Еркин Қарақалпақстан Вести Каракалпакстана 20:10:25, 25.08.2019
Хош келипсиз! | RSS
Сайт мазмуны

Кириў усылы

КОМИТЕТТИҢ КӨШПЕЛИ МӘЖИЛИСИ

Усы жыл 4-ноябрь күни Нөкисте Өзбекистан Республикасы Олий Мажлиси Нызамшылық палатасының Мийнет ҳәм социаллық  мәселелер комитетиниң кеңейтилген көшпели мәжилиси өткерилип, оған усы комитеттиң ағзалары, Жоқарғы Кеңес депутатлары, тийисли министрликлер менен ведомстволардың, жәмийетлик шөлкемлердиң басшылары, район ҳәм қала ҳәкимлериниң орынбасарлары, бәнтликке көмеклесиў орайларының баслықлары, ғалаба хабар қуралларының ўәкиллери қатнасты.

Мәжилисти Қарақалпақстан Республикасы Минис­трлер Кеңесиниң Баслығы Қ.Сариев кирис сөз бенен ашты.

Мәжилистиң күн тәртибинде усы жылдың 23-26-август күнлери Олий Мажлис Нызамшылық палатасы депутатлары тәрепинен дүзилген жумысшы топардың 2016-жылда жумыс орынларын жаратыў ҳәм халықтың бәнтлигин тәмийинлеў бағдарламасы параметрлериниң Қарақалпақстан Республикасында орынланыўы барысын қадағалаў-тал­қылаў тәртибинде үйрениў жуўмақлары көрип шығылды. Бул бойынша Олий Мажлис Нызамшылық палатасының Мийнет ҳәм социаллық мәселелер комитетиниң баслығы Ё.Умаров,  жумысшы топар ағзасы И.Хажиев, Өзбекистан Республикасы Мийнет минис­трлигиниң Бәнт болмаған халықты жумысқа орналастырыў ҳәм кәсипке қайта оқытыўды шөлкемлестириў басқармасының баслығы Э.Авезов шығып сөйледи.

Мәжилисте атап өтилгениндей, бүгинги күнде ең әҳми­йетли ўазыйпалардың бири — бул жаңа жумыс орынларын жаратыў арқалы халықтың бәнтлигин тәмийинлеў болып табылады. Усы ўазыйпалардан келип шыққан ҳалда республикамызда бул бағдарда системалы ислер әмелге асырылмақта. Атап айтқанда, быйыл­ғы жылы республика бойынша 49 мың 863 жаңа жумыс орнын шөлкемлестириў белгиленип, соннан усы жылдың январь-сентябрь айларында  38 мың 658 жаңа жумыс орны жаратылып, белгиленген реже 101,4 процентке орынланды.

Жаратылған жумыс орынларының 83,8 проценти аўыллық жерлерде, ал 24,3 проценти ҳаял-қызлар ушын жаратылды. Есап бериў дәўиринде жаңа жумыс орынларын жаратыў бойынша белгиленген режелер барлық бағдарлар ҳәм районлар кесиминде толығы менен орынланды. Соның ишинде тоғыз айға белгиленген реже санаатта 102,7, хызмет көрсетиў саласында 101,5, аўыл хожалығы тараўында 101,2, қурылыста 103,8, ислемей турған кәрханалардың жумысын тиклеў бойынша 103,6, коммерциялық банклердиң киши кәрханалар ҳәм микрофирмаларды шөлкемлестириў есабынан 101,6, дийқан ҳәм фермер хожалықларын раўажландырыў бойынша 100,4 процентти қурады.

2015-2016-оқыў жылында республика бойынша 23 мың 747 колледж питкериўшилери менен дүзилген төрт тәреплеме шәртнамалар тийкарында  жаслардың оқыў-өндирислик әмелиятын өтеген кәрхана ҳәм мәкемелердеги бос орынларға жумысқа орналастырыў белгиленген. Бул бағдардағы жумыслар ҳәр тәреплеме талқыланып, ерисилип атырған нәтийжелер менен бирге кешиктириўге болмайтуғын әҳмийетли мәселелер кең түрде көрип шығылды.

Илажда ерисилген усындай нәтийжелерге қарамастан, Бәнтлик бағдарламасына муўапық Нөкис қаласы, Беруний, Хожели ҳәм Шымбай районындағы жумысшы топар комиссияларының есабатларында айырым кемшиликлердиң орын алғанлығы атап өтилип, оларды сапластырыў бо­йынша айқын көрсетпелер белгилеп берилди.

Мәжилис күн тәртибиндеги мәселелер бойынша тийисли шешим қабыл етти.

Н.РЕЙПНАЗАРОВ,

Қарақалпақстан хабар агентлигиниң хабаршысы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF