Еркин Қарақалпақстан Вести Каракалпакстана 15:33:39, 23.08.2019
Хош келипсиз! | RSS
Сайт мазмуны

Кириў усылы

ДӘЎИР ТАЛАБЫНАН КЕЛИП ШЫҚҚАН ҲҮЖЖЕТ

Усы жыл 5-октябрьде Өзбекистан Республикасы Президентиниң «Исбилерменлик жумысын жедел раўажландырыўды тәмийинлеўге, жеке мүлкти ҳәр тәреплеме қорғаўға ҳәм исбилерменлик орталығын сапа жағынан жақсылаўға байланыслы қосымша ис-илажлар ҳаққында»ғы Пәрманы қабыл етилди.

Дәўир талабынан келип шығып қабыл етилген бул Пәрман ең биринши гезекте, жеке мүлкти қорғаўды еле де қүшейтиў, киши бизнес ҳәм жеке исбилерменлик ушын қолайлы имканиятларды жаратыў, инвестициялық тәми­йинлеўди арттырыў ҳәм ҳәр тәреплеме қоллап-қуўатлаўға бағдарланған.

Киши бизнес ҳәм жеке исбилерменлерге қең мүмкиншилик жаратыў, олардың жумысларына себепсиз араласыўды қысқартыў, ҳуқық бузыўшылықтың алдын алыў, олардың профилактикалық нәтийжелилигин арттырыў мәмлекетлик уйымлардың биринши дәрежели ўазыйпасы сыпатында алып қаралады.

Усы мақсетте ең дәслеп мәмлекетлик уйымларға, ҳуқық қорғаў ҳәм қадағалаў дүзилмелерине төмендеги өз жумысында белгиленген талаплардың ҳәм исбилерменлик субъектлериниң ҳуқықлары ҳәм нызамлы мәплериниң үстем болыўын сөзсиз әмелге асырыў, усыған тийкарланып ўазыйпаларын ҳәм ўәкилликлерин сын көз бенен қайта көрип шығыў: исбилерменлик жумысына нызамсыз аралас­қаны ҳәм тосқынлық еткенлиги, олардын жумысын тийкарсыз тоқтатып қойғаны ушын лаўазымлы шахслардың жуўапкершилиги ҳаққында нызам хүжжетлери нормалары талапларының қатаң орынланыўы, сондай-ақ, исбилерменлик субъектлерине жеткерилген зыянды тиккелей айыпкерлерден өндирилиўин тәмийинлеў ўазыйпалары жүклетилген.

Бул норма мәмлекетлик уйымларға айыплы хызметкерлерге тек ғана тәртип-интизамлық, ҳәкимшилик ямаса жынайый жуўапкершилик шараларын қоллаў менен шекленбестен, исбилерменлик субъектлерине жеткерилген зыянды сол хызметкерлерден өндирилиўин жүклейди.

Пәрманда исбилерменлик субъектлери жумысларына тийкарсыз араласыўдан исенимли ҳуқықый кепилликлерди тәмийинлеўге бағдарлан­ған мәмлекетлик қадағалаўдың жаңа принципиал механизмлери белгиленген.

Сондай-ақ, 2017-жыл 1-январьдан баслап төмендеги илгери көрилмеген илажлар енгизиледи:

- исбилерменлик субъектлериниң жумысын жобадан тысқары тексериўлердиң барлық түрлери бийкар етиледи. Юридикалық тәрептиң саплас­тырылыўына байланыслы тексериўлер ҳәм де физикалық ҳәм юридикалык тәреплердиң нызам ҳүжжетлериниң бузылыўы жағдайлары ҳаққындағы мүрәжатлар тийкарында тек ғана қадағалаўшы уйымларды муўапықластырыўшы республикалық Кеңесиниң шешимине тийкарланып өткерилетуғын қысқа мүддетли тексериўлер әмелге асырылыўы мүмкин:

- соның менен бирге, исбилерменлик субъектлериниң жумысын, сондай-ақ, жынаят ислери бойынша қарама-қарсы тексериўлердиң барлық түрлери бийкар етиледи.

Солай етип, қадағалаўшы уйымлар келешекте режеден тысқары тексериўлердиң өткерилиўин шөлкемлестириў ҳуқықына ийе емес.

Соның менен бирге, Пәрман ҳәкимшилик ҳәм жынаят нызамшылығын либералластырыў жолын даўам етип, финанс-хожалық жумысын әмелге асырыўда биринши мәрте ҳуқықбузыўшылықты ислеген исбилерменлик субъектлери, олардың хызметкерлери ҳәм исбилерменлик жумысын мәмлекетлик дизимнен өткерместен әмелге асырып атырған адамларды, олар тәрепинен жеткерилген зыянды қаплаған ҳәм ҳуқықбузыўшылық нәтийжесин белгиленген мүддетлерде өз қәлеўи менен сапластырған жағдайда, жуўапкершиликтиң барлық түрлеринен азат етиў менен байланыслы жаңа илажларды нәзерде тутады.

Республиканың инвести­циялық тәмийинлениўин күшейтиў ушын сырт ел инвес­тициялары қатнасындағы жаңадан шөлкемлестирилген, өндирис кәрханаларына бес жыл даўамында олар дизимнен өткен сәнеде әмелде бол­ған салық ставкалары ҳәм бас­қа мәжбүрий төлемлерин қоллап-қуўатлаў ҳуқықы бериледи.

Джанибек СЕЙТНАЗАРОВ,

Өзбекистан Республикасы Әдиллик министрлиги юристлердиң тәжирийбесин арттырыў орайының тыңлаўшысы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF