Еркин Қарақалпақстан Вести Каракалпакстана 12:54:51, 26.05.2019
Хош келипсиз! | RSS
Сайт мазмуны

Кириў усылы

ИНТЕЛЛЕКТУАЛ  МҮЛК  ОБЪЕКТЛЕРИ ҲУҚЫҚЛАРЫН  ҚОРҒАЎ — ӘҲМИЙЕТЛИ  ЎАЗЫЙПА

«Интеллектуал мүлк» түсиниги ең дәслеп 1967-жыл 14-июльдеги «Пүткил жәҳән интеллектуал мүлк шөлкемин шөлкемлестириў ҳақ­қында»ғы Стокгольм конвенциясында келисимге келинген. Усы конвенция интеллектуал мүлктиң ҳуқы­қый статусын белгилеў менен бирге оның қурамы, яғный, объектлерин анықлап, шөлкемниң атқаратуғын хызметиниң ҳуқықый тийкарларын көрсетип берди.

Бүгинги күнде пүткил дүньяда интеллектуал мүлк объектлерин қурамларға ажыратыў, оларға ҳуқықый режим бериў ҳәм мәплерин қорғаў дүзимин әпиўайы­ластырыў арқалы кодификациялаў бағдарында жумыслар жүргизилмекте.

Сонлықтан да, интеллектуал мүлктиң ҳуқықый тийкарларын еле де жетилистириў, мәмлекетлик уйымлар, тийисли шөлкемлердиң биргеликтеги хызмет көрсетиўин тәмийинлеў, ең тийкарғысы, жас әўлад арасында тараўға тийисли теориялық ҳәм ҳуқықый билимлерди системалы үйретиў әҳмийетли ўазыйпа саналады.

Базар экономикасы шараятында мәмлекетти ҳәр тәреплеме раўажландырыўдың керекли талапларынан бири интеллектуал мүлк ҳуқықының нызам менен кепиллениўине байланыслы. Сол себепли, мәмлекетимизде ғәрезсизлик жылларында бул тараўға айрықша итибар қаратылып, илимий ҳәм техникалық дөретиўшилик еркинлиги, мәденият табысларынан пайдаланыў ҳуқықы тәмийинленди.

Конституциямыз ҳәм Нызамларымызда интеллектуал мүлктиң беккем ҳуқықый тийкарлары жаратылған.

Мәмлекетимиздиң Биринши Президенти И.Кәримовтың 2011-жыл 24-майдағы «Өзбекистан Республикасы интеллектуал мүлк мәмлекетлик агентлигин шөлкемлестириў ҳаққында»ғы қарары менен Мәмлекетлик Патент мәкемеси ҳәм Авторлық ҳуқықты қорғаў бойынша мәмлекетлик агентлиги негизинде Өзбекистан Республикасы Интеллектуал мүлк мәмлекетлик агентлиги шөлкемлестирилди.

Агентлик интеллектуал мүлк объектлерин ҳуқықый қорғаў бойынша тараўда мәмлекетлик сиясатты әмелге асырыўды тәмийинлеў, ойлап табыўшылық, көркем өнер үлгилери, пайдалы моделлер, товар белгилери ҳәм басқа да интеллектуал мүлк объектлерин ҳуқықый қорғаў ислерин әмелге асырады. Сондай-ақ, тараўға байланыслы ҳүжжетлер талабына сай жумыс алып барылыўын қадағалайды, республикамыз аймағына жасалма товарлардың нызамсыз алып келиниўи ҳәм айланысына жол қоймаў ушын ўәкилликли мәмлекетлик уйымлар менен биргеликте ислесиў, бул бағдарда халықаралық тығыз ислесиўди раўажландырыў, исбилерменлик субъектлери ушын интеллектуал мүлк тараўында кадрлардың қәнигелигин жетилистириў ҳәм қайта таярлаў бойынша жумыслар агентликтиң ўазыйпасы саналады.

Ҳақыйқатында да, бүгинги күнде интеллектуал мүлк тараўы ҳәр бир мәмлекеттиң экономикасының ажыралмас бөлегине айланды. Тараўға байланыслы агентликтиң шөлкем­лестирилиўи, журтымызда әмелге асырылып атырған реформалардың раўажланыўына унамлы тәсирин тийгизбекте.

Жуўмақластырып айт­қанда, бүгин интеллектуал мүлк ҳәр бир мәмлекеттиң ғәзийнесине айланды. Солай екен, жасларымыз ерисип атырған табыслар, ертеңимиздиң шешиўши интеллектуал байлық сыпатында әҳмийетке ийелигин умытпаўымыз керек.

К.ҚОСИМОВ,

Қарақалпақстан Республикасы Бажыхана бас­қармасы инспекторы, аға лейтенант.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF