Еркин Қарақалпақстан Вести Каракалпакстана 20:17:32, 25.08.2019
Хош келипсиз! | RSS
Сайт мазмуны

Кириў усылы

КОМПЬЮТЕРДИ ҚАЛАЙ ДУРЫС ТАҢЛАЎ КЕРЕК?

Ҳәзирги күнде адамлардың компьютер техникасына қызығыўшылығы артып бармақта. Дерлик ҳәр бир үйде автоматластырылған қурылмалар бар. Буннан тысқары ҳәзирги ўақытта өзимизге яки перзентлеримиз ушын жеке компьютер сатып алыў имканияты жоқ емес, әлбетте. Улыўма компьютер қурылмасы не ушын керек екенлигин ҳәмме биледи, десек қәтелеспеймиз. Бирақ, бул қурылманы сатып алыўда бирнеше факторларға итибар бериўимиз тийис.

Көпшилик жағдайларда компьютер сатып алыўда бирқатар қыйыншылықларға дус келеди. Себеби, қарыйдарлардың көпшилиги компьютер техникасы бойынша арнаўлы билимлерге ийе емеслигинен компьютер таңлаўда алжасыққа жол қойыўы мүмкин. Әлбетте, ҳәр бир адам жақсысын ҳәм сапалы түрин таңлағысы келеди. Бундай жағдайларда төмендеги мәсләҳәтке итибар қаратса мақсетке муўапық болар еди.

Дәслеп, жеке компьютер сатып алыўдан алдын, оны қандай мақсетте сатып алажақсыз? Себеби, компьютерлер бирнеше түрдеги конфигурацияларға бөлинеди. Мысалы, компьютер жазыў-сызыў жумыслары ушын ислетилетуғын болса офис конфигурациясындағы компьютерди алсаңыз болады. Бул компьютерлердеги қурылмалар онша күшли болмаған менен электр энергияны аз муғдарда талап етиўши азықланыў блоклары орнатылған болып, улыўма баҳасы да арзан болады. Бундай конфигурациядағы компьютерлер балаларға компьютерде жумыс ислеўди үйретиўде жүдә қол келеди. Буннан тысқары бухгалтериялық жумысларды әмелге асырыў, интернетте ҳәм бирқанша программаларда жумыс атқарыў имканиятын береди.

Егер қурамалы программаларда ислейтуғын болсаңыз, кең форматтағы график мағлыўматлар үстинде жумыс алып барыў, аудио ҳәм видеомағлыўматларды қайта ислеў керек болатуғын болса, орташа ямаса оннан жоқары конфигурациядағы компьютер алсаңыз болады. Өз гезегинде бул компьютерлерде яд қурылмалары кең ҳәм тез ислеўши кейинги әўладтағы көп ядролы микропроцессорлардың болыўы, айрықша видеокарта орнатылғанлығы ҳәм бас­қалар мысал бола алады.

Егер сиз, компьютер ойын­ларына ышқыпаз болсаңыз яки қандай да мақсетти гөзлеп ойын клубын ашыў нийетиңиз болса, онда күшли конфигурациядағы, яғный,  бир сөз бенен айт­қанда айрықша комплектациядағы компьютер яки компьютерлер сатып алғаныңыз мақул. Себеби, ҳәзирги ўақытта компьютер ойынларының түрлери көп болып, олардың ишиндеги жүдә жоқары конфигура­цияны талап етиўши үш өлшемли (3D) ҳәм 4К өлшемли графикадағы ойын­лар бир талай. Сонлықтан да бундай компьютерлердиң өзине жараса баҳасы да қымбат болады.

Сондай-ақ, егер сиз тез-тез сапарда болатуғын болсаңыз портатив компьютер ноутбук яки нетбук сатып алғаныңыз дурыс болады. Оның қолайлы тәреплери өзи ықшам, көлеми жағынан киши, автоном электр энергиясынан азықланыўшы, салмағы жеңил, түрли өзгешилиги бар портатив компьютер болып табылады. Компьютерлердиң ҳәммеси мультмедиа имканиятларын береди.

Демек, жеке компьютер сатып алыўда жоқарыда көрсетилгенлерди есапқа алғаныңыз мақул. Сиз билип-билмей алған компьютериңиздиң бар имканиятының тек ғана 50 процентин пайдалансаңыз, ал, қалған 50 процентине не ушын пул төледиңиз?
Усыны бир ойлап көрип тийисли қарар қабыл етсеңиз өзиңизге пайдалы ҳәм керексиз ысырапгершиликтиң алдын алған болар едиңиз.

А.ДОСИМОВ,

Мойнақ санаат-транспорт кәсип өнер колледжи арнаўлы пән оқытыўшысы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF