Еркин Қарақалпақстан Вести Каракалпакстана 19:23:36, 25.05.2019
Хош келипсиз! | RSS
Сайт мазмуны

Кириў усылы

ГҮЛИМ — БОКС БОЙЫНША ӨЗБЕКИСТАН ЧЕМПИОНЫ

Бокс бойынша Ферғана қаласында болып өткен Өзбекистан чемпионатында 57 килограмм  салмақта қатнасқан Нөкис педагогикалық колледжиниң оқыўшысы Гүлим Уразымбетова барлық қарсыласларын жеңип, республикамыздың бокс тарийхында биринши мәрте елимиз чемпионы деген атаққа миясар болды.

Боксшы қызымыз дәслепки ушырасыўда бухаралы, соң республикамыздан Дилфуза Досжанова, финалда болса майдан ийе­си, фер­ғаналы спортшы үстинен жеңиске ерисип, өз салмақ категориясында жеңимпаз болды. Соның менен бирге, ол келеси жылы жоқары оқыў орнына тест сынақларысыз кириў имканиятына ийе болды. Буннан тысқары, өз салмақ категорияларында Нөкис спорт колледжиниң оқыўшылары Сулыўхан Ембергенова, Айзада Юсупова, сондай-ақ, Дилшода Нурымбетова екинши, Гүлнур Джамуратова болса үшинши орынларды қолға киргизди.

— Усы жылы Рио-де-Жанейро қаласында (Бразилия) болып өткен XXXI жазғы Олимпиада ойынларында елимиз боксшыларының қолға киргизген әжайып жеңиси, бундай абырайлы жарысқа Өзбекистан қызлары арасында Ёдгарой Мирзаеваның қатнасқаны жасларымыз арасында спорттың усы түрине болған қызығыўшылықты және де арттырды,-дейди Қарақалпақстан сайланды командасының аға тренери Рахат Утениязов. — Бүгинги күни Нөкис қаласында, Шымбай ҳәм Хожели районларында бокс секциялары жумыс алып барып, оларға 60 қа шамалас қыз қатнаспақта. Олардан Гүлим Уразымбетова менен Умида Пиримбетова өткен жылы Өзбекистан сайланды командасының қурамына қабыл етилген болса, ал, быйылғы жылы Сулыўхан Ембергенова, Айзада Юсупова,  Дилшода Нурымбетова, Гүлнур Джамуратова, сондай-ақ, Нөкис спорт колледжиниң оқыўшылары Набира Қуралбаева, Гүлнур Аманкелдиева, Нилуфар Рейимбаева, Дилфуза Досжановалар мирәт етилди. Өзбекистан чемпионатына олардан тысқары, спорт колледжинен Оразгүл Мыңбае­ва, Шымбай экономика кәсип-өнер колледжинен Тойдық Абдижамилова, Нөкис автомобил жол хожалығы ҳәм хызмет көрсетиў кәсип-өнер колледжиниң оқыўшысы Сырға Бийсенбаева, Айсәнем Алламбергеновалар қатнасып қайтты. Бүгинги күни тренерлеримизден Мурат Қуўанбаев, Наўрыз Нуржанов, Байрам Халықназаров, Абай Нуруллаев, Памир Адилчаев, Мақсет Жумабаев ҳәм Азамат Маткаримовлар қызларымызға бокс сырларын үйретип келмекте.

— Гүлим еки жылдан берли Нөкис мелиорация ҳәм суў хожалығы кәсип өнер колледжи жанындағы секцияға қатнасып келмекте,-дейди тренери Мурат Қуўанбаев. — Ол өткен жылы март айында Бухара қаласында болып өткен халықаралық турнирде, сол жылы ноябрь айында Ташкент қаласында өткерилген Өзбекистан чем­пионатында екинши орынды қолға киргизген болса, тәрбияланыўшыларымыздан Умида Пиримбетова менен Анар Атажанова чемпионатта үшинши орынды ийеледи.

— Қандайда бир спорт пенен шуғылланыўды өз алдыма мақсет еткен болсам, олардың арасынан боксты таңладым, - дейди Өзбекис­тан чемпионы Гүлим Уразымбетова. — Келешектеги әрманым Өзбекистан сайланды командасының қурамында Азия ҳәм жәҳән чемпионатларына, Олимпиада ойынларына қатнасыў болып табылады. Соның менен бирге тренер болып, қызларымызға бокс сырларын үйретиўди нийет еткенмен.

Қызлар арасында бокс түриниң республикамызда раўажлана баслағанына енди еки жылға шамалас ўақыт болған болса, қысқа ўақыт ишинде спортшыларымыздың қолға киргизип атыр­ған табыслары жаман емес.  Келешекте олардың арасынан Азия, жәҳән чемпионлары, Олимпиада ойынлары жеңимпазлары жетилисип шығатуғынлығына исенемиз.

Д.АБИБУЛЛАЕВ,

Қарақалпақстан хабар агентлигиниң хабаршысы.

СҮЎРЕТТЕ: бокс бойынша Қарақалпақстан сайланды командасының ағзалары: (солдан оңға қарай) Д.Нурымбетова, Г.Уразымбетова ҳәм Г.Джамуратовалар.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF