Еркин Қарақалпақстан Вести Каракалпакстана 18:14:28, 21.11.2018
Хош келипсиз! | RSS
Сайт мазмуны

Кириў усылы

АЛЫС РАЙОНДАҒЫ МЕКТЕПТЕ

Мойнақ районлық халық билимлендириў мәкемелери хызметин методикалық тәмийинлеў ҳәм шөлкемлестириў бөлимине қараслы 4-санлы улыўма билим бериў мектеби районда айрықша тилге алынып киятырған оқыў дәргайларынан есапланады.

Бүгинги күнде мектепте 426 оқыўшы тәлим-тәрбия алмақта. Оларға заманға сай билим бериўде 64 муғаллим мийнет етеди. Мектептеги оқыў-тәрбия жумысларын нәтийжели шөлкемлестириў ҳәм билимлендириў процесин еле де жетилистириў мақсетинде «Үйрен-үйрет» ис-илажлар комплекси тийкарында «Устаз-шәкирт» ҳәм «Шеберлик мектеби» жумыслары жақсы жолға қойылған.

Мектеп биология, химия, рус тили пәнлери бойынша «Шеберлик мектеби» деп белгиленип, муғаллимлердиң ис-тәжирийбелери район көлеминде ен жайдырылды. Мектеп муғаллимлериниң билимге болған қызығыўшылығын арттырыў мақсетинде «Сабақ муқаддес» ис-илажы тийкарында сабақлар заманагөй усылда мәлимлеме-коммуникация технологиялары нәтийжесинде өтиледи.

Мектеп «Ziyonet» тармағына жалғанып, «This email address is being protected from spambots. You need JavaScript enabled to view it.» мәнзили арқалы сораўларға жуўаплар алынады. Сондай-ақ, мектепте «4-umumtalimmaktab.zn.uz» атлы веб-сайт ашылып, барлық оқыўшылар ҳәм оқытыўшылар тәрепинен жаңалықлар киргизилип келинбекте.

Мәмлекетимиз тәрепинен жаратып берилген бундай мүмкиншиликлерден жасларымыз утымлы пайдаланып, районлық ҳәм республикалық көлемдеги спорт жарыслары, таңлаўлар, пән олимпиадасы ҳәм билимлер беллесиўлеринде қатнасып, сыйлы орынларды ийелемекте.

Ҳәр жылы муғаллимлер арасында өткерилип киятырған таңлаўларда мектебимиз жәмәәти де белсендилик пенен қатнасып, жоқары орынларға ерисип келмекте. Олардан химия пәни муғаллими У.Урынбаева, биология пәни муғаллими З.Еримбетова, биология пәни муғаллими Г.Таңабергеновалар республикалық басқышларда сыйлы орынларды алыўға миясар болды.

Мектепте оқыўшылардың бос ўақытларын мазмунлы өткериў ушын ҳәр қыйлы пән дөгереклери, спорт секциялары шөлкемлестирилип, оларға тәжирийбели муғаллимлер жуўапкер етип бекитилген.

Ҳақыйқатында да, усындай устаз муғаллимлерден тәлим-тәрбия ал­ған оқыўшылар өткерилип атыр­ған ҳәр қыйлы таңлаў ҳәм жарысларда өз белсендиликлерин көрсетип келмекте.

Бундай таңлаўлар жасларды тәрбиялаўға үлкен үлес қосып атырған оқытыўшы ҳәм муғаллимлердиң абырай-мәртебесин арттырыўға, мийнетин хошаметлеўге қаратылған.  Усындай муғаллимлерден руўхый ағартыўшылық ислери бойынша директор орынбасары, 28 жыллық педагогикалық тәжирийбеге ийе оқытыўшы, «Шуҳрат» медалы ийеси Бағдагүл Ержанова Ғәрезсизлигимиздиң 25 жыллығы байрамы мүнәсибети менен «Өзбекистан ғәрезсизлигине — 25 жыл» көкирек нышаны, 1-октябрь — Муғаллимлер ҳәм устазлар күни мүнәсибети менен тәлим-тәрбия системасында айрықша өрнек көрсеткен хызметкерлерден бир топарын сыйлықлаў ҳаққындағы Өзбекистан Республикасы Президентиниң Пәрманына муўапық,  «Пидәкерлик хызметлери ушын» ордени менен, биология пәни муғаллими З.Еримбетова «Қарақалпақстан Республикасы халық билимлендириў ағласы» көкирек нышаны менен сыйлықланды.

Оқытыўшы устазлардың бундай жетискенликлери бизиң педагогикалық жәмәәтимиздиң тынымсыз мийнетлериниң нәтийжеси деп ойлайман.

М.ӘМЕТОВ,

Мойнақ районындағы 4-санлы улыўма орта билим бериў мектебиниң директоры.

СҮЎРЕТЛЕРДЕ: 1. Қарақалпақ тили ҳәм әдебияты пәни муғаллими Малика Жақсымуратованың 8-класс оқыўшыларына сабақ өтип атырған пайыты. 2. Мектептиң 8-класының үлгили оқыўшылары Айсулыў Турсынбаева ҳәм Азада Жолдасовалар. 3. Руўхый-ағартыўшылық ислери бойынша директор орынбасары Б.Ержанова оқыўшылар менен бирге.

Ж.ЖАҚСЫМУРАТОВтың түсирген сүўретлери.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF