Ҳәмийше жас ҳәм нәўқыран «Жеткиншек»тиң дөретиўшилик жәмәәти менен гүллән оқыўшыларын газетаның юбилей жасы менен қутлықлай отырып, алдағы жумысларында тасқын табыслар тилеймиз.

Сағындық

ЖАНИЕВ.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF