Еркин Қарақалпақстан Вести Каракалпакстана 16:27:14, 23.08.2019
Хош келипсиз! | RSS
Сайт мазмуны

Кириў усылы

“Деңгенениң үлкенин түйе сойғанда көрдик…”

Нызамлар жетилисип, әмелдеги көриниси қәдемди ойландырып бастыратуғын бүгинги күнимизде “қазаншының ерки бар, қайдан қулақ шығарса” деген нақыл гөнерген нақыллар қатарына қосылып кетти, деп ойлайтуғын едик. Ҳақыйқатында биз ойлағандай болмай шықты. “Деңгенениң үлкенин түйе сойғанда көрерсең” дегендей, былғасықтың үлкени анаў-мынаў кишигирим оқыў орнында емес, Әжинияз атындағы Нөкис мәмлекетлик педагогикалық институтында болыпты дегенде исенер-исенбесимизди билмей қалдық. Педагогикалық институттың есап-санақ бөлими хызметкериниң қылмыслы қылўалары ҳаққында халық арасындағы гәп сөзлер соншелли көбейип кетти, олардың қайсысы дурыс, қайсысы надурыслығын айырыў қыйын еди. Усындай қөдирең сөзлердиң бәрине институт хызметкерлериниң жынаятлы иси бойынша шығарылған суд ҳүкими ноқат қойды.

Усы суд ҳүкиминде Нөкис мәмлекетлик педагогикалық институтының есап-санақ бөлиминде контракт төлемлери бойынша есапшы лаўазымында ислеген Қалбай Отарбаевты қандай шайтан жолдан аздырғаны белгисиз, институттың есап-санақ бөлими экономисти болып ислеп келген Әдилбай Бердимуратов ҳәм “Асака” банктиң өарақалпақстан филиалының пластик карточкалары секторында бақлаўшы болып ислеп келген Рәўшан Қайыпназарова менен жынайы тил бириктиргени анықланғаны айтылады. Олар институтта контракт төлемлери тийкарында оқып атырған 310 студент тәрепинен 2008-2009-оқыў жылында 79 миллион 265 мың 904 сум, 2009-2010-оқыў жылында ҳәм 2011-жылдың биринши ярымында студентлер тәрепинен толық төленген контракт төлемлери үстинен ҳәр бир студенттен 10 мыңнан баслап 1 миллион 100 мың сумға шекем жасырын жол менен алып қалып өзлестирген ҳәм бул контракт төлемлери төленди деген жалған мағлыўматлар жүргизилген. Өзлестирилген қаржы суммасы 298 миллион 860 мың 466 сум екенлиги Өзбекстан Республикасы Салық министрлиги жанындағы бақлаў-тексериў басқармасының Қарақалпақстан бөлими тәрепинен анықланған.

Айта кететуғын бир жағдай, суд ҳүжжетлеринде бул тексериўден бурын 2008-жылдан берли институтта контракт төлемлери бойынша бир неше мәрте тексериўлер өткерилген, бирақ төлемлер дурыс төленип атыр деп табылғаны айтылады. Сонда буған қалай түсиниўге болады? Сонша былғасықлардың ушлығын таўып, ҳәр оқыў жылында жүз берип киятырған жынаяттың алдын ала алмаған тексериўшилерде де айып жоқ деп ким айта алады? Ең болмағанда оқыў жылы ақырында контракт төлемлерин төлеўи тийис неше студенттен анық неше миллион сум институттың есап бетине түсиўи кереклигин басшы да, қосшы да билмейди дегенге ким исенеди?

Қалай болғанда да, республикамыздың илим-билимлендириў тараўында айрықша орны, абырайы бар, тарийхы менен мақтанатуғын педагогикалық институтымызда жүз берген жынаятлы ҳәрекетлер институт жәмәәтине жақсы ат алып бермеди.

Суд мәжилиси ўақтында да бул жынаяттың жүз бериўин бири-биринен көрген топар ағзалары қанша тайсалақламасын, айыплары мойнына қойылды. Суд контракт төлемлеринен институттың есап бетине түспей қалған миллионларды бөлип төлеў ҳәм айыпларына ылайық жаза қолланыў ҳаққында ҳүким шығарды.

П.МЕҢЛИМУРАТОВА.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF