Еркин Қарақалпақстан Вести Каракалпакстана 12:54:40, 26.05.2019
Хош келипсиз! | RSS
Сайт мазмуны

Кириў усылы

БИРИНШИЛИК ЖУЎАПКЕРШИЛИК ТАЛАП ЕТЕДИ

Мәмлекетимизде әҳмийетли сиясий ўақыя саналған 4-декабрь — Өзбекистан Республикасы Президентин сайлаў күнине қызғын таярлықлар көрилмекте.  Республикамыздың бәрше қала, районларында елимиз Президентлигине талабанлар менен ушырасыў кешелери, сайлаўалды түсиндириў жумыслары жоқары дәрежеде шөлкемлестирилмекте.

Бердақ атындағы Қарақалпақ мәмлекетлик сазлы театрында сайлаўда биринши мәрте даўыс бериў ҳуқықына ийе болған жаслар менен ушырасыў кешеси өткерилди. Онда Қарақалпақ мәмлекетлик университети жанындағы 1-, 2-, 3-санлы академиялық лицейлер ҳәм Нөкис қурылыс кәсип-өнер колледжиниң 18 жасқа толған оқыўшылары белсене қатнасты. Илажда Бердақ атындағы Қарақалпақ мәмлекетлик университети профессоры Ж.Сағындықов, Нөкис қалалық Газ кәрханасы баслығы А.Қуранбаев, Камалат ЖЖҲ Қарақалпақстан Республикалық Кеңесиниң бөлим баслығы Б.Тәңирбергеновлар қатнасыўшыларға миллий сайлаў нызамшылығы, даўыс бериўдиң әҳми­йети, Президент сайлаўы түсиниги, сайлаўшылардың ҳуқық ҳәм еркинликлери ҳаққында кең түрде түсиниклер берди.

— Мен он сегиз жасқа толып, еркин пикир, сиясий дүньяқарасына ийе, мәмлекет ҳәм жәми­йет көлеминде жүз берип атыр­ған  ўақыя-ҳәдийселерге мүнәсибет билдире алатуғын Өзбекистан Республикасы пуқарасы дәрежесине жетисип, үлкен сиясий процесске қатнасып атырғанлығымнан жүдә қуўанышлыман, - дейди Қарақалпақ мәмлекетлик университети жанындағы академиялық лицей оқыўшысы Дүрдана Сейтназарова. — Бул маған үлкен жуўапкершилик жүклейди. Мәмлекетимиздиң буннан былай да жедел раўажланыўы, дүньяда өз орнына ийе болыўы, халқымыздың турмыс шараятының еле де жақсыланыўы, елимиз жасларына жаратылған имканиятлар шеңбериниң кеңейиўи бизиң мүнәсип талабанға даўыс бериўимизге тиккелей байланыслы. Сонлықтан жаслардың ҳуқықый саўатын асырыўшы бүгингидей сайлаўалды үгит-нәсият илажларының өткерилиўи жүдә зәрүр деп билемен.

Бир ғана Қарақалпақ мәмлекетлик университети жанындағы академиялық лицейден Президент сайлаўында 193 оқыўшы биринши мәрте даўыс береди.

Несибели Мамбетирзаева.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF