Еркин Қарақалпақстан Вести Каракалпакстана 09:00:16, 27.05.2020
Хош келипсиз! | RSS
Сайт мазмуны

Кириў усылы

ҚАҲАРМАН ҲҮРМЕТИНЕ

БАҒЫШЛАНҒАН ТУРНИР

Елимиз әзелден Орайлық Азияда өзиниң батырлары, палўанлары менен даңқ шығарып келген. Халқымыздың ҳеш бир тойы палўанлардың гүресисиз, қошқар ҳәм қораз урысысыз өтпейди. Себеби, бул көп жыллық тарийхымыздан берли киятырған дәстүрлер есапланады.

Бердақ атындағы Қарақалпақ мәмлекетлик университетиниң спорт сарайында 9-май - Еслеў ҳәм қәдирлеў күни мүнәсибети менен Өзбекстан Қаҳарманы, Өзбекстан ҳәм Қарақалпақстан халық шайыры Ибра­йым Юсуповтың естелигине арналған миллий гүрес бо­йынша республикалық турнир болып өтти.


Жарыстың ашылыў салтанатына Өзбекстан Жазыўшылар аўқамы баслығының орынбасары А.Жаббаров, Қарақалпақстан Республикасы Руўхый үгит-нәсият орайының баслығы Ш.Уснатдинов, Қарақалпақстан Жазыўшылар аўқамының баслығы, шайыр К.Кәримов ҳәм шайырдың шаңарақ ағзалары қатнасып, жарыс шөлкемлестириўшилери болған Шымбай қаласы ҳәкимиятына, университет жәмәәтине миннетдаршылық билдирди. Бул турнирге пайтахтымыздан, республикамыздың дерлик барлық районларынан жас палўанлар қатнасып, өз-ара күш сынасты.

Беллесиўлер жуўмағында қызлар арасында Ф.Ешназарова (48кг), Ш.Жоллыбаева (52кг), Р.Айтжанова (57кг), Қ.Байманова (63кг) ҳәм А.Алламуратовалар (63кг дан жоқары) салмақ категорияларында жеңимпаз деп табылды.

Ал, ер балалар арасында К.Жамалов (60кг), М.Қудайбергенов (66кг), Т.Дәўлетназаров (73кг), А.Абдуллаев (81кг) ҳәм Т.Сейтмуратовлар (90кг) жеңимпаз бол­ған болса, шоманайлы М.Абдихаликов жарыстың абсолють жеңимпазы атанды.

Жарыс соңында жеңимпазлар шөлкемлестириўшилер тәрепинен диплом, медаль ҳәм баҳалы саўғалар менен сыйлықланды.

Р.АРЗИЕВ,

арнаўлы хабаршымыз.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF