Еркин Қарақалпақстан Вести Каракалпакстана 13:27:46, 26.05.2019
Хош келипсиз! | RSS
Сайт мазмуны

Кириў усылы

ПУБЛИЦИСТИКА — ЖӘМИЙЕТЛИК ТУРМЫСТЫҢ  АЙНАСЫ

Пуқаралық жәмийети қәлиплесиўин мониторинг етиўши бийғәрез институты Қарақалпақстан аймақлық бөлиминде, Өзбекистан Республикасы Журналистлери дөретиўшилик аўқамы Қарақалпақстан бөлими менен бирликте шөлкемлестирилген «Журналист ҳәм публицистика» атамасындағы семинар болып өтти.

Оған республикалық ҳәм тараўлық ғалаба хабар қуралларының хызметкерлери, изертлеўшилер, редакцияларда әмелият өтеп атыр­ған Бердақ атындағы Қарақалпақ мәмлекетлик университети журналистика бөлиминиң студентлери қатнасты.

Оны Қарақалпақстан Республикасы Баспасөз ҳәм хабар агентлигиниң директоры А.Бекмуратов алып барды.

Илажда Өзбекистан Республикасы Журналистлери дөретиўшилик аўқамы Қарақалпақстан бөлиминиң баслығы, «Еркин Қарақалпақстан» — «Вести Каракалпакстана» газеталарының бас редакторы К.Реймов, Мырза Улығбек атындағы Өзбекистан Миллий университетиниң үлкен илимий-хызметкер-излениўшиси Т.Машарипова, Пуқаралық жәмийети қәлиплесиўин мониторинг етиўши бийғәрез институты Қарақалпақстан аймақлық бөлиминиң жетекши қәнигеси, «Нөкис-ҒМ» радиоканалының баслығы Б.Елманов ҳәм басқалар шығып сөйлеп, публицистиканың ҳәзирги дәўирдеги сиясий-жәмийетлик әҳмийети, публицистикалық шығармалардың дөретилиў механизми мәселелерине кеңнен тоқтап өтти.

Атап өтилгениндей, бүгинги глобалласқан информация әсиринде хабарлардың көплиги аудиторияда таңлаў мүмкиншилигин пайда етпекте. Бундай жағдайда аудитория қызықлы, әҳмийетли, есте қалатуғындай материалларды оқыйтуғынлығы себепли, усындай ўазыйпаны публицистикалық материаллар атқармақта. Публицистиканың әҳми­йети бүгинги ғәрезсизлик дәўиринде және де күшеймекте. Өйткени, ол ғәрезсиз раўажланыў жолына түскен Ўатанымыздың келешеги, жәмийетимиздиң бүгинги раўажланыўы жолында алға илгерилетиўши күштиң бирине айланып, Өзбекистан Республикасы Консти­туция­сы ҳәм Нызамларының, Президент Пәрманларының, Министрлер Кабинети қарарларының, Қарақалпақстан Республикасы Конституциясы ҳәм Нызамларының, Министрлер Кеңеси қарарларының тур­мыс­қа енгизилиўинде ғалаба хабар қуралларының түрли каналларынан өз сөзин айтып, халқымызды бир мақсетке бирлестириў, уйымластырыў, бағдарлаў жолында өзиниң әҳмийетли ўазыйпаларын инабатлы түрде атқарып келмекте.

Семинарда республикалық ҳәм жергиликли ғалаба хабар қуралларында жәрияланған публицистикалық материаллар мысалында публицистиканың ҳәзирги раўажланыў дәрежесине таллаў жасалып, пикир-усыныслар билдирилди.

Илаж соңында қатнасыўшылар өзлерин қызықтырған сораўларға жуўап алды.

Ә.Жиемуратов,

Қарақалпақстан хабар агентлигиниң хабаршысы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF